বছৰি ১৫ হাজাৰ টকা দিব EPFO য়ে, কৰ্মচাৰীৰ বাবে নতুন আঁচনি কেন্দ্ৰৰ !

দেশৰ বিভিন্ন খণ্ডত কৰ্মৰত কৰ্মচাৰীৰ বাবে ভাল খবৰ। কৰ্মচাৰীৰ আৰ্থিক সকাহৰ বাবে নতুন আঁচনি আৰম্ভ কৰিবলৈ আগবাঢ়িছে EPFO(Employees Provident Fund Organization)। উল্লেখ্য যে, কেন্দ্ৰীয় বিত্তমন্ত্ৰীয়ে ২০২৪-২৫ চনৰ কেন্দ্ৰীয় বাজেটত উৎপাদন আৰু অন্যান্য খণ্ডত কৰ্মসংস্থাপন সৃষ্টিৰ বাবে প্ৰতিশ্ৰুতি দিছিল। ইয়াৰ ওপৰত গুৰুত্ব প্ৰদান কৰিয়ে যুৱক-যুৱতীসকলৰ কৰ্মক্ষমতা বৃদ্ধিৰ বাবে কেন্দ্ৰই এনে আঁচনি আৰম্ভ কৰিবলৈ ওলাইছে।

ইতিমধ্যে কেন্দ্ৰীয় কেবিনেটে এই ক্ষেত্ৰত ৯৯,৪৪৬ কোটি টকাৰ আঁচনিত অনুমোদন জনাইছে। এই আঁচনিৰ সুবিধা ১ কোটি ৯২ লাখ লোকে লাভ কৰিবলৈ গৈ আছে বুলি কেন্দ্ৰই আশা কৰিছে। অৱশ্যে এই আঁচনিয়ে দুবছৰত মুঠ ৩ কোটি ৫০ লাখতকৈ অধিক চাকৰিৰ সৃষ্টিৰ বাবে উৎসাহিত কৰিব বুলি শ্ৰম মন্ত্ৰালয়ে আশা প্ৰকাশ কৰিছে।

২০২৫ চনৰ ১ আগষ্টৰ পৰা আৰম্ভ হ’ব এই আঁচনি । আৰু এই আঁচনিখন ২০২৭ চনৰ ৩১ জুলাইত শেষ হ’ব।

এই আঁচনিৰ সুবিধা কোনে পাব?

যিকোনো সংস্থাত কৰ্মৰত কৰ্মচাৰীক যাৰ বাৰ্ষিক দৰমহা ১ লাখ টকাতকৈ কম হ’ব তেওঁলোকক ১৫ হাজাৰ টকা দুটা কিস্তিত দিয়া হ’ব। ইয়াৰ উপৰিও এই আঁচনিৰ অধীনত EPFO ত পঞ্জীয়নভুক্ত কোম্পানীসমূহেও নতুন কৰ্মচাৰী নিয়োগ কৰিলে ২ বছৰৰ বাবে প্ৰতিমাহে সৰ্বাধিক ৩ হাজাৰ টকা লাভ কৰিব। অৱশ্যে উৎপাদন খণ্ডৰ বাবে এই আঁচনিৰ সময়সীমা আৰু ২ বছৰলৈ বৃদ্ধি কৰিব পৰা যাব বুলিও কেন্দ্ৰীয় চৰকাৰে জানিবলৈ দিছে।