আমেৰিকা এৰিবলৈ ২ লাখকৈ টকা…কাৰ বাবে ট্ৰাম্প চৰকাৰৰ এই অফাৰ?

ট্ৰাম্প প্ৰশাসনে এতিয়া দেশৰ অসংগত প্ৰব্ৰজিত শিশুক নিজৰ গৃহভূমিলৈ উভতি যাবলৈ ২ লাখতকৈ অধিক টকাৰ প্ৰস্তাৱ দিছে। অৱশ্যে মেক্সিকোৰ পৰা অহা শিশুৱে যোগ্য নহ’ব। ইমিগ্ৰেচনৰ সমৰ্থকসকলে এই পদক্ষেপক তীব্ৰ সমালোচনা কৰিছে।

আমেৰিকাৰ ৰাষ্ট্ৰপতি ড’নাল্ড ট্ৰাম্পে কাৰ্যভাৰ গ্ৰহণ কৰাৰ পিছৰে পৰা অবৈধ অনুপ্ৰৱেশকাৰীক বিতাড়নৰ ওপৰত জোৰ দি কঠোৰ স্থিতি গ্ৰহণ কৰি আহিছে। ইফালে, ৰয়টাৰৰ এক প্ৰতিবেদন অনুসৰি আমেৰিকাত থকা অকলশৰীয়া প্ৰব্ৰজনকাৰী শিশুসকলক (unaccompanied migrant children)  নিজৰ গৃহভূমিলৈ উভতি যাবলৈ কৈছে ড’নাল্ড ট্ৰাম্প প্ৰশাসনে ।

আমেৰিকা প্ৰশাসনে ২৫০০ ডলাৰ (২,২১,৯১০ টকা) এককালীন সাহায্য আগবঢ়াইছে যাতে তেওঁলোকে নিজ নিজ দেশলৈ উভতি যাবলৈ উৎসাহিত কৰিব পাৰে।

এই ধন কোনে লাভ কৰিব?

শুকুৰবাৰে গৃহ নিৰাপত্তা বিভাগৰ ( DHS) শৰণাৰ্থী পুনৰ সংস্থাপনৰ কাৰ্যালয়ে এই তথ্য প্ৰব্ৰজনকাৰী আশ্ৰয় শিবিৰলৈ প্ৰেৰণ কৰে। পত্ৰখনত উল্লেখ কৰা হৈছে যে ১৪ বছৰ আৰু তাতকৈ অধিক বয়সৰ প্ৰব্ৰজনকাৰী শিশু যিয়ে স্বেচ্ছাই আমেৰিকা এৰি নিজৰ দেশলৈ উভতি যাবলৈ বাছি লয়, তেওঁলোকে এই “Resettlement support Stipend” লাভ কৰিব।

বিষয়াসকলে এই প্ৰস্তাৱ নিশ্চিত কৰে যদিও সঠিক ধনৰাশি ৰাজহুৱাভাৱে প্ৰকাশ কৰা নাই। এই পদক্ষেপ স্বেচ্ছামূলক বিতাড়নক  (voluntary deportation) প্ৰসাৰিত কৰাৰ বাবে ট্ৰাম্প প্ৰশাসনৰ বহল কৌশলৰ অংশ।

চলিত বৰ্ষৰ আৰম্ভণিতে আমেৰিকাৰ গৃহ নিৰাপত্তা বিভাগে (ডি এইচ এছ) আত্মবিতাড়ন কৰিবলৈ বাছি লোৱা প্ৰাপ্তবয়স্ক প্ৰব্ৰজনকাৰীসকলক ১০০০ ডলাৰৰ ষ্টাইপেণ্ডৰ প্ৰস্তাৱ দিছিল। এই পৰিকল্পনাৰ বাবে আমেৰিকাৰ বিদেশ মন্ত্ৰালয়ৰ পৰা ২৫ কোটি ডলাৰৰ পুঁজি স্থানান্তৰৰ জৰিয়তে ধন আগবঢ়োৱা হৈছিল।

ৰয়টাৰৰ মতে, আইচিই (U.S. Immigration and Customs Enforcement)ৰ এজন বিষয়াই জনোৱা মতে, প্ৰথম অৱস্থাত ১৭ বছৰৰ তলৰ শিশুক ২৫০০ ডলাৰৰ প্ৰস্তাৱ দিয়া হৈছে।মেক্সিকোৰ শিশু যোগ্য নহ’ব যদিও এই পৰিকল্পনাত শুকুৰবাৰৰ ভিতৰত ইতিমধ্যে স্বেচ্ছাই আমেৰিকা এৰি যোৱাসকলকো সামৰি লোৱা হ’ব।

পত্ৰখনত উল্লেখ কৰা হৈছে যে এই ধন তেতিয়া পৰিশোধ কৰা হ’ব, যেতিয়া Immigration ন্যায়াধীশে অনুৰোধত অনুমোদন দিব আৰু শিশুটিক নিৰাপদে নিজৰ দেশলৈ ঘূৰাই পঠিওৱা হ’ব।

আমেৰিকাৰ ফেডাৰেল আইন অনুসৰি পিতৃ-মাতৃ বা আইনী অভিভাৱক অবিহনে আমেৰিকাৰ সীমান্তত উপস্থিত হোৱা প্ৰব্ৰজনকাৰী শিশুসকলক “unaccompanied” বুলি গণ্য কৰা হয় আৰু পৰিয়ালৰ সৈতে পুনৰ মিল নোহোৱালৈকে বা পোষক যত্নত ৰখালৈকে চৰকাৰী আশ্ৰয় শিবিৰত ৰখা হয়। বৃহস্পতিবাৰলৈকে ২১০০ৰো অধিক অসংগত শিশু আমেৰিকাৰ স্বাস্থ্য আৰু মানৱ সেৱা বিভাগৰ (এইচ এইচ এছ) জিম্মাত আছিল।

ইফালে ইমিগ্ৰেচনৰ সমৰ্থকসকলে এই পদক্ষেপক তীব্ৰ সমালোচনা কৰে। কিডছ ইন নিড অৱ ডিফেন্সৰ সভানেত্ৰী ৱেণ্ডী ইয়ঙে কয় যে এই ষ্টাইপেণ্ড হৈছে এক “নিষ্ঠুৰ পন্থা” যিয়ে দুৰ্বল শিশুসকলক প্ৰদান কৰা আইনী সুৰক্ষাক ক্ষতিগ্ৰস্ত কৰে।

এক বিবৃতিত তেওঁ কয় যে, “আমেৰিকাত সুৰক্ষা বিচৰা এনে শিশুৱে আমাৰ সুৰক্ষা লাভ কৰা উচিত, তেওঁলোকৰ জীৱন আৰু সুৰক্ষা বিপন্ন কৰা পৰিস্থিতিলৈ ঘূৰি আহিবলৈ বাধ্য হ’ব নালাগে।”