ফ্ৰীজত ৰাখক মাত্ৰ এবাটি নিমখ, লাভ কৰিব এনে চমৎকাৰী উপকাৰিতা…

বাৰিষা কাল বহু লোকৰে প্ৰিয় ঋতু, অৱশ্যে আন একাংশৰ বাবে এই ঋতু হৈ পৰে অত্যন্ত বিৰক্তিকৰ। বাৰিষাৰ সময়ছোৱাত কেতিয়াবা ফ্ৰীজৰ পৰা বেয়া গোন্ধ ওলায়। এই সমস্যা নিমখে দূৰ কৰিব পাৰে। বাৰিষাৰ সময়ত ফ্ৰীজত মাত্ৰ এবাটি নিমখ ৰাখিলে কেইবাটাও উপকাৰ পোৱা যায়। বিশেষকৈ বাৰিষাৰ আৰ্দ্ৰতাৰ সমস্যাৰ সৈতে মোকাবিলা কৰাত ই যথেষ্ট সহায়ক হৈ পৰে। চাওঁ আহক বাৰিষাৰ সময়ত এবাটি নিমখ ফ্ৰীজত ৰাখিলে কি কি উপকাৰিতা পোৱা যায়।

১) আৰ্দ্ৰতা দূৰ কৰেঃ বাৰিষাৰ সময়ত বতাহত আৰ্দ্ৰতাৰ পৰিমাণ বাঢ়ি যায়। সেই আৰ্দ্ৰতা ফ্ৰীজতো দেখা যায়, যাৰ ফলত ফ্ৰীজত থকা খাদ্য তিতি যায়। নিমখে প্ৰাকৃতিকভাৱে পানী শোষণ কৰে। ফলত ফ্ৰীজত নিমখৰ বাটি এটা ৰাখিলে অতিৰিক্ত আৰ্দ্ৰতা শোষণ কৰে।

২) দুৰ্গন্ধ দূৰ কৰেঃ ফ্ৰীজত থকা বিভিন্ন খাদ্যৰ গোন্ধ মিহলি হৈ অপ্ৰীতিকৰ গোন্ধৰ সৃষ্টি কৰে। গোন্ধ দূৰ কৰাতো নিমখ ফলপ্ৰসূ বিবেচিত হয়, গতিকে এবাটি নিমখে ফ্ৰীজ সতেজ আৰু দুৰ্গন্ধমুক্ত কৰি ৰখাত সহায় কৰে।

৩) ভেঁকুৰ ৰোধ কৰেঃ আৰ্দ্ৰতাৰ বাবে ফ্ৰীজত ভেঁকুৰ গঠন হোৱাৰ আশংকা থাকে। নিমখে সেই আৰ্দ্ৰতা হ্ৰাস কৰাত সহায় কৰে আৰু ভেঁকুৰৰ বিস্তাৰ ৰোধ কৰে।

এনে উপকাৰিতা লাভৰ বাবে সৰু বাটি বা কাপ এটা লৈ লওক। বাটিটোত ৩-৪ চামুচ নিমখ লৈ লওক। এই বাটিটো ফ্ৰীজৰ এফালে ৰাখক। অৱশ্যে ৭-১০ দিনৰ মূৰে মূৰে এবাৰ নিমখ সলনি কৰক। ইচ্ছা কৰিলে নিমখৰ লগত বেকিং ছ’ডা অলপ মিহলাই লব পাৰে। ইয়াৰ ফলত দুৰ্গন্ধ দূৰ কৰাৰ ক্ষমতা আৰু অধিক বৃদ্ধি পাব। এই নিমখ শুকান আৰু মুকলি পাত্ৰত ৰাখিব লাগে।