হৃদৰোগৰ পৰা কেনেকৈ হাত সাৰিব? হৃদযন্ত্ৰ সুস্থ কৰি ৰাখিবলৈ এই পৰামৰ্শ মানি চলক…

বিশ্বজুৰি হৃদৰোগৰ হাৰ দ্ৰুতগতিত বৃদ্ধি পাইছে। পূৰ্বে হৃদৰোগৰ আশংকা বেছিকৈ বয়সস্থ লোকৰ মাজত দেখা গৈছিল যদিও বৰ্তমান যুৱক-যুৱতীসকলৰ মাজতো এই ৰোগ দ্ৰুতগতিত বিয়পি পৰিছে। ইয়াৰ মূল কাৰণ হৈছে পৰিৱৰ্তিত জীৱনশৈলী আৰু অস্বাস্থ্যকৰ খাদ্য অভ্যাস।

কৰ্মৰ চাপ বৃদ্ধি, মানসিক চাপ, জাংক ফুড, শাৰীৰিক কাৰ্যকলাপৰ অভাৱে হৃদযন্ত্ৰৰ স্বাস্থ্যৰ ওপৰত প্ৰভাৱ পেলায়। তদুপৰি ধূমপান, অত্যধিক মদ্যপান, টোপনিৰ অভাৱ আদিয়েও হৃদৰোগৰ সম্ভাৱনা বৃদ্ধি কৰে। গৱেষণাৰ পৰা দেখা গৈছে যে, ডায়েবেটিছ আৰু উচ্চ ৰক্তচাপৰ দৰে কাৰকে যুৱক-যুৱতীসকলৰ হৃদৰোগৰ সম্ভাৱনাও বৃদ্ধি কৰে। গতিকে ভৱিষ্যতে হৃদযন্ত্ৰৰ গুৰুতৰ সমস্যাৰ পৰা হাত সাৰিবলৈ সময়মতে হৃদযন্ত্ৰৰ স্বাস্থ্যৰ প্ৰতি সচেতন আৰু মনোযোগ দিয়াটো অতি প্ৰয়োজনীয়।

হৃদযন্ত্ৰ শৰীৰৰ আটাইতকৈ গুৰুত্বপূৰ্ণ অংগ। ই সমগ্ৰ শৰীৰত তেজ পাম্প কৰে। ই তেজৰ যোগেদি শৰীৰৰ প্ৰতিটো অংশলৈ অক্সিজেন আৰু পুষ্টিকৰ উপাদান প্ৰেৰণ কৰে। যদি হৃদযন্ত্ৰই সঠিকভাৱে কাম নকৰে তেন্তে অংগসমূহে পুষ্টিকৰ উপাদান আৰু অক্সিজেন লাভ নকৰে। ইয়াৰ ফলত দুৰ্বলতা, ভাগৰুৱা আৰু গুৰুতৰ স্বাস্থ্যজনিত সমস্যাৰ সৃষ্টি হয়।

হৃদযন্ত্ৰ সুস্থ কৰি ৰাখিবলৈ এই কামবোৰ দৈনিক কৰক

স্বাস্থ্যসন্মত খাদ্য গ্ৰহণ কৰক। সতেজ ফল-মূল, শাক-পাচলি আৰু আঁহযুক্ত খাদ্য তালিকাত অন্তৰ্ভুক্ত কৰক। জাংক আৰু তেলীয়া খাদ্য সীমিত কৰক।

নিয়মিত ব্যায়াম কৰক। প্ৰতিদিনে কমেও ৩০ মিনিট খোজ কঢ়া, দৌৰা বা যোগাসন কৰক। ব্যায়ামে হৃদযন্ত্ৰৰ পেশী শক্তিশালী কৰে আৰু ৰক্ত সঞ্চালন উন্নত কৰে।

ধূমপান আৰু মদ্যপান পৰিহাৰ কৰক। চিগাৰেট সেৱন আৰু মদ্যপানে হৃদযন্ত্ৰৰ ওপৰত যথেষ্ট প্ৰভাৱ পেলায়। ইহঁতে ৰক্তবাহী নলীৰ ক্ষতি কৰে আৰু হাৰ্ট এটেকৰ সম্ভাৱনা বৃদ্ধি কৰে।

চাপ নিয়ন্ত্ৰণ কৰক। ধ্যান, গভীৰ উশাহ-নিশাহৰ প্ৰাণায়ম আদিয়ে মানসিক চাপ কমায়। যাৰ ফলত হৃদৰোগৰ সম্ভাৱনা হ্ৰাস পাব পাৰে।

নিয়মীয়া স্বাস্থ্য পৰীক্ষা কৰক। নিয়মিতভাৱে ৰক্তচাপ, কলেষ্টেৰল, চুগাৰ পৰীক্ষা কৰক। আগতীয়াকৈ ধৰা পৰিলে হৃদযন্ত্ৰৰ গুৰুতৰ ক্ষতি ৰোধ কৰিব পৰা যায়।