১৪ বছৰীয়া কেৰিয়াৰৰ যৱনিকা, IPLত আৰু দেখা নাযাব ৰাছেল পাৱাৰ; দেখা যাব এনে নতুন ভূমিকাত
বিগত ১৪টা বছৰে ক্ৰিকেট বিশ্বৰ আটাইতকৈ জনপ্ৰিয় তথা ধনৱন্ত লীগ ইণ্ডিয়ান প্ৰিমিয়াৰ লীগ, চমুকৈ IPLত ৰাছেলে দেখুৱাই আহিছে নিজৰ এই শক্তি। পিছে ক্ৰিকেট অনুৰাগীয়ে আৰু IPLত দেখিবলৈ নাপাব ৰাছেলৰ খেল। খেলুৱৈৰ পৰিৱৰ্তে এতিয়া তেওঁক দেখা যাব এক নতুন ভূমিকাত।
আন্দ্ৰে ৰাছেল, টি-২০ ফৰ্মেটত যিকোনো বলাৰৰ বাবেই এটি ত্ৰাসৰ নাম। অনায়সে বিশাল বিশাল বাউণ্ডেৰী কোবাই মেচৰ পৰিস্থিতি যিকোনো সময়তে সলনি কৰিব পৰা তাৰকা ৰাছেল। সমানে বিপদৰ সময়ত বলিঙতো তেওঁ হৈ পৰে নিৰ্ভৰযোগ্য। বিগত ১৪টা বছৰে ক্ৰিকেট বিশ্বৰ আটাইতকৈ জনপ্ৰিয় তথা ধনৱন্ত লীগ ইণ্ডিয়ান প্ৰিমিয়াৰ লীগ, চমুকৈ IPLত ৰাছেলে দেখুৱাই আহিছে নিজৰ এই শক্তি। পিছে ক্ৰিকেট অনুৰাগীয়ে আৰু IPLত দেখিবলৈ নাপাব ৰাছেলৰ খেল।
আজি এক সামাজিক মাধ্যম পোষ্ট যোগে IPLৰ পৰা অৱসৰৰ কথা ঘোষণা কৰিছে ৱেষ্ট ইণ্ডিজৰ তাৰকা অল ৰাউণ্ডাৰগৰাকীয়ে। এক ইনষ্টাগ্ৰাম পোষ্টত তেওঁ নিজৰ এই সিদ্ধান্তৰ বিষয়ে সদৰী কৰি ৰাছেলে। অৱশ্যে খেলুৱৈ কেৰিয়াৰ সামৰিলেও তেওঁ কলকাতা নাইট ৰাইডাৰ্ছ পৰিয়ালৰ অংশ হৈ থাকিব বুলিও ৰাছেলে নিশ্চিত কৰিছে।
শেহতীয়াকৈ IPL ফ্ৰেন্সাইজিসমূহে প্ৰকাশ কৰিছিল খেলুৱৈ ৰিটেইন আৰু ৰিলিজ তালিকা। লক্ষণীয়ভাৱে কলকাতা নাইট ৰাইডাৰ্ছে দলৰ অভিন্ন অংশস্বৰূপ হৈ পৰা ৰাছেলক দলৰ পৰা মুকলি কৰি দিছিল। ইয়াৰ পিছতে তেওঁ নিলামত প্ৰৱেশ কৰিব বুলি যথেষ্ট জল্পনা-কল্পনা দেখিবলৈ পোৱা গৈছিল। পিছে এনে চৰ্চা এতিয়া অন্ত পৰিছে।
১৪ বছৰীয়া IPL কেৰিয়াৰৰ অন্ত
উল্লেখ্য যে ৰাছেলে ২০১২ চনত দিল্লী কেপিটেলছ (তেতিয়াৰ দিল্লী ডেয়াৰডেভিলছ)ৰ সৈতে আই পি এলত অভিষেক ঘটায়। ইয়াৰ পিছৰ সংস্কৰণত অৰ্থাৎ ২০১৪ চনত তেওঁ কলকাতা নাইট ৰাইডাৰ্ছত যোগ দিয়ে। তেতিয়াৰ পৰাই ৰাছেল কলকাতাৰ নিৰ্ভৰযোগ্য সদস্য হিচাপে প্ৰতিটো ছিজনতে দলটোক প্ৰতিনিধিত্ব কৰিছে।
নিজ IPL কেৰিয়াৰত ৰাছেলে মুঠ ১৪০ খন মেচ খেলিছে। এই সময়ছোৱাত তেওঁ ১১৫টা ইনিংছত ২৮.২০ গড়ে আৰু ১৭৪.১৭ ষ্ট্ৰাইক ৰেটেৰে ২৬৫১ ৰান সংগ্ৰহ কৰে। বলিঙতো তেওঁ ১২১ ইনিংছত ১২৩টা উইকেট দখল কৰে।প্ৰতিযোগিতাৰ বিগত ছিজনত তেওঁ ১০ ইনিংছত ১৬৭ ৰান সংগ্ৰহ কৰাৰ লগতে ৮টা উইকেট দখল কৰে।
IPLৰ পৰা অৱসৰ ল’লেও অৱশ্যে বিশ্বৰ আন ক্ৰিকেট লীগত খেল অব্যাহত ৰাখিব বুলি নিশ্চিত কৰিছে আন্দ্ৰে ৰাছেলে। ইয়াৰ সমান্তৰালকৈ IPLত তেওঁৰ নতুন ভূমিকাৰ কথাও সদৰী কৰে। ৰাছেলে উল্লেখ কৰা মতে আগন্তুক সংস্কৰণত কলকাতাৰ ছাপ’ৰ্ট ষ্টাফত ‘পাৱাৰ কোচ’ হিচাপে তেওঁক নতুন ভূমিকাত দেখা পোৱা যাব।
দুবাৰৰ চেম্পিয়ন
আন্দ্ৰে ৰাছেলে নিজ কেৰিয়াৰৰ সময়ছোৱাত দুবাৰ IPL খিতাপ দখল কৰে। ২০১৪ আৰু ২০২৪ চনত খিতাপ জয় কৰা কলকাতা নাইট ৰাইডাৰ্ছ দলৰ অংশ আছিল তেওঁ। লগতে ২০১৫ আৰু ২০১৯ চনত তেওঁ দুবাৰ IPL MVP বঁটাও লাভ কৰিছিল। অৱশ্যে শেহতীয়া ছিজনত তেওঁৰ প্ৰদৰ্শন নিম্নগামী হৈছে আৰু অৱশেষত আজি তেওঁ অৱসৰৰ সিদ্ধান্ত লয়।
