মূৰৰ বিষ বা গাঁঠিৰ বিষ ! সঘনাই পেইনকিলাৰ সেৱন কৰিলে আপোনাৰ বৃক্কৰ ক্ষতি হ’ব পাৰে, এই লক্ষণবোৰ দেখা দিলে সাৱধান হওক…
বিষনাশক ঔষধে কম সময়ৰ বাবেহে সকাহ দিব পাৰে; কিন্তু স্থায়ী নিৰাময় নহয়। চিকিৎসকৰ পৰামৰ্শ নোলোৱাকৈ বাৰে বাৰে বিষনাশক ঔষধ সেৱন কৰিলে বৃক্কৰ ক্ষতি হ’ব পাৰে, যাৰ ফলত আপুনি গুৰুতৰ ৰোগত আক্ৰান্ত হ’ব পাৰে।
বৰ্তমান সময়ত মানুহে প্ৰায়ে মূৰৰ বিষ, কঁকালৰ বিষ, গাঁঠিৰ বিষ বা পিৰিয়ডৰ বিষৰ পৰা সকাহ পাবলৈ বিষনাশক(painkiller) ঔষধ খায়। আনকি কিছুমান মানুহে সামান্য বিষ অনুভৱ কৰাৰ লগে লগে পেইনকিলাৰ খোৱাৰ আৰম্ভ কৰে। কিন্তু আপুনি জানেনে যে, বাৰে বাৰে পেইনকিলাৰ ঔষধ সেৱন কৰিলে আপোনাৰ বৃক্কত প্ৰত্যক্ষ প্ৰভাৱ পৰে? বিশেষজ্ঞসকলৰ মতে বিষ কিছু সময়ৰ বাবে নাইকিয়া হ’লেও ক্ৰমান্বয়ে বৃক্কৰ স্বাস্থ্যৰ অৱনতি ঘটিব পাৰে।
বিষনাশক ঔষধে কম সময়ৰ বাবেহে সকাহ দিব পাৰে; কিন্তু স্থায়ী নিৰাময় নহয়। চিকিৎসকৰ পৰামৰ্শ নোলোৱাকৈ বাৰে বাৰে বিষনাশক ঔষধ সেৱন কৰিলে বৃক্কৰ ক্ষতি হ’ব পাৰে, যাৰ ফলত আপুনি গুৰুতৰ ৰোগত আক্ৰান্ত হ’ব পাৰে। শৰীৰৰ যিকোনো ঠাইত বিষ হ’লে প্ৰথমে পৰীক্ষা কৰাব লাগে, কেৱল জৰুৰীকালীন অৱস্থাত বা চিকিৎসকৰ পৰামৰ্শ মতেহে বিষনাশক ঔষধ খাব লাগে।
বিষনাশক ঔষধে কেনেকৈ কাম কৰে?
ডাঃ হিমাংশু ভাৰ্মাই কয় যে, বেছিভাগ বিষনাশক ঔষধে (যেনে ইবুপ্ৰ’ফেন, ডাইক্ল’ফেনাক, নেপ্ৰ’ক্সেন আদি) শৰীৰত গঠিত “প্ৰষ্টাগ্লেণ্ডিন”ক বাধা দিয়ে। এই ৰাসায়নিক পদাৰ্থৰ ফলত শৰীৰত বিষ আৰু ফুলি উঠে। ঔষধে এই প্ৰক্ৰিয়াক বন্ধ কৰি দিলে বিষ কমি যায়। কিন্তু এই প্ৰষ্টাগ্লেণ্ডিনে কিডনীলৈ তেজৰ সোঁত বজাই ৰখাতো সহায় কৰে। অৰ্থাৎ বিষনাশক ঔষধ বাৰে বাৰে সেৱন কৰিলে বৃক্কলৈ তেজৰ সোঁত কমি যাব পাৰে।
কিডনীৰ ওপৰত ইয়াৰ প্ৰভাৱ কি হ’ব?
তেজৰ যোগান কমি যায়- বিষনাশক ঔষধ বাৰে বাৰে খালে বৃক্কলৈ তেজৰ যোগান কমি যায়, যাৰ বাবে ইয়াৰ কাৰ্যক্ষমতা কমিবলৈ আৰম্ভ কৰে।
বৃক্কৰ ক্ষতিৰ আশংকা- ঔষধ অবিৰতভাৱে গ্ৰহণ কৰিলে “এনালজেচিক নেফ্ৰ’পেথী” নামৰ এটা অৱস্থা হ’ব পাৰে, য’ত বৃক্ক লাহে লাহে বেয়া হ’বলৈ আৰম্ভ কৰে।
ক্ৰনিক কিডনী ডিজিজ (CKD) – এই অভ্যাস যদি দীৰ্ঘদিন ধৰি চলি থাকে, তেন্তে এজন ব্যক্তি ক্ৰনিক কিডনী ডিজিজৰ ৰোগী হ’ব পাৰে।
ৰক্তচাপ বৃদ্ধি- বিষনাশক ঔষধে বৃক্কৰ লগতে ৰক্তচাপতো প্ৰভাৱ পেলায় ।
প্ৰাৰম্ভিক লক্ষণসমূহৰ প্ৰতি গুৰুত্ব দিব লাগে
যদি আপুনি বাৰে বাৰে বিষনাশক ঔষধ সেৱন কৰে আৰু এই লক্ষণসমূহৰ কোনো এটা দেখা পায়, তেন্তে লগে লগে চিকিৎসকৰ পৰামৰ্শ লওক। ইয়াৰ লক্ষণবোৰ হৈছে-ভৰি বা ভৰিৰ গোৰোহা ফুলা, প্ৰস্ৰাৱ কম বা প্ৰস্ৰাৱত ফেন ওলোৱা, ক্লান্তি আৰু দুৰ্বলতা, ৰক্তচাপ বৃদ্ধি,ভোক কমি যোৱা আদি।
বিষনাশক ঔষধ খোৱাৰ অভ্যাস নকৰিব। বিষ সহ্য কৰাৰ পৰিৱৰ্তে ইয়াৰ প্ৰকৃত কাৰণ বিচাৰি উলিয়াওক আৰু চিকিৎসা লওক। চিকিৎসকৰ পৰামৰ্শ মতেহে ঔষধ খাব লাগে।
