একেৰাহে দুটাকৈ আইচিচি ট্ৰফী জিকোৱাৰ উপহাৰ, ভাৰতীয় দলত স্থান হেৰুৱাব পাৰে এইকেইজন সদস্যই!

ভাৰতীয় ক্ৰিকেট দলে একেৰাহে দুখনকৈ আই চি চি টুৰ্ণামেণ্টত জয়লাভ কৰি সকলো ভাৰতীয় ক্ৰিকেট প্ৰেমীকে আনন্দিত কৰি তুলিছে । এই সফলতাত কেৱল খেলুৱৈয়েই নহয়, সহায়ক কৰ্মচাৰীৰো হাত আছে । এতিয়া ডাঙৰ খবৰটো হ’ল যে বিচিচিআইয়ে হয়তো অতি সোনকালে টীম ইণ্ডিয়াৰ সহায়ক কৰ্মচাৰী হ্ৰাস কৰিব পাৰে ।

এক প্ৰতিবেদন অনুসৰি গৌতম গম্ভীৰ দলৰ সহায়ক কৰ্মচাৰী হ্ৰাস পাব পাৰে । চাৰি বছৰ ধৰি দলটোৰ সৈতে জড়িত ফিল্ডিং প্ৰশিক্ষক টি দিলিপে নিজৰ স্থান হেৰুৱাব পাৰে । একে সময়তে গম্ভীৰ, মৰ্ণ মৰ্কেল, ৰিয়ান টেন ড’শ্বেট আৰু অভিষেক নাইৰৰ দৰে নতুন সদস্যৰ চুক্তি অক্ষত অৱস্থাত থকাৰ সম্ভাৱনা আছে । বিচিচিআইয়ে কিছু নতুন সদস্যক অন্তৰ্ভুক্ত কৰাৰ লগতে সহায়ক কৰ্মচাৰী হ্ৰাস কৰাৰ পৰিকল্পনা কৰিছে ।

বিচিচিআইয়ে ৩০ মাৰ্চত টীম ইণ্ডিয়াৰ কেন্দ্ৰীয় চুক্তি সন্দৰ্ভত সিদ্ধান্ত ল’ব পাৰে । খবৰ অনুসৰি বিচিচিআইৰ সচিব দেৱজিৎ শইকীয়াই আইপিএল ২০২৫ৰ চেন্নাই ছুপাৰ কিংছ বনাম ৰাজস্থান ৰয়েলছৰ খেলৰ সময়ত মুখ্য নিৰ্বাচক অজিত আগৰকাৰ আৰু মুখ্য প্ৰশিক্ষক গৌতম গম্ভীৰৰ সৈতে এই বিষয়ত আলোচনা কৰিব । সাধাৰণতে আই পি এলৰ পূৰ্বে কেন্দ্ৰীয় চুক্তি ঘোষণা কৰা হয় যদিও এইবাৰ পলম হৈছে । পূৰ্বৰ বাতৰি অনুসৰি চুক্তিসমূহৰ ওপৰত সিদ্ধান্ত ল’বলৈ বিচিচিআইয়ে চেম্পিয়নছ ট্ৰফী শেষ হোৱালৈ অপেক্ষা কৰি আছিল ।

দৈনিক জাগৰণৰ প্ৰতিবেদন অনুসৰি দেওবাৰে বিচিচিআইৰ সম্পাদকে গম্ভীৰ আৰু আগৰকাৰক সাক্ষাৎ কৰি কেন্দ্ৰীয় চুক্তি সন্দৰ্ভত আলোচনা কৰিব । এই ঘোষণাত পলম হোৱাৰ কাৰণ হ’ল ভাৰতৰ মুখ্য প্ৰশিক্ষক গুৰুত্বপূৰ্ণ আলোচনাৰ বাবে উপলব্ধ নাছিল । বৰ্তমান গৌতম গম্ভীৰ পৰিয়ালৰ সৈতে বন্ধৰ দিন উদযাপন কৰিবলৈ ফ্ৰান্সত আছে । অৱশ্যে প্ৰতিবেদনত এইটোও দাবী কৰা হৈছে যে বিচিচিআইৰ এজন শীৰ্ষ বিষয়াৰ ঘনিষ্ঠ সহযোগীয়ে ইতিমধ্যে দল পৰিচালনা সমিতি আৰু মুখ্য নিৰ্বাচকৰ সৈতে কেন্দ্ৰীয় চুক্তিৰ বিষয়ে ফোনযোগে কথা পাতিছে ।

খবৰ অনুসৰি চুক্তি সন্দৰ্ভত ব’ৰ্ড আৰু দল পৰিচালনা সমিতি এতিয়াও সহমত হোৱা নাই । এই বিষয়ত ৩০ মাৰ্চত অনুষ্ঠিত হ’বলগীয়া বৈঠকত সিদ্ধান্ত লোৱাৰ সম্ভাৱনা আছে । ডাঙৰ প্ৰশ্নটো হ’ব যে টি-২০ ফৰ্মেটৰ পৰা অৱসৰ লোৱা ৰোহিত আৰু বিৰাট এতিয়াও এ প্লাছৰ চুক্তিত থাকিবনে?