৩ টা মুখ্য খিতাপ, মাত্ৰ ১২ খন মেচত পৰাজয়…ভাৰতীয় ক্ৰিকেটত ৰোহিত যুগৰ অৱসান!
ভাৰতীয় কিংবদন্তি ক্ৰিকেটৰ ৰোহিত শৰ্মাৰ অধিনায়কত্বৰ যুগৰ অন্ত পৰিল। এদিনীয়া দলৰ অধিনায়ক পদৰ পৰা তেওঁক অপসাৰণ কৰা হৈছে। এতিয়া তেওঁ বেটছমেন হিচাপে খেলিব। অধিনায়কত্ব কালত ৰোহিতে ভাৰতীয় ক্ৰিকেটক বহু স্মৰণীয় মুহূৰ্ত প্ৰদান কৰিছে, যিবোৰ অনুৰাগীয়ে কেতিয়াও পাহৰিব নোৱাৰে।
ভাৰতীয় ক্ৰিকেটত এটা নতুন যুগ আৰম্ভ হ’বলৈ ওলাইছে। অষ্ট্ৰেলিয়া ভ্ৰমণত এদিনীয়া দলটোক নেতৃত্ব দিব শুভমন গিলে। অৰ্থাৎ ৰোহিত শৰ্মাক আৰু অধিনায়ক হিচাপে খেলা দেখা নাযাব। ২০২১ চনৰ ডিচেম্বৰ মাহত পূৰ্ণকালীন এদিনীয়া অধিনায়ক হিচাপে নিযুক্তি লাভ কৰা ৰোহিত শৰ্মাই ইতিমধ্যে টেষ্ট আৰু টি-২০ৰ পৰা অৱসৰ গ্ৰহণ কৰিছে।
অৰ্থাৎ ৰোহিত শৰ্মাৰ অধিনায়কত্বৰ যুগৰ অন্ত পৰিল। তেওঁ আটাইতকৈ সফল আন্তঃৰাষ্ট্ৰীয় অধিনায়ক হিচাপে এই যাত্ৰাৰ অন্ত পেলাইছে।
আটাইতকৈ সফল অধিনায়কৰ যুগৰ পৰিসমাপ্তি
ৰোহিত শৰ্মাই ৫৬খন এদিনীয়াত ভাৰতৰ অধিনায়কত্ব কৰিছিল। এই সময়ছোৱাত টিম ইণ্ডিয়াই ৪২খন খেলত জয়লাভ কৰাৰ বিপৰীতে মাত্ৰ ১২খন খেলত পৰাস্ত হয়। এখন মেচ তেওঁৰ অধিনায়কত্বত ড্ৰ’ হৈছিল, আনহাতে আন এখন মেচ নিৰ্ণায়ক নাছিল।
এদিনীয়াৰ অধিনায়ক হিচাপে তেওঁ দুবাৰকৈ এছিয়া কাপ জয় কৰিছিল। তেওঁ ২০১৮ আৰু ২০২৩ চনত ভাৰতক নেতৃত্ব দি এছিয়া কাপ খিতাপ দখল কৰিছিল। ২০২৫ চনত ভাৰতক চেম্পিয়নছ ট্ৰফীতো নেতৃত্ব দিছিল। সেইবাৰ ১২ বছৰৰ ব্যৱধানৰ অন্তত ভাৰতে চেম্পিয়নছ ট্ৰফী লাভ কৰিছিল।
আন্তঃৰাষ্ট্ৰীয় ক্ৰিকেটত সৰ্বাধিক জয়
আন্তঃৰাষ্ট্ৰীয় ক্ৰিকেটত সৰ্বাধিক বিজয়ৰ শতকৰা হাৰ ৰোহিত শৰ্মাৰ। তেওঁ অধিনায়ক হিচাপে আন্তঃৰাষ্ট্ৰীয় মেচসমূহৰ ৭২.৫% মেচতেই জয়লাভ কৰে। আন কোনো অধিনায়কৰ জয়ৰ শতাংশ ৭০%তকৈ বেছি নহয়। অষ্ট্ৰেলিয়াৰ ৰিকি পণ্টিঙে ৬৭.৯%, আফগানিস্তানৰ আজগৰ আফগানে ৬৭.৮% আৰু অষ্ট্ৰেলিয়াৰ ষ্টিভ ৱাফে ৬৬.৩% মেচত লাভ কৰে। এই আটাইকেইগৰাকী অধিনায়কে কমেও ১০০খন আন্তঃৰাষ্ট্ৰীয় মেচত অধিনায়কত্ব কৰিছে।
এদিনীয়া ক্ৰিকেটতো অধিনায়ক হিচাপে ৰোহিতে শতকৰা ৭৭.২৭ খন খেলত জয়লাভ কৰে, যিটো বিশ্বৰ দ্বিতীয় শ্ৰেষ্ঠ জয়ৰ শতকৰা হাৰ। তেওঁক অতিক্ৰম কৰিছে মাত্ৰ ৱেষ্ট ইণ্ডিজৰ ক্লাইভ লয়ডে, যিয়ে তেওঁৰ মেচসমূহৰ শতকৰা ৭৭.৭১ খন মেচত জয়লাভ কৰে।
আইচিচি প্ৰতিযোগিতাত তেওঁৰ জয়ৰ শতকৰা হাৰ ৮৭.১। আন সকলো অধিনায়কৰ ভিতৰত সৰ্বাধিক এই সংখ্যা। আন কোনো অধিনায়কে আইচিচিৰ কোনো ইভেণ্টত ৮০% মেচত জয়ী হোৱা নাই। অৰ্থাৎ অধিনায়কত্বৰ ক্ষেত্ৰত আন কোনো অধিনায়ক ৰোহিতৰ কাষ চাপিব পৰা নাই।
অষ্ট্ৰেলিয়া ভ্ৰমণৰ বাবে ভাৰতীয় দল ঘোষণা
আজি বিচিচিআয়ে আগন্তুক অষ্ট্ৰেলিয়া ভ্ৰমণৰ বাবে দল ঘোষণা কৰে। শুভমন গিলক এদিনীয়া আৰু সূৰ্যকুমাৰ যাদৱক টি-২০ ৰ অধিনায়ক হিচাপে নিযুক্তি দিয়া হৈছে। বিৰাট কোহলী আৰু ৰোহিত শৰ্মায়ো এদিনীয়া দলত স্থান লাভ কৰিছে। কিন্তু এইবাৰ অধিনায়ক হিচাপে নহয়, সাধাৰণ খেলুৱৈ হিচাপে দেখা যাব ৰোহিত শৰ্মাক।
অষ্ট্ৰেলিয়া ভ্ৰমণৰ বাবে এদিনীয়া দল
শুভমান গিল (অধিনায়ক), ৰোহিত শৰ্মা, বিৰাট কোহলী, শ্ৰেয়াছ আয়েৰ, অক্ষৰ পেটেল, কে এল ৰাহুল, নীতিশ কুমাৰ ৰেড্ডী, ৱাশ্বিংটন সুন্দৰ, কুলদীপ যাদৱ, হৰ্ষিত ৰাণা, মহম্মদ চিৰাজ, অৰ্শদীপ সিং, প্ৰসিদ্ধ কৃষ্ণ, ধ্ৰুৱ জুৰেল, যশস্বী জয়ছৱাল।
অষ্ট্ৰেলিয়া ভ্ৰমণৰ বাবে টি-২০ দল
সূৰ্যকুমাৰ যাদৱ (অধিনায়ক), অভিষেক শৰ্মা, শুভমন গিল (উপ অধিনায়ক), তিলক বাৰ্মা, নীতিশ কুমাৰ ৰেড্ডী, শিৱম ডুবে, অক্ষৰ পেটেল, জিতেশ শৰ্মা (উইকেটকীপাৰ), বৰুণ চক্ৰবৰ্তী, যশপ্ৰীত বুমৰাহ, অৰ্শদীপ সিং, কুলদীপ যাদৱ, হৰ্ষিত ৰানা, সঞ্জু চেমচন (উইকেটকীপাৰ), ৰিংকু সিং, ৱাশ্বিংটন সুন্দৰ।
