গ্ৰাহকলৈ বৃহৎ সকাহ, হ্ৰাস পালে গেছ চিলিণ্ডাৰৰ দামঃ কিমান হ’ব নতুন মূল্য?

মাহৰ শেষ দিনটোত দেশবাসীয়ে লাভ কৰিছে এক উপহাৰ। গ্ৰাহকক কিছু সকাহ প্ৰদান কৰি তেল কোম্পানীসমূহে বাণিজ্যিক এল পি জি গেছ চিলিণ্ডাৰৰ মূল্যত বৃহৎ পৰিৱৰ্তন আনিছে। ১ জুনৰ পৰা কাৰ্যকৰী হোৱাকৈ ১৯ কেজি গেছ চিলিণ্ডাৰৰ মূল্য ২৪ টকা হ্ৰাস কৰিছে তেল কোম্পানীসমূহে। বাণিজ্যিক চিলিণ্ডাৰৰ মূল্য হ্ৰাসে ব্যৱসায় চলোৱাৰ বাবে গেছৰ ওপৰত বহু পৰিমাণে নিৰ্ভৰশীল লোকসকলক যথেষ্ট সকাহ প্ৰদান কৰিব বুলি আশা কৰা হৈছে।

ইয়াৰ পূৰ্বে যোৱা ১ মে’ত বাণিজ্যিক গেছ চিলিণ্ডাৰৰ মূল্য ১৫ টকা হ্ৰাস কৰা হৈছিল যদিও ঘৰুৱা গেছ চিলিণ্ডাৰৰ মূল্যৰ কোনো পৰিৱৰ্তন হোৱা নাছিল। এপ্ৰিল মাহত ১৭৬২ টকাত বাণিজ্যিক এল পি জি চিলিণ্ডাৰ উপলব্ধ হৈছিল। শনিবাৰে তেল কোম্পানীসমূহে বাণিজ্যিক চিলিণ্ডাৰৰ মূল্য হ্ৰাস কৰাৰ কথা ঘোষণা কৰিছে।

এই নতুন সিদ্ধান্ত ১ জুন, দেওবাৰৰ পৰা সমগ্ৰ দেশত কাৰ্যকৰী হ’ব। ইয়াৰ পিছত এতিয়া দেশৰ ৰাজধানী দিল্লীত ১৯ কেজিৰ এটা বাণিজ্যিক এল পি জি চিলিণ্ডাৰ ১৭২৩.৫০ টকাত উপলব্ধ হ’ব। বাণিজ্যিক চিলিণ্ডাৰৰ এই মূল্য হ্ৰাস ব্যৱসায়ীসকলৰ বাবে স্বাভাৱিকতেই এক সকাহৰ খবৰ। ইয়াৰ ফলত ব্যৱসায়ীসকলৰ খৰচ যথেষ্ট হ্ৰাস পাব বুলি আশা কৰা হৈছে।

তেল কোম্পানীসমূহৰ এই সিদ্ধান্তই অৰ্থনীতিতো ইতিবাচক প্ৰভাৱ পেলাব পাৰে। বাণিজ্যিক চিলিণ্ডাৰ বেছিভাগেই হোটেল, ৰেষ্টুৰেণ্ট আৰু অন্যান্য বাণিজ্যিক প্ৰতিষ্ঠানত ব্যৱহাৰ কৰা হয়। মূল্য হ্ৰাস পোৱাৰ বাবে এই ব্যৱসায়সমূহৰ পৰিচালনা ব্যয় হ্ৰাস পাব। ইয়াৰ দ্বাৰা ব্যৱসায়ীসকলৰ অৰ্থনৈতিক কাৰ্যকলাপ কিছু বৃদ্ধি পোৱাৰ সম্ভাৱনা আছে।