নিশা সম-জিলা কাৰ্যালয়ত বিজেপি কৰ্মী ! সঁচাকৈ ফৰ্ম ৭ৰ অপব্যৱহাৰ হৈছে নেকি ? আৰক্ষীত এজাহাৰ কংগ্ৰেছ কৰ্মীৰ

শুকুৰবাৰে অসম কংগ্ৰেছৰ এগৰাকী কৰ্মীয়ে বকো-ছয়গাঁও বিধানসভা সমষ্টিত ভোটাৰ তালিকা পুনৰীক্ষণৰ লগত জড়িত স্থানীয় বিজেপি নেতা আৰু চৰকাৰী বিষয়াৰ বিৰুদ্ধে আৰক্ষীৰ এজাহাৰ দাখিল কৰে। অনুমতি অবিহনে নাম ডিলিট আৰু যোগ কৰাৰ চেষ্টা কৰাৰ অভিযোগ উত্থাপন কৰে কংগ্ৰেছৰ কৰ্মীগৰাকীয়ে। বকো ব্লক কংগ্ৰেছ কমিটীৰ সভাপতি তুলেশ্বৰ ৰাভাই বকো থানাত দাখিল কৰা এজাহাৰত দাবী কৰিছে যে, বৃহস্পতিবাৰে বিজেপিৰ নেতাসকলে স্থানীয় দুজনমান ব্যক্তি আৰু কাৰ্যালয়ৰ কৰ্মচাৰীৰ সৈতে মিলি নিৰ্বাচনী তালিকা ইফাল-সিফাল কৰিছিল।

তেওঁ অভিযোগ কৰে যে, তেওঁলোকে গধূলিৰ পিছত বকোৰ সম-জিলা আয়ুক্তৰ কাৰ্যালয়ৰ নিৰ্বাচনী শাখাত প্ৰৱেশ কৰিছিল। তেওঁলোকে চৰকাৰী পাছৱৰ্ড ব্যৱহাৰ কৰি ভোটাৰ তালিকা পুনৰীক্ষণ পৰ্টেলত প্ৰৱেশ কৰি ফৰ্ম ৭ ৰ তথ্য ব্যৱহাৰ কৰি নাম ডিলিট কৰা আৰু অন্তৰ্ভুক্ত কৰাৰ চেষ্টা কৰা দেখা গৈছিল।

প্ৰ-পত্ৰ ৭ ব্যৱহাৰ কৰি তিনিটা কাৰণৰ(স্থায়ীভাৱে স্থানান্তৰিত, ইতিমধ্যে নাম পঞ্জীয়ন কৰা বা ভাৰতীয় নাগৰিক নহয়) ভিতৰত যিকোনো এটা কাৰণত নিজৰ নাম কৰ্তন কৰিবলৈ অনুৰোধ কৰিব পাৰে।

একেদৰে সেই সমষ্টিৰ যিকোনো ভোটাৰে পাঁচটা কাৰণৰ(মৃত্যু, নাবালক, অনুপস্থিত/ স্থায়ীভাৱে স্থানান্তৰিত, ইতিমধ্যে নাম পঞ্জীয়ন কৰা, বা ভাৰতীয় নাগৰিক নহয়) যিকোনো এটাৰ ভিত্তিত নাম বাদ পৰাৰ বাবে আবেদন কৰিব পাৰে। নাম বাদ পৰাৰ পূৰ্বে ফৰ্ম ৭ৰ আবেদনৰ ভিত্তিত কৰ্তৃপক্ষই শুনানি গ্ৰহণ কৰে।

ৰাভাই কয় যে, এই কথিত গোপন কাৰ্যকলাপসমূহ নিশা প্ৰায় ৮.৩০ বজাত সাংবাদিক আৰু স্থানীয় লোকে ধৰা পেলাইছিল। বিষয়টোৰ নিৰপেক্ষ তদন্ত আৰু জড়িতসকলৰ বিৰুদ্ধে কঠোৰ ব্যৱস্থা গ্ৰহণৰ দাবী জনায় কংগ্ৰেছ নেতাগৰাকীয়ে।

তেওঁৰ এজাহাৰত জিলা পৰিষদৰ সদস্য তথা দক্ষিণ কামৰূপ জিলা বিজেপিৰ সাধাৰণ সম্পাদক প্ৰহ্লাদ বিশ্বাস, দক্ষিণ কামৰূপ জিলা বিজেপিৰ সম্পাদক মৃণময় বড়ো, দক্ষিণ কামৰূপ জিলা বিজেপি এছটি মৰ্চাৰ সম্পাদক বুদ্ধেশ্বৰ ৰাভা, আৰু স্থানীয় গেছ এজেন্সীৰ দুজন কৰ্মচাৰীৰ লগতে নাম প্ৰকাশ নকৰা নিৰ্বাচনী বিষয়াৰ নাম উল্লেখ কৰে।