হোৱাটছএপত প্ৰৱঞ্চনাৰ নতুন জাল, নিমিষতে খালী হ’ব পাৰে আপোনাৰ বেংক একাউণ্ট

শেহতীয়াকৈ OneCard য়ে গ্ৰাহকৰ প্ৰতি ডাঙৰ সতৰ্কবাণী জাৰি কৰিছে। ইয়াৰ ভিতৰত WhatsApp Screen Mirroring Fraud নামৰ নতুন প্ৰৱঞ্চনাৰ বিষয়ে মানুহক সকীয়াই দিয়া হৈছে। বহুতেই এই প্ৰৱঞ্চনাৰ বলি হৈছে কাৰণ বেছিভাগেই এই প্ৰৱঞ্চনাৰ বিষয়ে অৱগত নহয়। যদি আপুনি এই ফান্দত পৰে, তেন্তে নিমিষতে আপোনাৰ বেংক একাউণ্ট খালী হ’ব পাৰে, চুৰি হ’ব পাৰে ব্যক্তিগত তথ্য।

WhatsApp Screen Mirroring Fraud কি?

ৱানকাৰ্ডৰ মতে, প্ৰৱঞ্চকে কাৰোবাক প্ৰতাৰণা কৰি হোৱাটছএপত স্ক্ৰীণ শ্বেয়াৰিং অন কৰে। স্ক্ৰীণ শ্বেয়াৰিং অন হোৱাৰ লগে লগে প্ৰৱঞ্চকসকলে আপোনাৰ সকলো স্পৰ্শকাতৰ তথ্য যেনে অ’টিপি, বেংকৰ বিৱৰণ, পাছৱৰ্ড আৰু বাৰ্তা লাভ কৰে।

কেনেকৈ এই প্ৰৱঞ্চনাৰ বলি হ’ব পাৰে

বিশ্বাস -প্ৰৱঞ্চকে নিজকে বেংক বা বিত্তীয় কোম্পানীৰ কৰ্মচাৰী হিচাপে পৰিচয় দিয়ে। তেওঁ কয় যে, আপোনাৰ একাউণ্টত কোনো সমস্যা হৈছে আৰু স্ক্ৰীণখন শ্বেয়াৰ কৰিবলৈ কয়। ইয়াৰ পৰাই আৰম্ভ হয় এই প্ৰৱঞ্চনা।

আৰম্ভণি – প্ৰৱঞ্চকে আপোনাক ষ্টেপ-বাই-ষ্টেপ বুজাই দিয়ে যে, কেনেকৈ স্ক্ৰীণ-শ্বেয়াৰিং অন কৰিব লাগে। তাৰ পিছত তেওঁ স্ক্ৰীণখন স্পষ্টকৈ চাব পৰা নাই বুলি অজুহাত দেখুৱায়। ইয়াৰ পিছত তেওঁ আপোনাক WhatsApp ভিডিঅ’ কল আৰম্ভ কৰিবলৈ কয়।

প্ৰৱঞ্চনা -আপুনি স্ক্ৰীণ-শ্বেয়াৰিং কৰাৰ লগে লগে প্ৰৱঞ্চকে আপোনাৰ মোবাইলৰ স্ক্ৰীণ লাইভ চাবলৈ আৰম্ভ কৰে। তাৰ পিছত ভেৰিফিকেচন বুলি কৈ লেনদেন কৰে। আপুনি OTP বা PIN প্ৰৱেশ কৰাৰ লগে লগে সেই তথ্য পোনপটীয়াকৈ প্ৰৱঞ্চকৰ হাতলৈ যায়।

দ্বিতীয় পদ্ধতি -Keyboard Logger

কেতিয়াবা প্ৰৱঞ্চকে আপোনাৰ ফোনত Keyboard Logger নামৰ এটা এপ ইনষ্টল কৰে। ই আপোনাৰ প্ৰতিটো টাইপিং ৰেকৰ্ড কৰে। এই কাৰণেই বহুতো বেংক ৱেবছাইটে অন-স্ক্ৰীণ কিবৰ্ড প্ৰদান কৰে যাতে লগাৰে আপোনাৰ টাইপিং ধৰিব নোৱাৰে। এইদৰে আপোনাৰ বেংকৰ পাছৱৰ্ড, ছ’চিয়েল মিডিয়াৰ পাছৱৰ্ডো চুৰি হ’ব পাৰে।

চুৰি হোৱা তথ্যৰ ব্যৱহাৰ

যেতিয়া প্ৰৱঞ্চকে আপোনাৰ সকলো তথ্য লাভ কৰে, তেতিয়া তেওঁ বেংক একাউণ্টৰ পৰা ধন উলিয়াই, অকৰ্তৃত্বশীল লেনদেন কৰে আৰু পৰিচয় ব্যৱহাৰ কৰি আন প্ৰৱঞ্চনাও কৰিব পাৰে।