শীতকালত সদায় গা ধুব লাগে নে? কি ক্ষতি হ’ব পাৰে জানক…

শীতকাল ওচৰ চাপি অহাৰ লগে লগে মানুহৰ মনত এটা সাধাৰণ প্ৰশ্ন উত্থাপন হয়: এই বতৰত প্ৰতিদিনে গা ধুব লাগেন)? বহুতে ঠাণ্ডা দিনত ৰাতিপুৱা সোনকালে গা ধুবলৈ অসুবিধা পায়, আন কিছুমানে অভ্যাস বা পৰিষ্কাৰ-পৰিচ্ছন্নতাৰ বাবে দৈনিক গা ধোৱে। কিন্তু সঁচাকৈয়ে শীতকালত প্ৰতিদিনে গা ধোৱাটো প্ৰয়োজনীয় নেকি? আৰু শীতকালত প্ৰতিদিনে গা ধোৱাটো উচিত নেকি (Should We Bath Everyday)? এই প্ৰশ্নবোৰৰ উত্তৰ জানো আহক।

ই ছালৰ ক্ষতি কৰে নেকি?

আচলতে শীতকালৰ ঠাণ্ডা আৰু শুকান বতাহে ইতিমধ্যে আমাৰ ছালৰ আৰ্দ্ৰতা কমাই দিয়ে। এনে পৰিস্থিতিত প্ৰতিদিনে গৰম পানীৰে গা ধুই সঘনাই চাবোন বা বডি ৱাছ ব্যৱহাৰ কৰিলে ছালৰ প্ৰাকৃতিক তেল আঁতৰাই পেলায়। এই প্ৰাকৃতিক তেলে ছালখন মইশ্ব’ৰাইজিং আৰু সুৰক্ষা প্ৰদান কৰাত গুৰুত্বপূৰ্ণ ভূমিকা পালন কৰে। ইয়াৰ ফলত ছালৰ সমস্যা যেনে শুকান, টনা, খজুৱতি, আনকি একজিমাও হ’ব পাৰে।

সংক্ৰমণৰ আশংকা

ইয়াৰ উপৰিও আমাৰ ছালত কিছুমান ভাল বেক্টেৰিয়া থাকে যিয়ে ছালখনক সংক্ৰমণৰ পৰা ৰক্ষা কৰে। দৈনিক গা ধোৱা আৰু অত্যধিক চাফ-চিকুণ কৰিলে এই প্ৰাকৃতিক বাধা দুৰ্বল হৈ ছালখন অধিক সংবেদনশীল হৈ পৰে আৰু ছালৰ সংক্ৰমণৰ সম্ভাৱনা বৃদ্ধি পায়।

গৰম পানীয়ে ছালৰ ক্ষতি কৰে

শীতকালত গা ধোৱাৰ আন এটা ডাঙৰ অসুবিধা হ’ল অতি গৰম পানী ব্যৱহাৰ কৰা। গৰম পানীয়ে ছালৰ ওপৰৰ তৰপটোক ক্ষতিগ্ৰস্ত কৰে আৰু আৰ্দ্ৰতা অধিক সোনকালে আঁতৰাই পেলায়। গতিকে গা ধোৱাৰ প্ৰয়োজন হ’লে কুহুমীয়া পানী ব্যৱহাৰ কৰাটো ভাল। লগতে গা ধোৱাটো বেছি সময় হ’ব নালাগে।

আমি শীতকালত গা ধোৱা বন্ধ কৰিব লাগেনে?

অৱশ্যে ইয়াৰ অৰ্থ এইটো নহয় যে শীতকালত গা ধোৱাটো এৰি দিব লাগে। দিনটোৰ ধূলি, প্ৰদূষণ, মলি ছালৰ পৰা আঁতৰাবলৈ গা ধোৱাটো অতি প্ৰয়োজনীয়। দৈনিক গা ধুই নাথাকিলেও শৰীৰৰ যিবোৰ অংশ বেছি ঘাম ওলায়, যেনে- বাহুৰ তলৰ অংশ, ভৰি, মুখ, ব্যক্তিগত অংশ পৰিষ্কাৰ কৰিব লাগে।

গা ধোৱাৰ সঠিক উপায় কি?

শীতকালত দুদিনৰ মূৰে মূৰে গা ধোৱাটো এটা ভাল বিকল্প হ’ব পাৰে, বিশেষকৈ যদি আপোনাৰ ছাল শুকান বা সংবেদনশীল। গা ধোৱাৰ লগে লগে মইশ্ব’ৰাইজাৰ, বডি লোচন, বা পাতল তেল লগোৱাটোও গুৰুত্বপূৰ্ণ যাতে ছালখন মইশ্ব’ৰাইজ হৈ থাকে।