টোপনি হৰিছে ট্ৰাম্পৰ! একেখন মঞ্চত ভাৰত, ৰাছিয়া আৰু চীন….
বৰ্তমান চীন ভ্ৰমণত আছে ভাৰতৰ প্ৰধানমন্ত্ৰী নৰেন্দ্ৰ মোদী। ইফালে চীনত উপস্থিত হৈছৈ ৰাছিয়াৰ ৰাষ্ট্ৰপতি ভ্লাদিমিৰ পুটিন। এতিয়া সমগ্ৰ বিশ্বৰ দৃষ্টি যেন চীনৰ ওপৰত। কিয়নো একেখন মঞ্চত তিনি মহাশক্তিৰ মিলনে কিবা ডাঙৰ সলনি কৰিব পাৰে।
বৰ্তমান চীন ভ্ৰমণত ব্যস্ত আছে প্ৰধানমন্ত্ৰী নৰেন্দ্ৰ মোদী। SCO শীৰ্ষ সন্মিলনৰ পূৰ্বে দেওবাৰে মোদীয়ে চীনৰ ৰাষ্ট্ৰপতি ছি জিনপিঙৰ সৈতে বিশেষ বৈঠকত মিলিত হয়। এই সময়চোৱাত চীনৰ ৰাষ্ট্ৰপতিগৰাকীয়ে কয় যে, ভাৰত আৰু চীনৰ সম্পৰ্ক দীৰ্ঘম্যাদী দৃষ্টিভংগী আৰু কৌশলেৰে চোৱা উচিত। দুয়োখন দেশে সুদৃঢ় আৰু সুস্থিৰ সম্পৰ্ক বজাই ৰাখিবলৈ চিন্তাশীলভাৱে কাম কৰিব লাগে।
ইয়াৰোপৰি আমেৰিকাৰ ৰাষ্ট্ৰপতি ড’নাল্ড ট্ৰাম্পৰ একপক্ষীয় নীতিক সমালোচনা কৰি তেওঁ কয় যে, ভাৰত আৰু চীনে একেলগে বহুপক্ষীয়তা অৰ্থাৎ বিশ্বৰ বহু দেশৰ সৈতে কাম কৰাৰ ব্যৱস্থা বজাই ৰাখিব লাগে।
দুয়োখন দেশে বহুপক্ষীয়তাক গুৰুত্ব দিব লাগিব
চীনৰ ৰাষ্ট্ৰপতিগৰাকীয়ে কয় যে, চীন আৰু ভাৰতে মিলি এনে এখন পৃথিৱী সৃষ্টি কৰিব লাগে য’ত বহু দেশ সমান হ’ব আৰু সকলোৰে মাজত ভাল তথা গণতান্ত্ৰিক সম্পৰ্ক থাকিব। ইয়াৰ লগতে দুয়োখন দেশে এছিয়া আৰু সমগ্ৰ বিশ্বৰ শান্তি তথা উন্নয়নৰ দায়িত্ব গ্ৰহণ কৰিব লাগে। আমি সকলো ক্ষেত্ৰতে বহুপক্ষীয়তা পালন কৰা উচিত।
উল্লেখ্য যে, প্ৰায় ১০ মাহৰ পাছত মোদী আৰু জিনপিঙৰ মাজত এই বৈঠক অনুষ্ঠিত হয়। ইয়াৰ বিপৰীতে ৭ বছৰ পাছত মোদীৰ এয়া প্ৰথম চীন ভ্ৰমণ। বিভিন্ন কেইটা বিষয়ৰ বাবে মোদীৰ এই ভ্ৰমণে বিশ্বৰ দৃষ্টি কাঢ়িবলৈ সক্ষম হৈছে। কিয়নো বিগত সময়চোৱাত বিশ্বৰ ৰাজনীতিৰ বহু পৰিবৰ্তন হৈছে। আমেৰিকাই ভাৰতৰ ওপৰত ৫০ শুল্ক আৰোপ কৰাৰ বিপৰীতে চীন-ভাৰতৰ সম্পৰ্কৰ উন্নতি ঘটিছে।
উল্লেখ্য যে, ২০২০ চনৰ জুন মাহৰ গলৱান উপত্যকাত হোৱা সংঘৰ্ষৰ পাছতে দুই দেশৰ মাজত উত্তেজনা বৃদ্ধি পাইছিল। বহু ক্ষেত্ৰত নিষেধাজ্ঞা আৰোপ কৰা হৈছিল। কিন্তু ইয়াৰ মাজতে ট্ৰাম্পৰ শুল্ক ভাবুকিৰ পাছত দুই দেশৰ মাজৰ সম্পৰ্কৰ উন্নতি ঘটিছে। টিয়ানজিনত মোদী আৰু জিনপিঙৰ মাজত প্ৰায় ১ ঘন্টা ধৰি বৈঠকক অনুষ্ঠিত হয়। এই বৈঠকত মোদীয়ে সীমান্তত শান্তি আৰু স্থিতিশীলতা, পাৰস্পৰিক সহযোগিতা আৰু সম্পৰ্ক সুদৃঢ় কৰাৰ ওপৰত গুৰুত্ব আৰোপ কৰে।
ইফালে আজি চীনত উপস্থিত হৈছে ৰাছিয়াৰ ৰাষ্ট্ৰপতি ভ্লাদিমিৰ পুটিন। এই তিনি মহাশক্তিৰ মিলনে এতিয়া ভৱিষ্যতে ডাঙৰ কোনো দিশ সলনি হোৱাৰ ইংগিত দিছে। আমেৰিকাৰ লগতে ইউৰোপীয় দেশসমূহে পুটিনৰ বিৰোধিতা কৰি হৈছে। ইফালে ৰাছিয়া, ভাৰত, চীনৰ মিত্ৰতা আৰু অধিক দৃঢ় হৈ পৰিছে। এই সকলোবোৰৰ মাজতে ইউক্ৰেইনৰ ৰাষ্ট্ৰপতি জেলেনেস্কিয়ে বিশ্বাস ৰাখিছে যে মোদীয়ে পুটিনৰ সৈতে কথা পাতিব আৰু ইউক্ৰেইন যুদ্ধৰ শান্তিপূৰ্ণ সমাধান ওলাব। গতিকে সকলোৰে দৃষ্টি এতিয়া চীনৰ ওপৰত।
বিশ্বৰ নেতা, সাধাৰণ জনতাৰ লগতে এই বৈঠকত চকু আছে আমেৰিকাৰ ৰাষ্ট্ৰপতি ট্ৰাম্পৰ। কিয়নো ভাৰত-চীনৰ মিত্ৰতা ট্ৰাম্পৰ বাবে ডাঙৰ আঘাত। ইয়ে আমেৰিকাৰ ৰণকৌশলৰ ডাঙৰ পৰিবৰ্তন যে কৰিব তাত কোনো সন্দেহ নাই। ইফালে ৰাছিয়াৰ ৰাষ্ট্ৰপতিৰ ভাৰত-চীনৰ প্ৰতি সঁহাৰিয়েও ট্ৰাম্পৰ টোপনি যে কাঢ়িছে সেয়া নিশ্চিত। অৱশ্যে এই কৌশলপূৰ্ণ মিত্ৰতাই ভৱিষ্যতে কি দিশ লয় সেয়া শীঘ্ৰেই স্পষ্ট হ’ব পাৰে।
অন্য খবৰ পঢ়কঃ বিদ্যালয়ৰ অগ্নিকাণ্ডৰ পৰা মোদীৰ চীন ভ্ৰমণলৈ, পঢ়ক দিনটোৰ গুৰুত্বপূৰ্ণ খবৰ…
