ঠাণ্ডা খাদ্য, প্ৰতি উৰণত ১০ মিনিট সময় ৰাহি, মহিলা পাইলট নিয়োগেৰে কিদৰে বছৰি লাভ অৰ্জন কৰিছে ইণ্ডিগ’ই?

কেৱল ভাৰততে নহয়, সমগ্ৰ বিশ্বতে বিমান ব্যৱসায় বিশেষ লাভজনক নহয়। ফলত বেছিভাগ বিমান সংস্থাই অলাভজনক হৈয়েই আছে। ভাৰতৰ বিভিন্ন বিমান সংস্থাৰ ভিতৰত বেছিভাগেই অলাভজনক। ইণ্ডিগ’ই ভাৰতৰ একমাত্ৰ লাভজনক বিমান সংস্থা হিচাপে কাম কৰি আছে।

ভাৰতীয় বিমান সংস্থাৰ বজাৰৰ প্ৰায় ৬৪ শতাংশ ইণ্ডিগ’ৰ হাতত আছে। এয়াৰ ইণ্ডিয়াৰ ২৬.৭ শতাংশ অংশীদাৰিত্ব। আকাশা এয়াৰৰ বিমানত ৫ শতাংশ লোকে যাত্ৰা কৰে। ইয়াৰ উপৰিও স্পাইচজেটৰ বজাৰ অংশীদাৰিত্ব ২.৬ শতাংশ।

কিন্তু ইণ্ডিগ’ই কেনেকৈ নিজৰ ব্যৱসায় চলায়, যাৰ বাবে ই লাভজনক হৈ আছে? তথ্য অনুসৰি এই ভাৰতীয় বিমান সংস্থাটোৱে আন বিমান সংস্থাতকৈ ১৫ৰ পৰা ২০ মিনিট আগতে গন্তব্যস্থান পোৱাৰ চেষ্টা কৰে। হাৰ্ভাৰ্ডৰ এক অধ্যয়নত কোৱা হৈছে যে যদি ইণ্ডিগ’ই প্ৰতিখন বিমানত ১০ মিনিট সময় ৰাহি কৰে তেন্তে সেই ধনেৰে বছৰি প্ৰায় ২০০ খন অতিৰিক্ত বিমান চলাব পাৰে। এইদৰে ইণ্ডিগ’ই বছৰি কোটি কোটি টকা ৰাহি কৰে।

ইয়াৰ বাহিৰেও তেওঁলোকে আৰু কেইটামান কাম কৰে। ইণ্ডিগ’ হৈছে একমাত্ৰ বিমান সংস্থা যিয়ে নিজৰ বিমানত অভেন কঢ়িয়াই নিব নোৱাৰে। ভালদৰে চালে দেখিব যে ইণ্ডিগ’ৰ বিমানত গৰম কৰা খাদ্য উপলব্ধ নহয়। এখন বিমানত ৩টা অভেন থাকে। যদি এটা অভেনৰ ওজন ২০ কিলোগ্ৰাম হয়, তেন্তে প্ৰতি উৰণত প্ৰায় ৬০ কিলোগ্ৰাম কম ওজন লৈ উৰি যায়। ফলত প্ৰতিখন বিমানত প্ৰায় ২০০০ৰ পৰা ৩০০০ টকা কম খৰচ হয়। ৭ লাখ বিমানৰ বাবে বছৰি ১৫০ কোটিৰ পৰা ২০০ কোটি টকা ৰাহি হয়।

ইয়াৰ উপৰিও মহিলা পাইলট সক্ৰিয়ভাৱে নিযুক্তি দিয়া বিমান সংস্থাসমূহৰ ভিতৰত ইণ্ডিগ’ অন্যতম। ইণ্ডিগ’ই ২০২৫ চনৰ আগষ্ট মাহৰ ভিতৰত তেওঁলোকৰ কোম্পানীত ১০০০ মহিলা পাইলট ৰখাৰ লক্ষ্য নিৰ্ধাৰণ কৰিছে। বৰ্তমান ইণ্ডিগ’ৰ ১৪ শতাংশতকৈ অধিক মহিলা পাইলট আছে। যিটো সমগ্ৰ বিশ্বৰ গড় সংখ্যাতকৈ বেছি। জনা যায় যে ইণ্ডিগ’ই ইচ্ছাকৃতভাৱে এই কাম কৰিছে। কাৰণ, পুৰুষ পাইলট তেওঁলোকৰ শাৰীৰিক গঠনৰ বাবে মহিলাতকৈ গধুৰ। এইদৰেই বিমান সংস্থাটোৱে ওজন পৰিচালনা কৰে আৰু খৰচ কমায়।