আপোনাৰ পেঞ্চনৰ টকা আন কাৰোবাৰ একাউণ্টত সোমাইছে নেকি, কি কৰিব?

ব্যক্তিগত খণ্ডৰ কৰ্মচাৰীৰ দৰমহাৰ এটা অংশ জমা হয় এম্প্লয়িজ প্ৰভিডেণ্ট ফাণ্ড (EPF) বা কৰ্মচাৰী ভৱিষ্য নিধিত। আৰু ইয়াৰ কিছু অংশ পুনৰ পেঞ্চন ফাণ্ড বা ইপিএছ (EPS)ৰ অধীনত জমা কৰা হয়। কিন্তু আপোনাৰ পেঞ্চনৰ ধন সঠিক ঠাইত জমা হৈছে নে? বহুক্ষেত্ৰত আপুনি যিটো কোম্পানীত কাম কৰে, সেই কোম্পানীৰ ভুলৰ বাবে আপুনি লাভ কৰা ধন আন কাৰোবাৰ একাউণ্টত জমা হয়। সেই সমস্যা সমাধানৰ বাবে ইপিএফঅ’ই এতিয়া কঠোৰ নিৰ্দেশনা জাৰি কৰিছে।

এম্প্লয়িজ প্ৰভিডেণ্ট ফাণ্ড অৰ্গেনাইজেশ্যনে (EPFO) লক্ষ্য কৰিছে যে বহু ক্ষেত্ৰত ইপিএছৰ ধন বহু কৰ্মচাৰীৰ বাবে জমা কৰা হৈছে যিসকলৰ ইয়াৰ অধিকাৰ নাই। বহু ক্ষেত্ৰত আকৌ বাদ দিয়া হৈছে এই ধনৰ অধিকাৰী একাংশ কৰ্মচাৰীক। ইয়াৰ ফলত সৃষ্টি হৈছে আইনী জটিলতাৰ। অৱসৰৰ সময়ত যাতে খৰখেদা নহয়, তাৰ বাবে ইপিএফঅ’ই লৈছে নতুন পদক্ষেপ।

ভুল হ’লে কি হ’ব?

যদি আপোনাৰ ধন আন কাৰোবাৰ একাউণ্টত জমা হয়, তেন্তে সেই ভুলটো শুধৰাই দিব লাগিব। ইপিএফঅ’ই কয় যে এই সংশোধন দুটা ধৰণে কৰা হ’ব।

যদি ভুলতে পেঞ্চন জমা হয়: যদি আপুনি পেঞ্চনৰ বাবে যোগ্য নহয় তেন্তে সেই ধন ১০ নম্বৰ একাউণ্টৰ পৰা ১ নম্বৰ একাউণ্টলৈ স্থানান্তৰ কৰা হ’ব। এই ক্ষেত্ৰত আপোনাৰ পেঞ্চন সেৱাৰ ৰেকৰ্ড মচি পেলোৱা হ’ব।

যদি পেঞ্চন জমা নহয়: যদি আপুনি যোগ্য কিন্তু ধন জমা কৰা নাই, তেন্তে সেই ধন আপোনাৰ প্ৰভিডেণ্ট ফাণ্ড একাউণ্টৰ পৰা কৰ্তন কৰি পেঞ্চন ফাণ্ডলৈ প্ৰেৰণ কৰা হ’ব। ইয়াৰ ফলত আপোনাৰ পেঞ্চন সেৱাৰ ৰেকৰ্ড আপডেট হ’ব।

এই নিয়ম কেৱল সাধাৰণ কোম্পানীসমূহৰ ক্ষেত্ৰতেহে যে প্ৰযোজ্য হ’ব এনে নহয়। যিসকলৰ নিজাকৈ প্ৰভিডেণ্ট ফাণ্ড ট্ৰাষ্ট আছে তেওঁলোকৰ ক্ষেত্ৰতো ই প্ৰযোজ্য হ’ব। অৱশ্যে এই সমগ্ৰ প্ৰক্ৰিয়াটো সুতৰ হাৰ গণনাৰ ওপৰত ভিত্তি কৰি হ’ব।

বহু সময়ত পেঞ্চন দাবী কৰাৰ সময়ত ফাইলটো আবদ্ধ হৈ পৰে। এতিয়া এই নতুন ব্যৱস্থাই নোহোৱা কৰিব সেই বাধা। বিশেষজ্ঞসকলৰ মতে তথ্য সঠিক হ’লে শীঘ্ৰে ধন পোৱা সম্ভৱ। ভৱিষ্যতৰ চিন্তা অৰ্থাৎ অৱসৰৰ চিন্তা কম কৰিবলৈ এতিয়াই ৱেবছাইটটো চাওক। ইপিএফঅ’ৰ এই নতুন নিয়মে সাধাৰণ কৰ্মচাৰীসকলক যথেষ্ট সকাহ দিব।