Blood Pressure New Guidelines: এতিয়াৰ পৰা ১২০/৮০ ৰক্তচাপ স্বাভাৱিক নহয় ! আমেৰিকান হাৰ্ট এছ’চিয়েশ্যনৰ নতুন নিৰ্দেশনা

উচ্চ ৰক্তচাপৰ সমস্যা আজিৰ দিনত একেবাৰে সাধাৰণ হৈ পৰিছে। প্ৰায় সংখ্যক লোকে বাৰে বাৰে ৰক্তচাপ পৰীক্ষা কৰে আৰু ইয়াৰ ৰিডিং চাই সিদ্ধান্ত লয় যে, ৰক্তচাপ স্বাভাৱিক নে অস্বাভাৱিক। হয়তো আপুনি জানে যে, ৰক্তচাপ কিমান থাকিলে স্বাভাৱিক। কিন্তু এতিয়া এই তথ্য আপডেট কৰা হৈছে। এতিয়া ১২০/৮০ ৰক্তচাপও স্বাভাৱিক নহয়। আমেৰিকান হাৰ্ট এছ’চিয়েশ্যনে ৰক্তচাপৰ ক্ষেত্ৰত নতুন নিৰ্দেশনা জাৰি কৰিছে, য’ত স্বাভাৱিক ৰক্তচাপৰ সীমা হ্ৰাস কৰা হৈছে।

২০১৭ চনৰ আৰম্ভণিতে স্বাভাৱিক ৰক্তচাপৰ সীমা নিৰ্ধাৰণ কৰা হৈছিল, যাৰ মতে উচ্চ ৰক্তচাপৰ স্বাভাৱিক ৰিডিং ১২০ পৰ্যন্ত আছিল। কিন্তু নতুন নিৰ্দেশনা অনুসৰি ইয়াক ১১৫ৰ পৰা ১১৯লৈ সীমাবদ্ধ কৰা হৈছে। একেদৰে নিম্ন চাপৰ স্বাভাৱিক সীমা ৭০ৰ পৰা ৭৯ৰ ভিতৰত ৰখা হৈছে। আমেৰিকান হাৰ্ট এছ’চিয়েশ্যনে যুক্তি আগবঢ়ায় যে, বহুতো গুৰুতৰ ৰোগৰ পৰা হাত সাৰিলে সময়মতে বৃদ্ধি পোৱা ৰক্তচাপ নিয়ন্ত্ৰণ কৰাটো প্ৰয়োজনীয়।

নতুন পৰ্যায় আৰু জৰুৰী অৱস্থা

নতুন গাইডলাইন অনুসৰি ,এতিয়া ৰক্তচাপক কেইবাটাও পৰ্যায়ত ভাগ কৰা হৈছে। যদি উচ্চ ৰক্তচাপ ১৩০তকৈ অধিক আৰু নিম্ন ৰক্তচাপ ৮০তকৈ অধিক হয়, তেন্তে ইয়াক উচ্চ ৰক্তচাপৰ প্ৰথম পৰ্যায় বুলি গণ্য কৰা হয়। আনহাতে যদি ৰক্তচাপ ১৪০/৯০ তকৈ বেছি হয় তেন্তে উচ্চ ৰক্তচাপৰ দ্বিতীয় পৰ্যায়ত আহে। যদি ৰক্তচাপ ১৮০/১২০তকৈ বেছি হয়, তেন্তে ইয়াক গুৰুতৰ অৱস্থা অৰ্থাৎ স্বাস্থ্যজনিত জৰুৰীকালীন বুলি গণ্য কৰা হয় আৰু এই ক্ষেত্ৰত তৎক্ষণাত চিকিৎসকৰ সহায় লোৱাটো প্ৰয়োজনীয়।

উচ্চ ৰক্তচাপ ৰোগীৰ বাবে পৰামৰ্শ

উচ্চ ৰক্তচাপ ৰোগীৰ বাবে কিছুমান গুৰুত্বপূৰ্ণ পৰামৰ্শ দিয়া হৈছে। যদি আপোনাৰ ৰক্তচাপ ১২০ৰ পৰা ১৩৯ৰ ভিতৰত হয়, তেন্তে প্ৰথমে জীৱনশৈলীত তাৎক্ষণিক পৰিৱৰ্তন কৰিব লাগে। যদি তিনিমাহলৈকে কোনো উপকাৰ দেখা নাযায়, তেন্তে চিকিৎসকৰ পৰামৰ্শ মতে ঔষধ আৰম্ভ কৰিব পাৰে। আনহাতে যদি আপোনাৰ ৰক্তচাপ প্ৰায়ে ১৪০ তকৈ বেছি হয়, তেন্তে তৎক্ষণাত ৰক্তচাপ নিয়ন্ত্ৰণকাৰী ঔষধ খোৱাটো প্ৰয়োজনীয়। যদি নিম্ন ৰক্তচাপ ১৮০তকৈ অধিক হয়, তেন্তে ইয়াক গুৰুতৰ জৰুৰীকালীন অৱস্থা বুলি গণ্য কৰি তৎক্ষণাত চিকিৎসালয়লৈ যাব লাগে।

আমেৰিকা আৰু ভাৰতত প্ৰভাৱ

নতুন গাইডলাইন অনুসৰি আমেৰিকাৰ প্ৰায় ৩ কোটি লোকক উচ্চ ৰক্তচাপৰ শ্ৰেণীত অন্তৰ্ভুক্ত কৰা হৈছে। ভাৰততো যদি ইয়াক কাৰ্যকৰী কৰা হয়, তেন্তে উচ্চ ৰক্তচাপ ৰোগীৰ সংখ্যা ২০-৩০% বৃদ্ধি পাব পাৰে।

পৰিৱৰ্তিত ৰক্তচাপৰ গণনাৰ ইতিহাস

ৰক্তচাপৰ হিচাপ সময়ে সময়ে আপডেট হৈ আহিছে। ১৯৬০ চনৰ গাইডলাইন অনুসৰি ১২০-১৫৯ জনক প্ৰি-হাইপাৰটেনচন আৰু ১৬০ তকৈ অধিকক হাইপাৰটেনচন বুলি গণ্য কৰা হৈছিল। ১৯৭৭ চনত ইয়াক আপডেট কৰি প্ৰি-হাইপাৰটেনচনৰ সীমা ১৩৯ লৈকে ৰখা হয় আৰু ১৪০ তকৈ অধিক হাইপাৰটেনচনত ৰখা হয়। ইয়াৰ পিছত ২০১৭ চনত চিষ্টোলিক ১২৯ লৈকে প্ৰি-হাইপাৰটেনচন আৰু ১৩০ তকৈ অধিক হাইপাৰটেনচন বুলি গণ্য কৰা হৈছিল। আৰু এতিয়া ২০২৫ চনৰ নতুন গাইডলাইনত প্ৰথমবাৰৰ বাবে স্বাভাৱিক ৰক্তচাপৰ সীমা ১২০তকৈও কমলৈ হ্ৰাস কৰা হৈছে।

লাভ কাৰ হয়?

বাৰে বাৰে ৰক্তচাপৰ সীমা সলনি কৰাৰ আঁৰৰ প্ৰশ্নটো হ’ল সঁচাকৈয়ে ই আপোনাৰ স্বাস্থ্যৰ বাবে চিন্তাৰ বিষয় নে ঔষধ কোম্পানীসমূহৰ লাভৰ বিষয়? এই যুক্তি দিয়া হৈছে কাৰণ আমেৰিকান হাৰ্ট এছ’চিয়েশ্যনৰ পুঁজিৰ এক বৃহৎ অংশ বিভিন্ন ফাউণ্ডেশ্যন আৰু ঔষধ কোম্পানীসমূহৰ পৰা লাভ কৰা অনুদানৰ পৰা আহে। এনে পৰিস্থিতিত প্ৰশ্ন উত্থাপন হয় যে বাৰে বাৰে ৰক্তচাপৰ সীমা সলনি কৰাৰ আঁৰত ঔষধ কোম্পানীক সন্তুষ্ট কৰাৰ কাৰণ আছে নেকি?