৩৬টা বলত শতক…বিজয় হাজাৰে ট্ৰফীত ১৪ বছৰীয়া বৈভৱ সূৰ্যবংশীৰ আলোড়ন
বৈভৱ সূৰ্যবংশীয়ে অৰুণাচল প্ৰদেশৰ বিৰুদ্ধে মাত্ৰ ৩৬টা বলত শতক অৰ্জন কৰে। এই মেচখন ধোনিৰ গৃহ চহৰ ৰাঁচীত অনুষ্ঠিত হৈছে।
১৯ বছৰ অনুৰ্ধ এছিয়া কাপৰ ফাইনেলত পাকিস্তানৰ হাতত পৰাজয় পাহৰি বিজয় হাজাৰে ট্ৰফীত এক দৰ্শনীয় অভিষেক ঘটালে ১৪ বছৰীয়া বেটছমেন বৈভৱ সূৰ্যবংশীয়ে। অৰুণাচল প্ৰদেশৰ বিৰুদ্ধে মাত্ৰ ৩৬টা বলত বৈভৱে চাঞ্চল্যকৰ শতক অৰ্জন কৰে। বৈভৱ সূৰ্যবংশীৰ ইনিংছ ছয় আৰু চাৰিৰে ভৰি পৰিছিল। আটাইতকৈ গুৰুত্বপূৰ্ণ কথাটো হ’ল ধোনিৰ ঘৰুৱা খেলপথাৰ ৰাঁচীত অৰুণাচল প্ৰদেশৰ বিৰুদ্ধে নিজৰ বিস্ফোৰক ইনিংছ প্ৰদৰ্শন কৰে বৈভৱ সূৰ্যবংশীয়ে।
বিহাৰৰ হৈ বিজয় হাজাৰে ট্ৰফী ২০২৫-২৬ৰ প্ৰথমখন মেচত অ’পেনিং কৰি বৈভৱ সূৰ্যবংশীয়ে অৰুণাচল প্ৰদেশৰ বলাৰক ছিন্নভিন্ন কৰি পেলায়। মাত্ৰ ৩৬টা বলত ১০টা চাৰি আৰু ৮টা ছয় কৰি শতক অৰ্জন কৰে। এয়া তেওঁৰ শতকৰ আৰম্ভণিহে আছিল যদিও তাৰ বাহিৰেও তেওঁৰ ইনিংছ চলি থাকিল। বিজয় হাজাৰে ট্ৰফীত এয়া বৈভৱ সূৰ্যবংশীৰ প্ৰথমটো শতক।
বিজয় হাজাৰে ট্ৰফীত বৈভৱ সূৰ্যবংশীয়ে কি অভিলেখ গঢ়িলে?
বৈভৱ সূৰ্যবংশীয়ে যোৱা বছৰ বিজয় হাজাৰে ট্ৰফীত অভিষেক ঘটায়। ১৩ বছৰ বয়সত তেওঁ প্ৰতিযোগিতাখনত খেলা আটাইতকৈ কম বয়সীয়া খেলুৱৈ হিচাপে পৰিগণিত হয়। যোৱা ছিজনত নিজৰ বয়সৰ লগত ইতিহাস সৃষ্টি কৰা বৈভৱে এতিয়া নিজৰ বেটিঙেৰে বিজয় হাজাৰে ট্ৰফীত ইতিহাস সৃষ্টি কৰিছে। তেওঁ এতিয়া বিজয় হাজাৰে ট্ৰফীৰ ইতিহাসত শতক অৰ্জন কৰা আটাইতকৈ কম বয়সীয়া বেটছমেন হিচাপে পৰিগণিত হৈছে।
বিজয় হাজাৰে ট্ৰফীত বৈভৱ সূৰ্যবংশীৰ সৰ্বোচ্চ স্ক’ৰ
এইখন বৈভৱ সূৰ্যবংশীৰ বিজয় হাজাৰে ট্ৰফীত সপ্তমখন খেল। ইয়াৰ পূৰ্বে তেওঁ প্ৰতিযোগিতাখনৰ পূৰ্বৰ ছিজনত ৬খন মেচ খেলিছিল। সেই ছয়খন মেচত তেওঁ মাত্ৰ ১৩২ ৰানহে সংগ্ৰহ কৰিছিল। তেওঁৰ সৰ্বোত্তম স্ক’ৰ আছিল ৭১।অৱশ্যে এইবাৰ ইতিমধ্যে তেওঁ প্ৰথমখন মেচত পূৰ্বৰ ছখনতকৈ অধিক ৰান সংগ্ৰহ কৰিছে।
