World Cup Prize Money: বিশ্ব চেম্পিয়ন টীম ইণ্ডিয়াৰ ওপৰত ধনৰ বৰষুণ, ICC-এ দিলে ইমান কোটি টকা…
২০২৫ চনৰ বিশ্বকাপ জয় কৰি টীম ইণ্ডিয়াই মহিলা ক্ৰিকেট আৰু ভাৰতীয় ক্ৰিকেটৰ ইতিহাসত চিৰদিনৰ বাবে নিজৰ নাম খোদিত কৰে। কিন্তু কেৱল বিশ্বকাপেই নহয়, ভাৰতীয় দলটোৱেও ক্ৰিকেটৰ ইতিহাসত সৰ্বাধিক পুৰস্কাৰ লাভ কৰি ইতিহাস ৰচনা কৰে।
ভাৰতীয় ক্ৰিকেটৰ ইতিহাসত পুনৰবাৰ অমৰ হৈ পৰিছে ২ তাৰিখটো। চাৰে ১৪ বছৰ পূৰ্বে ২ এপ্ৰিলত মুম্বাইৰ ৱানখেড়ে ষ্টেডিয়ামত এম এছ ধোনিৰ অধিনায়কত্বত ভাৰতীয় দলটোৱে বিশ্বকাপ জয় কৰি দীৰ্ঘদিনীয়া অপেক্ষাৰ অন্ত পেলাইছিল। এতিয়া ২ নৱেম্বৰত নৱী মুম্বাইৰ ডি ৱাই পাটিল ষ্টেডিয়ামত হৰমনপ্ৰীত কৌৰৰ অধিনায়কত্বত ভাৰতীয় মহিলা দলটোৱে আই চি চি মহিলা বিশ্বকাপত জয়লাভ কৰি প্ৰথমবাৰৰ বাবে চেম্পিয়ন হয়। টীম ইণ্ডিয়াই কেৱল বিশ্ব চেম্পিয়ন হোৱাই নহয় বিশ্বকাপৰ ইতিহাসত সৰ্বাধিক পুৰস্কাৰৰ ধন লাভ কৰে।
ঠিক ৮ বছৰ পূৰ্বে বিশ্বকাপৰ ফাইনেলত ইংলেণ্ডৰ হাতত হৃদয় বিদাৰক পৰাজয়ৰ সন্মুখীন হৈছিল টীম ইণ্ডিয়া। কিন্তু এইবাৰ হৰমনপ্ৰীত কৌৰ নেতৃত্বাধীন দলটোৱে নিৰাশ নকৰিলে দেশৰ জনতাক। টীম ইণ্ডিয়াই ঘৰুৱা মাটিত, নিজৰ মানুহৰ মাজত বিশ্বকাপ জয় কৰি ইতিহাস ৰচনা কৰাৰ সুযোগ পালে। দেওবাৰে অনুষ্ঠিত হোৱা খিতাপৰ মেচখনত টীম ইণ্ডিয়াই দক্ষিণ আফ্ৰিকাক ৫২ ৰানত পৰাস্ত কৰি প্ৰথমবাৰৰ বাবে বিশ্ব চেম্পিয়ন হয়।
টীম ইণ্ডিয়াৰ ওপৰত বিপুল পৰিমাণৰ ধনৰ বৰষুণ
এই বিশ্বকাপ আৰম্ভ হোৱাৰ আগতেই আই চি চিৰ অধ্যক্ষ জে শ্বাহে এটা ডাঙৰ ঘোষণা কৰিছিল, যাৰ ফলত প্ৰতিযোগিতাখনৰ পুৰস্কাৰৰ ধন যথেষ্ট বৃদ্ধি পাইছিল আৰু টীম ইণ্ডিয়া ইয়াৰ প্ৰথম বিজয়ী হৈছে। বিশ্ব চেম্পিয়ন হোৱাৰ বাবে টীম ইণ্ডিয়াই আইচিচিৰ পৰা ৪৪.৮ মিলিয়ন ডলাৰ অৰ্থাৎ প্ৰায় ৪০ কোটি টকাৰ পুৰস্কাৰ লাভ কৰে। পুৰুষ আৰু মহিলা ক্ৰিকেটৰ ইতিহাসত এতিয়ালৈকে প্ৰদান কৰা এইটোৱেই হৈছে সৰ্ববৃহৎ পুৰস্কাৰৰ ধন।
তদুপৰি আন প্ৰতিটো দলৰ দৰে ভাৰতীয় দলটোৱেও ২ লাখ ৫০ হাজাৰ ডলাৰ অৰ্থাৎ প্ৰায় ২.২২ কোটি টকাৰ পূৰ্বনিৰ্ধাৰিত ধন লাভ কৰিব। তদুপৰি লীগ পৰ্যায়ত প্ৰতিখন মেচত জয়ী হোৱাৰ বাবে টীম ইণ্ডিয়াই লাভ কৰিব ৩৪,৩১৪ ডলাৰ। লীগ পৰ্যায়ত তিনিখন মেচত জয়লাভ কৰে টিম ইণ্ডিয়াই। ইয়াৰ ফলত তেওঁলোকে অতিৰিক্ত ৯২ লাখ টকা উপাৰ্জন কৰে।
ইফালে দক্ষিণ আফ্ৰিকাই খিতাপ হেৰুৱাই পেলোৱাৰ বিপৰীতে তেওঁলোকে এতিয়ালৈকে সৰ্বাধিক ৰানাৰ্ছ আপৰ পুৰস্কাৰৰ ধনো লাভ কৰে। আফ্ৰিকান দলটোৱে দ্বিতীয় স্থান দখল কৰাৰ বাবে ২২.৪ মিলিয়ন ডলাৰ বা প্ৰায় ২০ কোটি টকা লাভ কৰে। ইয়াৰ উপৰিও আফ্ৰিকান দলটোৱে পূৰ্বতে নিৰ্ধাৰিত ২.২২ কোটি টকা লাভ কৰিব। আফ্ৰিকান দলটোৱে লীগ পৰ্যায়ত পাঁচখন মেচত জয়লাভ কৰিছিল। সেয়েহে প্ৰতিখন মেচত ৩৪,৩১৪ ডলাৰৰ হিচাপত ১.৫ কোটিতকৈ অধিক টকা লাভ কৰিব।
