বিদ্যালয়ৰ অগ্নিকাণ্ডৰ পৰা মোদীৰ চীন ভ্ৰমণলৈ, পঢ়ক দিনটোৰ গুৰুত্বপূৰ্ণ খবৰ…

আজিৰ দিনটোৰ কেইটামান গুৰুত্বপূৰ্ণ খবৰ তলত উল্লেখ কৰা হ’ল-

1. শনিবাৰে নিশা গোৱালপাৰা জিলাৰ দুধনৈ বালিকা উচ্চতৰ মাধ্যমিক বিদ্যালয়ত সংঘটিত ভয়ংকৰ অগ্নিকাণ্ডৰ ঘটনা। ঘটনাস্থলীৰ পৰা দেওবাৰে পুৱা উদ্ধাৰ হয় অগ্নিদগ্ধ মৃতদেহ। জানিব পৰা মতে, মৃতদেহটো বিদ্যালয়খনৰ অস্থায়ী কৰ্মচাৰী বিবেকানন্দ ৰাভাৰ বুলি নিশ্চিত কৰিছে ভাতৃয়ে ৷ তেওঁ সেই স্থানত কিয় উপস্থিত আছিল তাক লৈ উত্থাপন হৈছে প্ৰশ্নৰ। ঘটনা সন্দৰ্ভত আৰক্ষীৰ তদন্ত অব্যাহত। ইফালে আজি ঘটনাৰ বুজ ল’বলৈ বিদ্যালয়ত উপস্থিত হয়  শিক্ষামন্ত্ৰী ডাঃ ৰণোজ পেগু।
2. সমাগত বিটিচি নিৰ্বাচন। তাৰ পূৰ্বে দেওবাৰে UPPL য়ে প্ৰকাশ কৰিছে দ্বিতীয়খন প্ৰাৰ্থীৰ তালিকা। এই তালিকাত ১৬ জন প্ৰাৰ্থীক স্থান দিয়া হৈছে। ইয়াৰ বিপৰীতে অসম গণ পৰিষদেও বিটিচি নিৰ্বাচনৰ বাবে ৪ জনীয়া প্ৰাৰ্থীৰ তালিকা প্ৰকাশ কৰিছে। উল্লেখ্য যে, অহা ২২ ছেপ্টেম্বৰত অনুষ্ঠিত হ’ব বিটিচি নিৰ্বাচনৰ ভোটগ্ৰহণ প্ৰক্ৰিয়া। লগতে নিৰ্বাচনৰ ফলাফল ঘোষণা হ’ব ২৬ ছেপ্টেম্বৰত।
3. অৱশেষত আটক নগাঁও কেন্দ্ৰীয় কাৰাগাৰৰ নিলম্বিত অধীক্ষক মুকুল ভূঞা। শনিবাৰে নিশা চৰকাৰী বাস ভৱনৰ পৰা নগাঁও সদৰ আৰক্ষীয়ে আটক কৰে তেওঁক। অভিযোগ অনুসৰি এইগৰাকী অধীক্ষকৰ ছত্ৰছায়াতে নগাঁও কেন্দ্ৰীয় কাৰাগাৰত চলিছিল অবৈধ ড্ৰাগছৰ বেহা। নগাঁও জিলা আয়ুক্তই শুকুৰবাৰে কাৰাগাৰ পৰিদৰ্শন কৰাৰ পাছত পোহৰলৈ আহিছিল সকলো। বৰ্তমান ঘটনা সন্দৰ্ভত অব্যাহত আছে তদন্ত।
4. দেওবাৰে মন কী বাত অনুষ্ঠানৰ জৰিয়তে দেশবাসীক সম্বোধন কৰে প্ৰধানমন্ত্ৰী নৰেন্দ্ৰ মোদীয়ে। এয়া আছিল মন কী বাতৰ ১২৫ সংখ্যক খণ্ড। এই সময়চোৱাত মোদীয়ে স্বদেশীৰ ওপৰত গুৰুত্বপূৰ্ণ মন্তব্য কৰে। তেওঁ কয় যে, জীৱনৰ প্ৰয়োজনীয় সকলো বস্তু স্বদেশী হব লাগে। স্বদেশী গ্ৰহণ কৰিলে ডাঙৰ পৰিবৰ্তন হ’ব বুলি কয় তেওঁ। ইয়াৰোপৰি দেশৰ প্ৰাকৃতিক দুৰ্যোগ, জম্মু-কাশ্মীৰ আদিকে ধৰি বিভিন্ন বিষয়ৰ ওপৰত তেওঁ মত প্ৰদান কৰে।
5. পুনৰ বাতৰিৰ শিৰোনাম দখল কৰিছে তৃণমূল কংগ্ৰেছৰ সাংসদ মহুৱা মৈত্ৰই। কেন্দ্ৰীয় গৃহমন্ত্ৰী অমিত শ্বাহৰ বিৰুদ্ধে আপত্তিজনক মন্তব্য দিয়াৰ অভিযোগত তেওঁৰ বিৰুদ্ধে ছত্তীশগড়ৰ ৰাজধানী ৰায়পুৰৰ মানা আৰক্ষী থানাত গোচৰ ৰুজু হৈছে। দেওবাৰে এই তথ্য প্ৰদান কৰিছে আৰক্ষীয়ে।
6. বৰ্তমান প্ৰধানমন্ত্ৰী নৰেন্দ্ৰ মোদীৰ চীন ভ্ৰমণে দৃষ্টি কাঢ়িছে বিশ্বৰ। SCO সন্মিলনৰ বাবে চীনত এতিয়া বিশ্বৰ বহু নেতাই ভিৰ কৰিছে। এই সময়চোৱাত মোদীয়ে চীনৰ ৰাষ্ট্ৰপতি ছী জিনপিঙৰ সৈতে বৈঠকত মিলিত হয়। প্ৰায় ১ ঘন্টা ধৰি চলা বৈঠকৰ অন্তত ভাৰত আৰু চীনে কয় যে,দুয়োখন দেশ অংশীদাৰ হয়, প্ৰতিদ্বন্দ্বী নহয়। মতানৈক্যক বিবাদলৈ ৰূপান্তৰ কৰিব নোৱাৰি। উল্লেখ্য যে, এই ভ্ৰমণসূচীয়ে দুই দেশৰ সম্পৰ্ক অধিক উন্নত কৰিব বুলি আশা কৰা হৈছে।
7. মোদীৰ চীন ভ্ৰমণৰ বিৰোধিতা কংগ্ৰেছৰ। একাংশ বিৰোধী দলে কৈছে যে,প্ৰধানমন্ত্ৰী মোদীয়ে গালৱান উপত্যকাত শ্বহীদ হোৱা জোৱানক পাহৰি চীনৰ ৰাষ্ট্ৰপতিৰ লগত হাঁহি হাঁহি হাত মিলাইছে। কংগ্ৰেছে কয় যে, এটা সময়ত নৰেন্দ্ৰ মোদীয়ে চীনৰ অনুচিত কাৰ্যকলাপৰ ওপৰত কঠোৰ ব্যৱস্থা গ্ৰহণ কৰিছিল আৰু এতিয়া হাঁহি হাঁহি হাত মিলাইছে।
8. ফ্ৰান্সৰ ৰাষ্ট্ৰপতি ইমানুৱেল মেক্ৰনে কৈছে যে, যদিহে ৰাছিয়াৰ ৰাষ্ট্ৰপতি ভ্লাদিমিৰ পুটিনে সোমবাৰৰ ভিতৰত জেলেনস্কিৰ সৈতে বৈঠক ঠিক কৰিব নোৱাৰে তেন্তে এয়া প্ৰমাণ হ’ব যে তেওঁ পুনৰবাৰ আমেৰিকাৰ ৰাষ্ট্ৰপতি ড’নাল্ড ট্ৰাম্পৰ সৈতে খেল খেলিছে। উল্লেখ্য যে, ট্ৰাম্পে ৰাছিয়া-ইউক্ৰেইনক শান্তি আলোচনাৰ বাবে ২ সপ্তাহ সময় দিছিল। এই সময় ১ ছেপ্টেম্বৰত সম্পূৰ্ণ হ’ব।
9. ইণ্ডোনেছিয়াৰ ৰাজধানী জাকাৰ্টাকে ধৰি কেইবাখনো চহৰত এসপ্তাহ ধৰি চলি থকা প্ৰতিবাদ এতিয়া হিংসাত্মক ৰূপ ধাৰণ কৰিছে। বহু প্ৰতিবাদকাৰীয়ে বিত্তমন্ত্ৰী মুল্যানী ইন্দ্ৰাৱতীকে ধৰি কেইবাজনো সাংসদৰ ঘৰ লুটপাত কৰে। এনে পৰিস্থিতিত ৰাষ্ট্ৰপতি প্ৰবোবো ছুবিয়ানটোৱে চীন ভ্ৰমণ বাতিল কৰে।

অন্য খবৰ পঢ়কঃ RRC Railway Vacancy 2025: ৰে’লৱেত চাকৰি কৰাৰ সুযোগ! ক’ত, কেনেকৈ আবেদন কৰিব জানক…