কেতিয়া বজাৰলৈ আহিব ৫০ টকীয়া মুদ্ৰা? কেন্দ্ৰৰ গুৰুত্বপূৰ্ণ ঘোষণা

কিছুদিন পূৰ্বে বজাৰলৈ আহিছিল ২০ টকীয়া মুদ্ৰা। এইবাৰ ৫০ টকীয়া মুদ্ৰা প্ৰৱৰ্তনৰ সন্দৰ্ভত চলিছে ব্যাপক চৰ্চা। ইয়াৰ মাজতে ৫০ টকীয়া মুদ্ৰাক লৈ আহিছে এক গুৰুত্বপূৰ্ণ তথ্য। বহুদিন ধৰি মানুহে ভাবি আছিল যে বজাৰত নতুনকৈ ৫০ টকীয়া মুদ্ৰা আহিব। কিন্তু এতিয়া কেন্দ্ৰীয় চৰকাৰে স্পষ্টকৈ উল্লেখ কৰিছে যে ৫০ টকীয়া মুদ্ৰা প্ৰৱৰ্তনৰ কোনো পৰিকল্পনা নাই।

আচলতে কেন্দ্ৰীয় চৰকাৰে দিল্লী উচ্চ ন্যায়ালয়ৰ আগত কৈছে যে ৫০ টকীয়া মুদ্ৰা বৰ্তমান বজাৰত প্ৰৱৰ্তনৰ কোনো পৰিকল্পনা নাই। চৰকাৰে এক আৱেদনৰ উত্তৰত এইদৰে কয়, য’ত দৃষ্টিহীন লোকৰ বাবে ৫০ টকীয়া মুদ্ৰা প্ৰদানৰ দাবী উত্থাপন কৰা হৈছিল। বৰ্তমান বজাৰত ১, ২, ৫, ১০ আৰু ২০ টকীয়া মুদ্ৰা প্ৰচলিত হৈ আছে যদিও ৫০ টকীয়া মুদ্ৰা নাই।

মানুহে মুদ্ৰাতকৈ নোট বেছি ভাল পায়

চৰকাৰে আদালতত জনোৱা মতে, ২০২২ চনত ৰিজাৰ্ভ বেংকে এক সমীক্ষা চলাইছিল, য’ত প্ৰকাশ পাইছিল যে মানুহে ১০ আৰু ২০ টকীয়া মুদ্ৰাতকৈ অধিক নোট পছন্দ কৰে। এই সমীক্ষাত প্ৰকাশ পাইছে যে মুদ্ৰাৰ গধুৰ ওজন আৰু বৃহৎ আকাৰৰ বাবে মানুহৰ মাজত অশান্তিৰ সৃষ্টি হয়। এই কাৰণতে এই মুহূৰ্তত চৰকাৰে ৫০ টকীয়া মুদ্ৰা প্ৰৱৰ্তনৰ সিদ্ধান্ত লোৱা নাই।

কেৱল চাহিদা অনুসৰি এটা মুদ্ৰা তৈয়াৰ কৰা নহয়

চৰকাৰে কয় যে যিকোনো মূল্যৰ মুদ্ৰা প্ৰৱৰ্তন কৰাৰ আগতে বহু কথাৰ প্ৰতি লক্ষ্য ৰাখিব লাগে। যেনে- মানুহে ইয়াক গ্ৰহণ কৰিবলৈ সাজু হৈছে নে নাই, দৈনন্দিন লেনদেনত উপযোগী হ’ব নে নাই ইত্যাদি।

আবেদনখনৰ দাবী কি আছিল?

আৱেদনখনত কোৱা হৈছে যে অধিকাংশ নোট এনেদৰে ডিজাইন কৰা হৈছে যাতে দৃষ্টিশক্তিহীন লোকে চিনি পাব পাৰে, কিন্তু ৫০ টকীয়া নোটখনত তেনে কোনো বৈশিষ্ট্য নাই। সেইবাবেই আবেদনকাৰীসকলে ৫০ টকীয়া মুদ্ৰা এটা প্ৰৱৰ্তনৰ দাবী জনাইছিল যাতে দৃষ্টিহীন লোকেও সহজে চিনি পায়।

RBI ৰ MANI app সহায়ক

চৰকাৰে আদালতত কয় যে ৰিজাৰ্ভ বেংকে MANI নামৰ এটা মোবাইল এপ তৈয়াৰ কৰিছে, যাৰ সহায়ত দৃষ্টিহীন লোকে নোটৰ মূল্য চিনি পাব পাৰে। এই এপটোৰ জৰিয়তে ব্যৱহাৰকাৰীয়ে নোটত লিখা মূল্যৰ পৰিমাণ শুনিব পাৰিব। এইদৰে চৰকাৰে স্পষ্ট কৰি দিছে যে বৰ্তমান সময়ত ৫০ টকীয়া মুদ্ৰা প্ৰৱৰ্তনৰ প্ৰয়োজন নাই।