অৱসান ঘটিল নেকি ৰাছিয়া-ইউক্ৰেইনৰ ৩ বছৰীয়া যুদ্ধৰ? শান্তি বাৰ্তা বিলাইছে এগৰাকী বিশেষ ব্যক্তিয়ে…

তিনি বছৰ ধৰি চলি থকা ৰাছিয়া-ইউক্ৰেইন যুদ্ধৰ সন্দৰ্ভত আন্তঃৰাষ্ট্ৰীয় পৰ্যায়ত আশাৰ এক নতুন কিৰণ দেখা গৈছে। শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ কূটনৈতিক পদক্ষেপ আৰু তেওঁৰ বিশেষ দূত ষ্টিভ উইটকফৰ ইতিবাচক বক্তব্যই এই তীব্ৰ যুদ্ধৰ অন্ত পৰাৰ পথত নেকি বুলি জল্পনা-কল্পনাৰ সৃষ্টি হৈছে। ৰাছিয়া-ইউক্ৰেইনৰ আলোচনাৰ আঁৰত উইটকফক এক গুৰুত্বপূৰ্ণ মুখ হিচাপে গণ্য কৰা হৈছে। তেওঁ নিজেই ইংগিত দিছে যে ট্ৰাম্প আৰু পুটিনৰ মাজত আলোচনা সফল হ’ব পাৰে আৰু এতিয়ালৈকে স্থবিৰ হৈ থকা আলোচনাক বহু গতি প্ৰদান কৰিব পাৰে।

সোমবাৰে ট্ৰাম্পে ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু ইউক্ৰেইনৰ ৰাষ্ট্ৰপতি ভ’ল’ডিমিৰ জেলেনস্কিৰ সৈতে পৃথক পৃথক ফোনযোগে বাৰ্তালাপ কৰে। ৰাছিয়া-ইউক্ৰেইন যুদ্ধৰ তিনি বছৰৰ পাছত এইবাৰেই আমেৰিকাই দুয়োখন দেশৰ সৈতে ইমান প্ৰত্যক্ষ আৰু সুনিৰ্দিষ্ট কূটনীতি গ্ৰহণ কৰিছে। পুটিনৰ সৈতে ট্ৰাম্পৰ বাৰ্তালাপ প্ৰায় দুঘণ্টা ধৰি চলিছিল, য’ত শান্তি চুক্তিৰ সম্ভাৱনা আৰু যুদ্ধবিৰতিৰ চৰ্তসমূহৰ বিষয়ে বিতংভাৱে আলোচনা কৰা হৈছিল। ইয়াৰ পূৰ্বে ট্ৰাম্পে জেলেনস্কিৰ সৈতেও ফোনযোগে কথা পাতিছিল, যিটো এতিয়া সমন্বিত শান্তিৰ প্ৰচেষ্টা হিচাপে দেখা গৈছে।

ষ্টিভ উইটকফ কোন?

ষ্টিভ উইটকফ হৈছে ট্ৰাম্পৰ বিশেষ দূত আৰু তেওঁক শান্তি প্ৰক্ৰিয়াৰ পথ প্ৰদৰ্শক মূল ব্যক্তি হিচাপে গণ্য কৰা হয়। আমেৰিকাৰ সংবাদ মাধ্যমক দিয়া এক বিবৃতিত তেওঁ কয়, “মই আশাবাদী যে এই আহ্বান অতি সফল হ’ব আৰু আলোচনাত থকা বাধাসমূহ দূৰ হ’ব। উইটকফৰ বক্তব্যৰ কিছু সময়ৰ পিছতে আমেৰিকা আৰু ৰাছিয়া প্ৰশাসনৰ পৰা আলোচনা সন্দৰ্ভত ইতিবাচক সংকেত আহিবলৈ ধৰিছে।”

ৰাছিয়াৰ ৰাষ্ট্ৰপতিয়ে কি ক’লে?

আলোচনাৰ পিছত ৰাছিয়াৰ ৰাষ্ট্ৰপতি পুটিনে এক বিবৃতি প্ৰকাশ কৰি কয়, “এই আলোচনা মুকলি, সৎ আৰু উপযোগী।” তেওঁ কয়, ঠৰাছিয়া শান্তি চুক্তিৰ বাবে সাজু, কিন্তু ইয়াৰ বাবে ব্যৱহাৰিক সমাধান আৰু স্পষ্ট চৰ্তৰ সিদ্ধান্ত লোৱা উচিত।ঠ পুটিনে এই কথাও স্বীকাৰ কৰে যে আলোচনা এতিয়া সঠিক দিশত আগবাঢ়িছে আৰু ট্ৰাম্পৰ হস্তক্ষেপে দুয়োখন দেশৰ মাজত আলোচনাক পুনৰ শুদ্ধ পথলৈ আনিব পাৰে।

হোয়াইট হাউছে কি ক’লে?

আলোচনা সন্দৰ্ভত  আশাবাদী মনোভাৱ দেখুৱাইছে হোৱাইট হাউছে। ট্ৰাম্প প্ৰশাসনে এই আহ্বানক শান্তিৰ দিশত এক নিৰ্ণায়ক পদক্ষেপ বুলি অভিহিত কৰে। তেওঁ লগতে কয় যে যদি ৰাছিয়াই আলোচনাক গুৰুত্বসহকাৰে লয় আৰু ইউক্ৰেইনেও নমনীয়তা দেখুৱায় তেন্তে অতি সোনকালে সীমিত যুদ্ধবিৰতি সম্ভৱ হ’ব পাৰে। অৱশ্যে আমেৰিকাই স্পষ্ট কৰি দিছে যে চূড়ান্ত চুক্তিৰ পূৰ্বে সকলো পক্ষৰ নিৰাপত্তাৰ চিন্তাধাৰা বিবেচনা কৰা হ’ব।

এতিয়া সকলোৰে চকু ট্রাম্পৰ এই কূটনৈতিক সক্ৰিয়তাই কিবা প্ৰকৃত ফলাফল দিব নে নাই তাৰ ওপৰত আছে। এতিয়া পুটিন আৰু জেলেনস্কিয়ে চুক্তিৰ দিশে আগবাঢ়িবনে? আৰু আটাইতকৈ ডাঙৰ প্ৰশ্ন। সঁচাকৈয়ে ৰাছিয়া-ইউক্ৰেইন যুদ্ধ শেষ হ’বলৈ ওলাইছে নেকি? উইটকফৰ বক্তব্য আৰু আলোচনাৰ পিছত পৰিৱৰ্তিত আন্তঃৰাষ্ট্ৰীয় পৰিৱেশে নিশ্চিতভাৱে আশাৰ সঞ্চাৰ কৰিছে যদিও সুনিৰ্দিষ্ট ফলাফল লাভৰ বাবে আৰু কিছু পদক্ষেপ গ্ৰহণ কৰিবলগীয়া আছে।