কিয় হঠাতে ৰাজস্থানৰ ৰয়েলছৰ প্ৰশিক্ষক পদ এৰিলে ৰাহুল দ্ৰাবিড়ে! পোহৰলৈ এই ডাঙৰ কাৰণ

শনিবাৰে আকস্মিকভাৱে আই পি এল ফ্ৰেন্সাইজি ৰাজস্থান ৰয়েলছৰ মুখ্য প্ৰশিক্ষক পদ ত্যাগ কৰে ৰাহুল দ্ৰাবিড়ে। বিগত বৰ্ষত ভাৰতীয় দলৰ টি-২০ বিশ্বকাপ জয়ৰ পিছতে জাতীয় দলৰ মুখ্য প্ৰশিক্ষক পদৰ কাৰ্যনিৰ্বাহ অন্ত পৰিছিল দ্ৰাবিড়ৰ। ইয়াৰ পিছতে দ্ৰাবিড়ক ৰাজস্থান ৰয়েলছে মুখ্য প্ৰশিক্ষক পদত অধিষ্ঠিত কৰে। কিন্তু মাত্ৰ এটা ছিজন এই পদত কাৰ্যনিৰ্বাহ কৰাৰ পিছত শনিবাৰে ৰাহুল দ্ৰাবিড়ে স্বেচ্ছাই অব্যাহতি লয়। অৱশ্যে দ্ৰাবিড়ৰ তত্বাৱধানত যোৱা ছিজনৰ আই পি এলত অত্যন্ত হতাশাজনক প্ৰদৰ্শন কৰে ৰাজস্থান ৰয়েলছে।

যোৱা ছিজনত দ্ৰাবিড়ৰ প্ৰশিক্ষকতাত ৰাজস্থান ৰয়েলছে ১৪খন খেলৰ ভিতৰত মাত্ৰ ৪ খন খেলতহে জয়লাভ কৰিছিল। স্বাভাৱিকতেই দ্ৰাবিড়ৰ তত্বাৱধানত ফ্ৰেন্সাইজিটোৱে অধিক সফল প্ৰদৰ্শনৰ আশা কৰা হৈছিল যদিও ব্যৰ্থতাৰ সন্মুখীন হয়। তাৰ পাছতে এতিয়া দ্ৰাবিড়ে ত্যাগ কৰে মুখ্য প্ৰশিক্ষকৰ দায়িত্ব। এতিয়া পোহৰলৈ আহিছে দ্ৰাবিড়ৰ পদত্যাগৰ এক ডাঙৰ কাৰণ।

প্ৰকাশিত খবৰ অনুসৰি, ৰাজস্থান ৰয়েলছ দলৰ ভিতৰচৰাত চলি থকা বাদ-বিবাদৰ বাবে দ্ৰাবিড় কিছু বিচলিত হৈ পৰিছিল৷ বিগত জুলাই মাহত লণ্ডনত ৰাজস্থান ৰয়েলছ মেনেজমেণ্ট আৰু ৰাহুল দ্ৰাবিড়ৰ মাজত আই পি এল ২০২৫ত দলৰ দুৰ্বল প্ৰদৰ্শন সন্দৰ্ভত আলোচনা হৈছিল। খবৰ অনুসৰি দলৰ মেনেজমেণ্টে দ্ৰাবিড়ক এক গুৰুত্বপূৰ্ণ স্থান দিব বিচাৰিছিল যদিও দ্ৰাবিড় ইয়াৰ বাবে সাজু নাছিল।

ইয়াৰ উপৰিও দলটোত চলি থকা বিভাজনমূলক পৰিস্থিতিৰ বাবেও ৰাহুল দ্ৰাবিড় বিচলিত হৈ পৰিছিল বুলি প্ৰকাশ পাইছে। হয়তো এই কাৰণতে মাত্ৰ এটা ছিজনৰ অন্তত ৰাজস্থান ৰয়েলছৰ সৈতে বিচ্ছেদ ঘটে দ্ৰাবিড়ৰ। আই পি এলৰ যোৱা ছিজনৰ সময়ত সঞ্জু চেমছন আৰু ৰাহুল দ্ৰাবিড়ৰ মাজত বিবাদৰ খবৰো পোহৰলৈ আহিছিল। দুয়োৰে মাজত অ’পেনিং সন্দৰ্ভত বিবাদ হোৱা বুলি খবৰ প্ৰকাশ পাইছিল।

অধিনায়ক সঞ্জু চেমছনে ছিজনত নিজেই অ’পেনিং কৰিব বিচাৰিছিল যদিও ৰাহুল দ্ৰাবিড়ে বৈভৱ সূৰ্যবংশীক অ’পেনিং বেটছমেন হিচাপে দলত অন্তৰ্ভুক্ত কৰিব বিচাৰিছিল। এনে দলীয় বিবাদৰ প্ৰভাৱ দলটোৰ ওপৰত স্পষ্টকৈ পৰিছিল। যাৰ ফলত ছিজনত দলটোৰ প্ৰদৰ্শন অত্যন্ত দুৰ্বল আছিল আৰু পইণ্ট তালিকাত নৱম স্থান লাভ কৰিছিল।

ৰাহুল দ্ৰাবিড়ৰ বিদায়ৰ পিছত ৰাজস্থান ৰয়েলছ মেনেজমেণ্টে নতুন প্ৰশিক্ষকৰ সন্ধান আৰম্ভ কৰিছে। খবৰ অনুসৰি, এইক্ষেত্ৰত দলটোৰ প্ৰাক্তন মুখ্য প্ৰশিক্ষক তথা শ্ৰীলংকাৰ প্ৰাক্তন অধিনায়ক কুমাৰ ছাংগাকাৰাৰ নাম সৰ্বাধিক চৰ্চাত আছে। বৰ্তমান ৰাজস্থান ৰয়েলছৰ ডাইৰেক্টৰৰ দায়িত্বত আছে ছাংগাকাৰা। ৰাজস্থানৰ স্বত্বাধিকাৰী মনোজ বদালেই লণ্ডনত এক বৈঠকৰ আহ্বান কৰা বুলি খবৰ প্ৰকাশ পাইছে।

এই বৈঠকত মুখ্য প্ৰশিক্ষক সন্দৰ্ভত সিদ্ধান্ত লোৱা হ’ব বুলি জানিব পৰা গৈছে। অৱশ্যে এই বৈঠকত ছাংগাকাৰা উপস্থিত থাকিব নে নাই, সেয়া এতিয়াও স্পষ্ট হোৱা নাই। এই বৈঠকত উপস্থিত থাকিব পাৰে ভাৰতীয় দলৰ প্ৰাক্তন বেটিং প্ৰশিক্ষক বিক্ৰম ৰাথোড়। বিক্ৰম ৰাথোড়ে দ্ৰাবিড়ৰ সৈতে একেলগে ৰাজস্থান ৰয়েলছৰ প্ৰশিক্ষক দলত যোগ দিছিল। ইফালে ৰাহুল দ্ৰাবিড়ৰ পদত্যাগৰ পিছত বহু ফ্ৰেন্সাইজিয়ে তেওঁৰ সৈতে যোগযোগ কৰা বুলি খবৰ ওলাইছে।