মেলবৰ্ণত পুষ্পা ৰূপত নীতিশঃ অষ্ট্ৰেলিয়ান আক্ৰমণ প্ৰত্যাহ্বানেৰে ৰচিলে অভিলেখ

অষ্ট্ৰেলিয়া ভ্ৰমণত ভাৰতীয় ক্ৰিকেটৰ এক উজ্জল ভৱিষ্যতৰ প্ৰতিশ্ৰুতি বহন কৰি প্ৰচুৰ সম্ভাৱনাৰে আত্মপ্ৰকাশ কৰিছে নীতিশ কুমাৰ ৰেড্ডীয়ে। চলিত ব’ৰ্ডাৰ-গাভাস্কাৰ ট্ৰফীত ধাৰাবাহিকতা ৰক্ষাৰে যুৱ তাৰকাগৰাকীয়ে ক্ৰিকেট বিশ্বৰ প্ৰশংসা বুটলিছে। পাৰ্থত অনুষ্ঠিত প্ৰথমখন টেষ্টত নীতিশে জাতীয় দলৰ হৈ টেষ্ট অভিষেক ঘটায়। কেৰিয়াৰৰ প্ৰথমখন টেষ্টৰ প্ৰথমটো ইনিংছতে ৪১ ৰানৰ এক দৰ্শনীয় ইনিংছেৰে নীতিশে তেওঁৰ যোগ্যতাৰ প্ৰমাণ দিয়ে। ইয়াৰ পিছতো ভাৰতীয় দলৰ বেটিং বিপৰ্যয়ৰ সময়ত ক্ৰীজত দল তথা অনুৰাগীৰ আশা হৈ থিয় দি আহিছে নীতিশে।

অৱশ্যে দলৰ বেটিং লাইন আপত নতুন শক্তি হিচাপে ভূমিকা গ্ৰহণ কৰিলেও নীতিশে নিজৰ ইনিংছ দীঘলীয়া কৰি তুলিব পৰা নাছিল। বাৰে বাৰে অৰ্ধশতকৰ কাষ চাপিও থমকিবলগা হৈছিল খেলুৱৈগৰাকী। এই ব্যৰ্থতাৰ অৱসান ঘটাই আজি মেলবৰ্ণত কেৰিয়াৰৰ প্ৰথমটো অৰ্ধশতক পূৰ্ণ কৰে নীতিশ কুমাৰ ৰেড্ডীয়ে। কেৱল ব্যক্তিগত সাফল্যই নহয়, এই ইনিংছটোৰে মেলবৰ্ণত ভাৰতীয় দলৰ প্ৰত্যাহ্বানৰো নায়ক হৈ পৰিছে যুৱ তাৰকাগৰাকী।

মেলবৰ্ণত অষ্ট্ৰেলিয়ান বলিং আক্ৰমণৰ সমুখত দৃঢ়তাৰে থিয় দি নীতিশে আগবঢ়াই নিয়ে দল তথা ব্যক্তিগত ইনিংছ। ধৈৰ্যশীল বেটিঙেৰে টেষ্ট কেৰিয়াৰৰ প্ৰথমটো অৰ্ধশতকৰ ৰূপত ৮১টা বলত অৰ্ধশতক সম্পূৰ্ণ কৰে নীতিশে। এই কৃতিত্ব অৰ্জনৰ পিছতে নীতিশে ভাৰতীয় ছবিজগতত শেহতীয়াকৈ খলকনি তোলা আল্লু অৰ্জুনৰ জনপ্ৰিয় চৰিত্ৰ পুষ্পাৰ ভংগিমাৰে অৰ্ধশতকৰ আনন্দ প্ৰকাশ কৰে।

নীতিশৰ এই প্ৰকাশ ভংগীয়ে ষ্টেডিয়ামৰ গেলাৰীত বহি থকা দৰ্শকসকলক বাৰুকৈয়ে আনন্দিত কৰে। হাত চাপৰিৰে এই সাফল্যক অভিবাদন জনায় প্ৰতিগৰাকী দৰ্শকে। লক্ষণীয়ভাৱে অৰ্ধশত্কৰ পিছত কিছু বিস্ফোৰক শৈলীৰে ইনিংছ আগুৱাই নিয়া নীতিশে দ্বিতীয় ছেচনৰ সমাপ্তিলৈ ৮৫ ৰান সংগ্ৰহ কৰি প্ৰায় শতকৰে কাষ চাপিছে। এই ইনিংছৰ সময়ত নীতিশে আন এক ঈৰ্ষণীয় কৃতিত্বও অৰ্জন কৰিছে।

অপৰাজিত এই ইনিংছটোত নীতিশে এইপৰ্যন্ত ৮টা চাৰি আৰু এটা ছয় কোবাইছে। চলিত শৃংখলাত নীতিশৰ এয়া অষ্টমটো ছয়। ইয়াৰ লগে লগে তেওঁ অষ্ট্ৰেলিয়াৰ বিৰুদ্ধে অষ্ট্ৰেলিয়ান ভূমিত হোৱা টেষ্ট শৃংখলাত সৰ্বাধিক ছয় কোবোৱা বেটাৰৰ অভিলেখ স্পৰ্শ কৰিছে। এই ক্ষেত্ৰত তেওঁ অৱশ্যে ভাৰতীয় খেলুৱৈৰ নতুন ৰেকৰ্ড স্থাপন কৰিছে। সামগ্ৰিকভাৱে তেওঁ এইক্ষেত্ৰত ইংলেণ্ডৰ মাইকেল ভ’গান আৰু ৱেষ্ট ইণ্ডিজৰ ক্ৰিছ গেইলৰ ৰেক’ৰ্ড স্পৰ্শ কৰিছে।

ভ’গানে ২০০২-০৩ চনৰ এছেছ শৃংখলাত এই কৃতিত্ব অৰ্জন কৰাৰ বিপৰীতে গেইলে ২০০৯-১০ চনৰ অষ্ট্ৰেলিয়া ভ্ৰমণৰ সময়ত এই অভিলেখ গঢ়িছিল। ইতিমধ্যে দুয়োগৰাকী খেলুৱৈয়ে আন্তঃৰাষ্ট্ৰীয় ক্ৰিকেটৰ পৰা বিদায় দিছে আৰু এতিয়া নীতিশে দুয়োকে অতিক্ৰমি এই অভিলেখ নিজৰ নামত সংযোজিত কৰাৰ সুযোগ লাভ কৰিছে। এই ইনিংছতে নীতিশে ছয়ৰ এই বিশেষ অভিলেখ ৰচনাৰ পূৰ্ণ সম্ভাৱনা আছে।