কৰ্মচাৰীৰ পেঞ্চনৰ পৰা ক্ৰেডিট কাৰ্ডলৈ…ছেপ্টেম্বৰ মাহত সলনি হ’ব বহুকেইটা নিয়ম

সোমবাৰৰ পৰা আৰম্ভ হ’ব ছেপ্টেম্বৰ। প্ৰতিমাহে বেংক, বিত্তীয় প্ৰতিষ্ঠান আৰু চৰকাৰে একাধিক নিয়ম সলনি কৰে। সাধাৰণ জনতাৰ বাবে সেই সকলোবোৰ নিয়ম জনাটো প্ৰয়োজনীয়, অন্যথা সমস্যাৰ সন্মুখীন হ’বলগীয়া হয়। এই ছেপ্টেম্বৰ মাহৰ পৰা এনে একাধিক নিয়ম সলনি হ’ব। সেইবোৰ কি জানি লওক-

১) আই টি আৰ ফাইলিং-

আয়কৰ দাখিলৰ শেষ তাৰিখ আছিল ৩০ জুলাই।আয়কৰ বিভাগে সেই সময়সীমা ১৫ ছেপ্টেম্বৰলৈ বৃদ্ধি কৰিলে।কৰদাতাসকলৰ বাবে এইটো আছিল এক ডাঙৰ সুবিধা। সেই সময়সীমা এই ছেপ্টেম্বৰ মাহতে শেষ হ’ব৷ যিসকলে এতিয়াও আয়কৰ দাখিল কৰা নাই, তেওঁলোকে ১৫ ছেপ্টেম্বৰৰ ভিতৰত দাখিল কৰিব লাগিব।যিসকলক একাউণ্ট অডিটৰ প্ৰয়োজন, তেওঁলোকে ৩১ অক্টোবৰৰ পূৰ্বে আইটিআৰ দাখিল কৰিব লাগিব।

২) ইউ পি এছৰ সময়সীমা-

কেন্দ্ৰীয় চৰকাৰৰ কৰ্মচাৰীৰ বাবে এয়া গুৰুত্বপূৰ্ণ খবৰ। যিসকল ৰাষ্ট্ৰীয় পেঞ্চন ব্যৱস্থা (এনপিএছ)ৰ অধীনত আছে, তেওঁলোকে ইচ্ছা কৰিলে ইউনিফাইড পেঞ্চন আঁচনি (UPS)লৈ যাব পাৰে। যদিও এই সুবিধা ৩০ জুনলৈকে উপলব্ধ আছিল, পিছলৈ ইয়াৰ বৈধতা ৩০ ছেপ্টেম্বৰলৈ বৃদ্ধি কৰা হয়।

৩) ভাৰতৰ ডাকসেৱাত পৰিবৰ্তন

ভাৰতীয় ডাক বিভাগত এটা ডাঙৰ পৰিৱৰ্তন আহি আছে। ঘৰুৱা পঞ্জীয়নভুক্ত পদ স্পীড ডাক সেৱালৈ সলনি কৰাৰ সিদ্ধান্ত গ্ৰহণ কৰিছে ডাক বিভাগে। এই নিয়ম ১ ছেপ্টেম্বৰৰ পৰা কাৰ্যকৰী হ’ব।এতিয়াই যদি কোনোবাই ইণ্ডিয়া পোষ্টৰ জৰিয়তে পঞ্জীয়নভুক্ত পোষ্ট পঠিয়াব বিচাৰে তেন্তে স্পীড ডাকযোগে ডেলিভাৰী কৰা হ’ব।

৪) ক্ৰেডিট কাৰ্ডৰ নিয়মৰ পৰিৱৰ্তন-

১ ছেপ্টেম্বৰৰ পৰা ক্ৰেডিট কাৰ্ডৰ নিয়মতো পৰিৱৰ্তন হ’ব। ভাৰতীয় ষ্টেট বেংকে ক্ৰেডিট কাৰ্ডত ৰিৱাৰ্ডৰ ব্যৱস্থা সলনি কৰিছে। এতিয়াৰ পৰা যদি আপুনি কোনো ধৰণৰ ডিজিটেল গেমিং বা চৰকাৰী ৱেবছাইটৰ লেনদেন কৰে তেন্তে তাৰ বাবে আপুনি ৰিৱাৰ্ড নাপাব।

৫) ৰূপত হলমাৰ্কিং-

এতিয়াৰ পৰা সোণৰ দৰে ৰূপৰ গহনাতো বিশুদ্ধতাৰ চিন থাকিব। ৰূপৰ হলমাৰ্ক কৰাটো বাধ্যতামূলক হ’ব বুলি চৰকাৰে সিদ্ধান্ত লৈছে। ১ ছেপ্টেম্বৰৰ পৰা কাৰ্যকৰী হ’ব এই নিয়ম।