আই পি এলত আৰু দেখা নাযাব অশ্বিনৰ স্পীনৰ যাদু, কি বিশেষ কাৰণত অৱসৰ ল’লে অশ্বিনে?

আন্তঃৰাষ্ট্ৰীয় ক্ৰিকেটৰ পিছত এতিয়া আই পি এলৰ পৰাও অৱসৰ গ্ৰহণ কৰিছে ভাৰতীয় স্পীনাৰ অশ্বিনে। এই তথ্য তেওঁ ছ’চিয়েল মিডিয়াৰ জৰিয়তে শ্বেয়াৰ কৰিছে। এক্স হেণ্ডেলত আই পি এলৰ পৰা অৱসৰৰ কথা ঘোষণা কৰাৰ সময়তে অশ্বিনে এই ডাঙৰ সিদ্ধান্তৰ আঁৰৰ কাৰণো কয়। অশ্বিনে এতিয়া কি কৰিব সেই বিষয়ে প্ৰকাশ কৰিছে। অশ্বিনে আই পি এল কেৰিয়াৰত ৫ টা দলৰ হৈ বিভিন্ন ছিজনত খেলিছে। ইণ্ডিয়ান প্ৰিমিয়াৰ লীগত মুঠ ২২১খন মেচ খেলিছে তেওঁ।

এইদৰেই অশ্বিনে আই পি এলৰ পৰা অৱসৰৰ কথা ঘোষণা কৰে

অশ্বিনে নিজৰ এক্স হেণ্ডেলত লিখিছে- “এইটো জীৱনৰ এটা বিশেষ দিন। কোৱা হয় যে সকলোৰে অন্ত পৰিলে নতুন আৰম্ভণি হয়। আৰু, মোৰ কাহিনীতো একেধৰণৰ কিবা এটা আছে।” অৱসৰ লোৱাৰ সময়ত অশ্বিনে আই পি এল, বি চি চি আই আৰু তেওঁ খেলা সকলো ফ্ৰেঞ্চাইজিক ধন্যবাদ জনায়।

কিয় আই পি এলৰ পৰা অৱসৰ ল’লে অশ্বিনে?

এতিয়া প্ৰশ্ন হয় অশ্বিনে কিয় হঠাতে আই পি এলৰ পৰা বিদায় লোৱাৰ সিদ্ধান্ত ল’লে? অৱসৰৰ কথা ঘোষণা কৰাৰ লগে লগে তেওঁ ক’লে যে প্ৰতিটো শেষই নতুন আৰম্ভণি আনে। তেওঁৰ সিদ্ধান্তৰ আঁৰৰ কাৰণো এই বক্তব্যত লুকাই আছে। আচলতে অশ্বিনে এতিয়া আন দেশৰ টি-২০ লীগৰ ওপৰত চকু ৰাখিছে। তেওঁ সেইবোৰত খেলিব বিচাৰে আৰু তাৰ বাবে আই পি এলৰ পৰা অৱসৰ লোৱাটো প্ৰয়োজনীয় আছিল।

অশ্বিনৰ আই পি এল কেৰিয়াৰ – ৫ টা দল, ২২১ খন মেচ

অশ্বিনৰ আই পি এল কেৰিয়াৰৰ কথা ক’বলৈ গ’লে তেওঁ ১৬ বছৰত ৫ টা দলত অৰিহণা যোগাইছে। ২০০৯ চনত আই পি এলৰ দ্বিতীয় ছিজনত তেওঁ অভিষেক ঘটায়। চি এছ কেৰ পৰা আৰম্ভ হোৱা যাত্ৰা চি এছ কেৰ সৈতেই শেষ হয়। অশ্বিনে ২০২৫ চনৰ আই পি এলত চি এছ কেৰ অংশ আছিল।

ইফালে ৰাইজিং পুনে ছুপাৰ জায়েণ্টছ, দিল্লী কেপিটেলছ, পঞ্জাব কিংছ আৰু ৰাজস্থান ৰয়েলছৰ হৈও মেচ খেলিছিল। অশ্বিনে মুঠ ২২১ খন আই পি এল মেচ খেলিছে, য’ত ১৮৭ টা উইকেট লোৱাৰ উপৰিও ১ টা অৰ্ধশতকৰে ৮৩৩ ৰান সংগ্ৰহ কৰিছে।