চমক সৃষ্টি মুখতাৰৰ, মাত্ৰ ৪০ ৰানত দখল ১০ উইকেট! IPL ২০২৬ৰ নিলামত ফুলিবনে কপাল?

চলি আছে ভাৰতৰ ঘৰুৱা টি-২০ প্ৰতিযোগিতা ছৈয়দ মুস্তাক আলী ট্ৰফী। এই প্ৰতিযোগিতাৰ এখন মেচত কালি ছত্তীশগড়ৰ বিৰুদ্ধে অৱতীৰ্ণ হৈছিল অসম। মেচখখনত চমকপ্ৰদ প্ৰদৰ্শনেৰে অসমে ছত্তীশগড়ক ৪৮ ৰানত পৰাস্ত কৰে। প্ৰথম মেচত অন্ধ্ৰ প্ৰদেশৰ বিপক্ষে পৰাজয়ৰ পিছত কালি প্ৰতিযোগিতাত নিজৰ প্ৰথম জয়ৰ সোৱাদ পাইছে অসম ক্ৰিকেট দলে। অসমৰ এই জয়ৰ প্ৰধান নায়ক হিচাপে পৰিগণিত হয় দলৰ বলিং আক্ৰমণৰ প্ৰধান হোতা পেচাৰ মুখতাৰ হুছেইন।

যুৱ পেচাৰগৰাকীৰ বলিং তাণ্ডৱত কালি লক্ষ্ণৌৰ একানা ষ্টেডিয়ামত শিৰনত কৰিবলৈ বাধ্য হয় ছত্তীশগড়ে। মেচখনত প্ৰথমে বেটিং কৰি অসম দলে শক্তিশালী আৰম্ভণ ঘটাইছিল। দুই অপেনাৰ সুমিত গাডিগাওকাৰ আৰু প্ৰদ্যুন শইকীয়াই প্ৰথম উইকেটত মাত্ৰ ১০ অভাৰত ৯৫ ৰান যোগ দি দলক এক শক্তিশালী স্ক’ৰৰ দিশে লৈ যায়।

প্ৰদ্যুনে ২৯টা বলত ৩৭ ৰান সংগ্ৰহ কৰি বিদায় ল’লেও সুমিতে আগুৱাই নিয়ে দলৰ ইনংছ। অৱশ্যে দলৰ আন বেটাৰৰ ব্যৰ্থতাৰ ফলত এক বৃহৎ স্ক’ৰৰ সুযোগ হেৰুৱায় অসমে। সুমিতে দললৈ সৰ্বাধিক ৭৯ ৰানৰ অৱদান আগবঢ়ায়। ৪৯টা বলত ৭টা চাৰি আৰু ৩টা ছয়েৰে এই ইনিংছটো সজায় সুমিতে।

ব্যৰ্থ হয় ৰিয়ান পৰাগ

ব্যৰ্থ হয় দলৰ বেটিং লাইন আপৰ প্ৰধান ভৰসা তথা অধিনায়ক ৰিয়ান পৰাগ। ৰিয়ানে মাত্ৰ ১৫ ৰান কৰিয়েই বিদায় লয়। শেষলৈ নিহাৰ ডেকাই ১৪ বলত ২২ ৰান সংগ্ৰহ কৰি দলৰ স্ক’ৰ ১৬৭লৈ নিয়ে। এই চাৰিগৰাকীৰ বাদে আন কোনো এজনে দহকৰ ঘৰ স্পৰ্শ কৰিবলৈ সক্ষম নহ’ল।

মুখতাৰৰ বিধ্বংসী বলিং

এই লক্ষ্য অনুসৰণত ছত্তীশগড়ৰ সমুখত বাধাৰ প্ৰাচীৰ হৈ পৰে মুখতাৰ। ইনিংছৰ মাত্ৰ দ্বিতীয়টো বলতে মুখতাৰে আয়ুস পাণ্ডেক বিদায় দিয়ে। ইয়াৰ পিছত ক্ৰমাৎ ছত্তীশড়ৰ বেটিং লাইন আপৰ ওপৰত প্ৰভাৱশালী হৈ পৰে পেচাৰগৰাকী। নিজৰ দ্বিতীয়টো উইকেটৰ ৰূপত তেওঁ পেভিলিয়নলৈ উভতায় প্ৰতীক যাদৱক।

নিজ স্পেলৰ অন্তিমটো অভাৰত মুখতাৰ হৈ পৰে অধিক বিধ্বংসী। অভাৰৰ প্ৰথমটো বলতে ছত্তীশড়ৰ অধিনায়ক অমনদীপ খাৰেক (৪৬ ৰান) বিদায় দি মুখতাৰে অসমৰ জয়ৰ পথ প্ৰায় মুকলি কৰে। ইয়াৰ পিছত অভাৰৰ তৃতীয় আৰু পঞ্চম বলত পুনৰ উইকেট দখল কৰি ৫ উইকেট দখলৰ ঈৰ্ষণীয় কৃতিত্ব অৰ্জন কৰে মুখতাৰে।

অভাৰৰ অন্তিমটো বলতো মুখতাৰে আন এটা উইকেট দখল কৰি দলৰ বিজয় প্ৰায় নিশ্চিত কৰি তোলাৰ লগতে সফল স্পেলৰ সামৰণি পেলায়। দৰ্শনীয় বলিঙেৰে তেওঁ নিজ ৪ অভাৰৰ স্পেলত মাত্ৰ ২০ ৰান খৰচ কৰি ৬টা উইকেট দখল কৰে। এই ৪ অভাৰত মুখতাৰে ১৫টা বলতে কোনো ৰান খৰচ নকৰে। এনে প্ৰদৰ্শনৰ বাবে মুখতাৰ মেচৰ শ্ৰেষ্ঠ খেলুৱৈ বিবেচিত হয়।

চৰ্চাত মুখতাৰ

উল্লেখ্য যে অন্ধ্ৰৰ বিৰুদ্ধে প্ৰথম মেচতো মুখতাৰে ৪ অভাৰত ২০ ৰান খৰচ কৰি ৪টা উইকেট দখল কৰিছিল। অৱশ্যে তেওঁৰ এনে প্ৰদৰ্শনৰ পিছতো বেটিং ব্যৰ্থতাৰ বাবে মেচখনত পৰাস্ত হৈছিল অসম। কিন্তু প্ৰতিযোগিতাৰ প্ৰথম দুখন মেচতে ৮ অভাৰত মাত্ৰ ৪০ ৰানত ১০ উইকেট দখলেৰে এতিয়া চৰ্চাত মুখতাৰ।

IPL ২০২৬ৰ নিলামৰ ওপৰত থাকিব দৃষ্টি

লক্ষণীয়ভাৱে মুখতাৰৰ এনে প্ৰদৰ্শন তেওঁৰ নিজ কেৰিয়াৰৰ লগতে অসম ক্ৰিকেটৰ বাবেও গুৰুত্বপূৰ্ণ বিবেচিত হৈছে। অহা ১৬ ডিচেম্বৰত অনুষ্ঠিত হ’ব IPL ২০২৬ৰ নিলাম। যদি আগন্তুক মেচসমূহতো মুখতাৰে এনে প্ৰদৰ্শন আগবঢ়াবলৈ সক্ষম হয়, নিশ্চিতভাৱে নিলামত মুখতাৰৰ ওপৰত দৃষ্টি নিবদ্ধ থাকিব ফ্ৰেন্সাইজিসমূহৰ।