‘চুপ চাপ মূৰ তল কৰি আমি কোৱাৰ দৰে কৰা’, লাভলীনাক বৰগোঁহাইক অপমান! দমনৰ বিৰুদ্ধে আৱাজ উঠালে অসম কন্যাই

অলিম্পিকত ব্ৰঞ্জ বিজয়ী বক্সাৰ তথা অসম কন্যা লাভলীনা বৰগোঁহায়ে ভাৰতীয় বক্সিং ফেডাৰেচনৰ কৰ্তৃপক্ষৰ বিৰুদ্ধে উত্থাপন কৰিছে গুৰুতৰ অভিযোগ। ফেডাৰেচনৰ কাৰ্যবাহী অধ্যক্ষ তথা অন্তৱৰ্তীকালীন সমিতিৰ সদস্য কৰ্ণেল অৰুণ মালিক(অৱসৰপ্ৰাপ্ত) ৰ বিৰুদ্ধে দুৰ্ব্যৱহাৰ আৰু লিংগ বৈষম্য কৰাৰ অভিযোগ তুলিছে অসম কন্যাগৰাকীয়ে।

টাইমছ অৱ ইণ্ডিয়াত প্ৰকাশিত এক খবৰ অনুসৰি লাভলীনাই দুটা পৃষ্ঠাৰ এক অভিযোগপত্ৰ দাখিল কৰিছে, য’ত খেলৰত্ন আৰু অৰ্জুন সন্মানপ্ৰাপক খেলুৱৈগৰাকীয়ে যোৱা মাহৰ ৮ জুলাইত টাৰ্গেট অলিম্পিক প’ডিয়াম পৰিকল্পনাৰ বাবে অনলাইনযোগে হোৱা বৈঠকত মালিকে তেওঁৰ কৃতিত্বক “অৰ্থহীন” কৰা আৰু তেওঁক “অপমান” কৰাৰ অভিযোগ উত্থাপন কৰিছিল। এই সন্দৰ্ভত লাভলীনাই কয়, “মই গভীৰভাৱে দুখ পাইছোঁ, হতাশ হৈছোঁ আৰু সঁচাকৈয়ে আমি মহিলা খেলুৱৈ হিচাপে লাভ কৰা সন্মান আৰু মৰ্যাদাক লৈ প্ৰশ্ন উত্থাপন কৰিছিল।”

আনহাতে মালিকে এই সকলো অভিযোগ অস্বীকাৰ কৰি কয়, “ফেডাৰেচনে নিজৰ খেলুৱৈসকলক সমৰ্থন কৰাৰ লগতে ন্যায়পৰায়ণতা, স্বচ্ছতা আৰু সম সুযোগ বজাই ৰাখিছে। এক বিবৃতিত মালিকে কয় যে লাভলীনা দেশৰ গৌৰৱ, আৰু আমি বিএফআইত তেওঁৰ কৃতিত্ব, বিশেষকৈ তেওঁৰ অলিম্পিকৰ ব্ৰঞ্জৰ পদকৰ বাবে অপৰিসীম গৌৰৱ অনুভৱ কৰোঁ।”

“উত্থাপিত অভিযোগসমূহ মই সন্মানসহকাৰে আৰু স্পষ্টভাৱে অস্বীকাৰ কৰিছো। প্ৰশ্ন কৰা ফোনটো সম্পূৰ্ণৰূপে পেছাদাৰী আছিল। ইয়াত SAI আৰু TOPS ৰ বিষয়াসকলে অংশগ্ৰহণ কৰিছিল আৰু আয়োজকে আনুষ্ঠানিকভাৱে ৰেকৰ্ডিং কৰিছিল। একেটা ৰেকৰ্ডিং নিজ নিজ বিষয়াৰ ওচৰত পৰ্যালোচনাৰ বাবে আছে। লাভলীনাই উত্থাপন কৰা বিষয়সমূহ বিএফআইৰ প্ৰতিষ্ঠিত নীতিৰ সৈতে সংগতি ৰাখি যথাযথভাৱে লক্ষ্য কৰা হৈছিল আৰু সম্বোধন কৰা হৈছিল, যিবোৰ সকলো খেলুৱৈৰ বাবে একেধৰণে প্ৰযোজ্য।” মালিকে কয়।

লাভলীনাই ক্ৰীড়া মন্ত্ৰী মানসুখ মাণ্ডবিয়া, ভাৰতীয় ক্ৰীড়া কৰ্তৃপক্ষৰ সঞ্চালক প্ৰধান হৰি ৰঞ্জন ৰাও, TOPS, IOA আৰু বিএফআইলৈ অভিযোগ পত্ৰ প্ৰেৰণ কৰে । ইয়াৰ প্ৰতিক্ৰিয়া স্বৰূপে মন্ত্ৰালয়ৰ নিৰ্দেশত ভাৰতীয় অলিম্পিক সন্থা (IOA)ই তিনিজনীয়া এখন তদন্ত কমিটী গঠন কৰিছে।

কমিটীখনত আছে TOPS ৰ CEO নচতৰ সিং জোহাল, টেবুল টেনিছৰ কিংবদন্তি তথা IOAৰ এথলীটছ কমিছনৰ উপাধ্যক্ষ শৰথ কমল আৰু এগৰাকী মহিলা অধিবক্তা। দুসপ্তাহৰ ভিতৰত প্ৰতিবেদন দাখিলৰ দায়িত্ব দিয়া সমিতিখনে প্ৰায় এমাহ পাৰ হোৱাৰ পিছতো নিজৰ তথ্য প্ৰকাশ কৰিব পৰা নাই। ইয়াৰ উপৰিও TEAMS বিভাগৰ SAI ৰ কাৰ্যবাহী সঞ্চালক ৰিতু পাথিকে এই বিষয়টোৰ স্বতন্ত্ৰভাৱে তদন্ত কৰি আছে।

লভলিনাই তেওঁৰ অভিযোগত কয়, “মই এই চিঠিখন কেৱল এগৰাকী খেলুৱৈ হিচাপেই নহয়, গৌৰৱ, কষ্ট আৰু অধ্যৱসায়ৰে বক্সিং ৰিঙত এখন দেশৰ আশা কঢ়িয়াই লৈ ফুৰা এগৰাকী মহিলা হিচাপেও লিখিছো। শেহতীয়াকৈ ২০২৪ চনৰ ৮ জুলাইত নিশা ১২ বজাত BFI আৰু TOPSৰ সৈতে হোৱা আনুষ্ঠানিক বৈঠকৰ সময়ত যি ঘটিছিল, সেইটোৱে মোক গভীৰভাৱে আঘাত কৰিছে, হতাশ কৰিছে। TOPSৰ সন্মানীয় ব্যক্তিসকলৰ উপস্থিতিত বক্সিং প্ৰশিক্ষক প্ৰণামিকা বড়ো, (অন্য) BFIৰ সদস্য, BFIৰ এজন বিষয়া মিষ্টাৰ অৰুণ মালিকে মোক এনেদৰে অপমান কৰিলে কোনো খেলুৱৈয়ে কেতিয়াও সহ্য কৰিব নালাগে। তেওঁ মোক উদ্দেশ্য কৰি উচ্চ স্বৰত আক্ৰমণাত্মকভাৱে হেয়জ্ঞান কৰি কথা ক’লে আৰু মোক ধমক দি ক’লে যে ‘চুপ থাকা, মূৰটো তললৈ নমাই আমি কোৱাৰ দৰেই কৰা’ । তেওঁৰ কথাবোৰে কেৱল অসন্মানজনক নহয়, লিংগ বৈষম্যমূলক আৰু স্বৈৰাচাৰী আধিপত্যৰ এক আতংকজনক সুৰো বহন কৰিছিল। বিশেষকৈ দেশলৈ সন্মান কঢ়িয়াই অনা এগৰাকী মহিলাই যিটোৰ সন্মুখীন হোৱা উচিত নহয়।”

৪ ছেপ্টেম্বৰৰ পৰা ১৪ ছেপ্টেম্বৰলৈ ব্ৰিটেইনৰ লিভাৰপুলত অনুষ্ঠিত হ’বলগীয়া বিশ্ব চেম্পিয়নশ্বিপৰ বাবে ভাৰতীয় বক্সিং দলৰ অংশ লাভলীনা। তেওঁ লগতে কয়, “যিটো স্থানত মই পেছাদাৰিত্ব, সমৰ্থন আৰু পাৰস্পৰিক সন্মান আশা কৰিছিলো, তাত মোক সৰু আৰু শক্তিহীন অনুভৱ কৰোৱা হৈছিল। ই কেৱল ব্যক্তিগত অপমান নাছিল — ই আছিল ৰিঙৰ ভিতৰত আৰু বাহিৰত উচ্চতাত থিয় হোৱাৰ সপোন দেখা প্ৰতিগৰাকী মহিলা খেলুৱৈৰ ওপৰত আক্ৰমণ। বৈঠকৰ সময়ত মালিকৰ আচৰণৰ ওপৰত ন্যায্য আৰু ক্ষিপ্ৰ তদন্ত আৰু এই কাৰ্যসমূহ গ্ৰহণযোগ্য আচৰণ উলংঘা কৰা বুলি ধৰা পৰিলে প্ৰয়োজনীয় অনুশাসনমূলক ব্যৱস্থা গ্ৰহণৰ বাবে কৰ্তৃপক্ষক অনুৰোধ জনাইছো।”

এই বিবাদৰ সৃষ্টি হয় যেতিয়া লাভলীনাই ভাৰতীয় মহিলা বক্সিং দলৰ দীৰ্ঘদিনীয়া প্ৰশিক্ষক তথা পেৰিছ অলিম্পিক ২০২৪ৰ বাবে দেশৰ দলৰ অংশ প্ৰণামিকা বড়োক এন আই এছ পাটিয়ালাৰ অভিজাত ৰাষ্ট্ৰীয় শিবিৰত ব্যক্তিগত প্ৰশিক্ষক হিচাপে কাম কৰাৰ লগতে লিভাৰপুল ৱৰ্ল্ডছৰ প্ৰস্তুতিৰ বাবে ইউৰোপত বহিঃৰাষ্ট্ৰত প্ৰশিক্ষণ ল’বলৈ অনুমতি দিবলৈ অনুৰোধ জনায়। অভিযোগ অনুসৰি TOPS বিভাগে বিবেচনা কৰাৰ পূৰ্বে মালিকে তেওঁৰ প্ৰস্তাৱ নাকচ কৰিছিল। লাভলীনাৰ বিশেষ অনুৰোধত TOPSৰ বৈঠক আহ্বান কৰি তেওঁৰ দাবীৰ ওপৰত আলোচনা কৰা হয়।

লাভলীনাৰ সৈতে হোৱা কথা-বাৰ্তাৰ উদ্ধৃতি দি টাইমছ অৱ ইণ্ডিয়াই প্ৰকাশ কৰা অনুসৰি খেলুৱৈগৰাকীয়ে কয়, “এই সন্ধিক্ষণত যেতিয়া তদন্ত চলি আছে মই কোনো মন্তব্য দিব নিবিচাৰো। সমিতিখন আৰু ইয়াৰ প্ৰতিবেদনৰ ওপৰত মোৰ সম্পূৰ্ণ বিশ্বাস আছে। ৰাজহুৱাভাৱে মন্তব্য কৰাৰ পূৰ্বে মই প্ৰতিবেদন অহালৈ অপেক্ষা কৰিম।”