সাৱধান, ফেটি লিভাৰে বঢ়াব পাৰে ডায়েবেটিছৰ শংকা! বিপদত পৰাৰ পূৰ্বেই জানি লওক লক্ষণ তথা প্ৰতিকাৰৰ উপায়
যেতিয়া লিভাৰত প্ৰয়োজনতকৈ অধিক চৰ্বি জমা হয়, তেতিয়া ই লিভাৰৰ স্বাভাৱিক কাম-কাজত বাধা দিয়ে। ইয়াৰ পোনপটীয়া প্ৰভাৱ আমাৰ শৰীৰৰ বিপাকীয় ক্ৰিয়া আৰু তেজৰ চুগাৰ লেভেলৰ ওপৰত পৰে, যি পৰৱৰ্তী সময়ত ডায়েবেটিছৰ সৃষ্টি কৰিব পাৰে।
বৰ্তমান সময়ত ফেটি লিভাৰ এক গুৰুতৰ স্বাস্থ্যজনিত সমস্যা হৈ পৰিছে। এই সমস্যা কেৱল বয়সস্থ লোকৰে নহয়, বৰঞ্চ ভুল খাদ্যাভ্যাস আৰু শাৰীৰিক পৰিশ্ৰমৰ অভাৱত যুৱ প্ৰজন্মও ইয়াৰ চিকাৰ হৈছে। যেতিয়া লিভাৰত প্ৰয়োজনতকৈ অধিক চৰ্বি জমা হয়, তেতিয়া ই লিভাৰৰ স্বাভাৱিক কাম-কাজত বাধা দিয়ে। ইয়াৰ পোনপটীয়া প্ৰভাৱ আমাৰ শৰীৰৰ বিপাকীয় ক্ৰিয়া আৰু তেজৰ চুগাৰ লেভেলৰ ওপৰত পৰে, যি পৰৱৰ্তী সময়ত ডায়েবেটিছৰ সৃষ্টি কৰিব পাৰে।
ফেটি লিভাৰৰ পৰা কিদৰে হয় ডায়েবেটিছ!
দিল্লীস্থিত লেডী হাৰ্ডিং হাস্পতালৰ চিকিৎসক ড° এল.এইচ. ঘটেকাৰৰ মতে, লিভাৰে শৰীৰত চুগাৰ নিয়ন্ত্ৰণ কৰাত গুৰুত্বপূৰ্ণ ভূমিকা পালন কৰে। লিভাৰত অতিৰিক্ত চৰ্বি জমা হ’লে শৰীৰত ইনচুলিনে সঠিকভাৱে কাম কৰিব নোৱাৰা হয়। এই অৱস্থাত লিভাৰে তেজত প্ৰয়োজনতকৈ অধিক গ্লুক’জ এৰি দিয়ে, ফলত তেজত চুগাৰৰ মাত্ৰা বৃদ্ধি পায়।
দীৰ্ঘদিন ধৰি এই সমস্যা চলি থাকিলে ইনচুলিন প্ৰস্তুত কৰা পেনক্ৰিয়াছৰ ওপৰত অধিক চাপ পৰে, যি শেষত ডায়েবেটিছৰ ৰূপ লয়। দীৰ্ঘদিনীয়া ফেটি লিভাৰৰ সমস্যাই অগ্নাশয়ৰ ওপৰত অধিক চাপ পেলায়। ইয়াৰ ফলত ফেটি লিভাৰ আৰু ডায়েবেটিছৰ মাজত প্ৰত্যক্ষ সম্পৰ্ক দেখা যায়।
প্ৰধান লক্ষণসমূহ
ফেটি লিভাৰ আৰু ডায়েবেটিছৰ বিপদ হ’লে শৰীৰত কিছুমান বিশেষ লক্ষণে দেখা দিব পাৰে। এনে কিছু লক্ষণ হৈছে-
অত্যধিক ভাগৰঃ সামান্য কাম কৰিলেই ভাগৰুৱা অনুভৱ কৰা বা দুৰ্বলতা।
পিয়াহ আৰু প্ৰস্ৰাৱঃ সঘনাই পিয়াহ লগা আৰু বাৰে বাৰে প্ৰস্ৰাৱ হোৱা।
ওজন বৃদ্ধিঃ বিশেষকৈ পেটৰ চাৰিওফালে অতিৰিক্ত চৰ্বি বা চৰ্বিযুক্ত পেট।
ভোকৰ সমস্যাঃ খুব বেছি ভোক লগা কিন্তু শৰীৰত শক্তিৰ অভাৱ অনুভৱ কৰা।
অন্যান্য লক্ষণঃ ছাল শুকাই যোৱা, শৰীৰৰ কটা-ছিঙা সোনকালে নুশুকুৱা আৰু সঘনাই ইনফেকচন হোৱা।
পৰিত্ৰাণৰ উপায়
ফেটি লিভাৰ আৰু ডায়েবেটিছে যিকোনো ব্যক্তিৰ জীৱন বিপৰ্যস্ত কৰি তুলিব পাৰে। অৱশ্যে জীৱনশৈলীৰ সামান্য পৰিৱৰ্তনে আপোনাক এই বিপদৰ পৰা ৰক্ষা কৰিব পাৰে। জানো আহক এই বিষয়ে-
ওজন নিয়ন্ত্ৰণঃ শৰীৰৰ ওজন সঠিক পৰ্যায়ত ৰাখিবলৈ চেষ্টা কৰক।
খাদ্যাভ্যাসঃ বেছি তেলত ভজা, চৰ্বিযুক্ত আৰু মিঠা খাদ্য পৰিহাৰ কৰক।
শাৰীৰিক ব্যায়ামঃ দৈনিক অন্তত ৩০ মিনিট খোজ কঢ়া বা লঘূ ব্যায়াম কৰাৰ অভ্যাস কৰক।
নিচাযুক্ত দ্ৰব্যঃ মদ্যপানৰ পৰা সম্পূৰ্ণ আঁতৰি থকাটো লিভাৰৰ বাবে অতি প্ৰয়োজনীয়।
নিয়মিত পৰীক্ষাঃ মাজে মাজে তেজৰ চুগাৰ আৰু লিভাৰৰ অৱস্থা (LFT) পৰীক্ষা কৰাই থাকক।
