মহিলাৰ ছাৰ্ভাইকেল কেন্সাৰৰ প্ৰধান লক্ষণসমূহ কি কি? কাৰণ, উপায় জানক…

মহিলাৰ চতুৰ্থ সৰ্বাধিক সাধাৰণ কেন্সাৰ হৈছে ছাৰ্ভাইকেল কেন্সাৰ, আৰু ইয়াৰ ফলত হোৱা মৃত্যু বিশ্ব স্বাস্থ্যৰ বাবে এক ডাঙৰ চিন্তাৰ বিষয় হৈ আছে। বিশ্ব স্বাস্থ্য সংস্থাৰ (WHO) প্ৰতিবেদন অনুসৰি ২০২২ চনত বিশ্বজুৰি নতুনকা প্ৰায় ৬ লাখ ৬০ হাজাৰ  ছাৰ্ভাইকেল কেন্সাৰত আক্ৰান্ত হোৱাৰ তথ্য পোৱা গৈছে। ইয়াৰে ৩ লাখ ৫০ হাজাৰ মহিলাৰ মৃত্যু হৈছিল। এই পৰিসংখ্যাসমূহে এই ৰোগৰ ভয়াৱহতা আৰু আগতীয়াকৈ সজাগতা, পৰীক্ষা, আৰু টিকাকৰণৰ গুৰুত্বৰ বিষয়ে বুজাইছে।

ছাৰ্ভাইকেল কেন্সাৰ হৈছে মহিলাৰ প্ৰজনন তন্ত্ৰৰ এক মাৰাত্মক ৰোগ, যিটো জৰায়ুৰ তলৰ অংশ বা জৰায়ুৰ মুখত দেখা দিয়ে। এই অংশই জৰায়ুক যোনিৰ লগত সংযোগ কৰে। জৰায়ুৰ মুখৰ কোষবোৰ অস্বাভাৱিকভাৱে বৃদ্ধি হৈ শৰীৰৰ আন অংশলৈ বিয়পিলে এই কৰ্কট ৰোগ হয়। এই কৰ্কট ৰোগ বিশেষকৈ মহিলাসকলক আক্ৰান্ত কৰে আৰু তৎকালীনভাৱে ৰোগ নিৰ্ণয় আৰু চিকিৎসা নকৰিলে ই মাৰাত্মক হ’ব পাৰে।

কিহৰ ফলত ছাৰ্ভাইকেল কেন্সাৰ হয়?

জৰায়ুৰ মুখৰ কৰ্কট ৰোগৰ বহু কাৰণ আছে। হিউমেন পেপিলোমা ভাইৰাছ (HPV) সংক্ৰমণ আটাইতকৈ বেছি। এইচ পি ভি হৈছে সংগমৰ দ্বাৰা বিয়পি পৰা এটা সাধাৰণ ভাইৰাছ। ইয়াৰ কিছুমান প্ৰকাৰৰ ফলত ছাৰ্ভাইকেল কেন্সাৰ হ’ব পাৰে। সঘনাই সংগী সলনি হ’লে বা অসুৰক্ষিত যৌন সম্পৰ্কই এই আশংকা বৃদ্ধি কৰে। কম বয়সতে যৌন সম্পৰ্ক আৰম্ভ কৰিলেও ইয়াৰ সম্ভাৱনা বৃদ্ধি পায়, কিয়নো শৰীৰ সম্পূৰ্ণ প্ৰস্তুত নহয়।

ধূমপানে এই কেন্সাৰৰ সম্ভাৱনাও বৃদ্ধি কৰে কাৰণ ইয়াৰ ফলত ৰোগ প্ৰতিৰোধ ক্ষমতা দুৰ্বল হৈ পৰে আৰু এইচ পি ভিৰ বিৰুদ্ধে যুঁজিবলৈ ইয়াৰ ক্ষমতা কম হয়। দীৰ্ঘদিন ধৰি গৰ্ভনিৰোধক বড়ি সেৱন কৰিলে ছাৰ্ভাইকেল কেন্সাৰৰ সম্ভাৱনা বৃদ্ধি পাব পাৰে।

ছাৰ্ভাইকেল কেন্সাৰৰ লক্ষণসমূহ কি কি?

ছাৰ্ভাইকেল কেন্সাৰ হৈছে শৰীৰত লাহে লাহে বিয়পি পৰা ৰোগ, আৰু প্ৰথম অৱস্থাত সাধাৰণতে কোনো লক্ষণ দেখা নাযায়। এই কাৰণেই ইয়াক “মৌন হত্যাকাৰী” বুলি কোৱা হয়। কিন্তু এই কেন্সাৰৰ সংক্ৰমণ বাঢ়ি যোৱাৰ লগে লগে শৰীৰে কিছুমান বিশেষ সংকেত দিবলৈ আৰম্ভ কৰে যিবোৰ চিনাক্ত কৰাটো অতি গুৰুত্বপূৰ্ণ। যেনে- সংগমৰ পিছত ৰক্তক্ষৰণ অস্বাভাৱিক। ই জৰায়ুৰ মুখৰ কোষৰ পৰিৱৰ্তনৰ লক্ষণ হ’ব পাৰে। স্বাভাৱিক বগা স্ৰাৱ গন্ধহীন। কিন্তু যদি ইয়াৰ দুৰ্গন্ধ হয়, ডাঠ বা হালধীয়া হয় বা স্থায়ী হৈ থাকে তেন্তে ই সংক্ৰমণ বা কেন্সাৰৰ লক্ষণ হ’ব পাৰে।

পেটৰ তলৰ অংশ বা পেলভিক অংশত অহৰহ বিষ হোৱাটোৱেও কেন্সাৰ বিয়পি পৰাৰ ইংগিত দিব পাৰে। প্ৰস্ৰাৱ কৰাৰ সময়ত জ্বলা-পোৰা বা বিষ হোৱা, বা সঘনাই প্ৰস্ৰাৱ কৰিবলৈ হেঁপাহ হোৱা, ছাৰ্ভাইকেল অংশৰ পৰিৱৰ্তনৰ বাবে হ’ব পাৰে। তদুপৰি শৰীৰৰ তেজ ক্ষয় হ’বলৈ আৰম্ভ কৰিলে ক্লান্তি হ’ব পাৰে। ইয়াৰ ফলত কেন্সাৰ ৰোগ হ’ব পাৰে।

ছাৰ্ভাইকেল কেন্সাৰ কেনেকৈ প্ৰতিৰোধ কৰিব পাৰি

এইচ পি ভি ভেকচিন

৯ৰ পৰা ২৬ বছৰ বয়সৰ ভিতৰত এই ভেকচিন লোৱাটো অতি ফলপ্ৰসূ বুলি বিবেচিত হয়। ই ভাইৰাছৰ বিৰুদ্ধে যুঁজিবলৈ শৰীৰক প্ৰস্তুত কৰে।

পেপ স্মিয়ৰ টেষ্ট

এইটো এটা স্ক্ৰীনিং টেষ্টৰ দ্বাৰা কৰ্কট ৰোগৰ প্ৰাৰম্ভিক পৰ্যায়ত লক্ষণ ধৰা পেলাব পাৰি। এই পৰীক্ষাটো ২১ বছৰ বয়সৰ পৰা আৰম্ভ কৰি প্ৰতি তিনি বছৰৰ মূৰে মূৰে কৰিব লাগে।

নিৰাপদ যৌন সম্পৰ্ক

সংগমৰ সময়ত কণ্ডম ব্যৱহাৰ কৰিব লাগে।

ধূমপান পৰিহাৰ কৰক

ইয়াৰ ফলত কেৱল ছাৰ্ভাইকেল কেন্সাৰৰ পৰাই নহয় আন বহুতো ৰোগৰ পৰাও সুৰক্ষা পোৱা যায়।

পৰিচ্ছন্নতা

ব্যক্তিগত অংশৰ পৰিষ্কাৰ-পৰিচ্ছন্নতা বজাই ৰাখক আৰু সংক্ৰমণ ৰোধ কৰক।