সামান্য কাণৰ বিষ হ’ব পাৰে গুৰুতৰ ৰোগৰ লক্ষণ! কেনেকৈ চিনাক্ত কৰিব?

কাণৰ বিষ এটা সাধাৰণ সমস্যা, কিন্তু সদায় সাধাৰণ চৰ্দিৰ ফলত নহয়। কেতিয়াবা ই শৰীৰৰ গভীৰ সমস্যাৰ ইংগিতও দিব পাৰে। বিশেষকৈ যদি কাণৰ বিষ দীৰ্ঘদিনীয়া হয়, তাৰ লগত জ্বৰ, শ্ৰৱণ ক্ষমতা হেৰুৱা, তেজ বা পূজৰ স্ৰাৱ, মূৰৰ বিষ বা ডিঙিৰ জঠৰতা—তেন্তে বিষয়টো সহজভাৱে লোৱাটো ভাল।

চৰ্দিৰ ফলত কাণৰ বিষ: সাধাৰণ চৰ্দি, জ্বৰ বা ইনফ্লুৱেঞ্জা হ’লে নাক-মুখ-কাণৰ সংযোগস্থলত প্ৰদাহ হয়। ইয়াৰ ফলত ইউষ্টেচিয়ান টিউব বন্ধ হৈ যায়, যাৰ ফলত কাণত চাপ আৰু বিষ হয়। প্ৰায়ে নিজে নিজে নোহোৱা হৈ যায় যদিও চাইনাছ বা চৰ্দি দীৰ্ঘদিনীয়া হ’লে চিকিৎসাৰ প্ৰয়োজন হয়।

 কাণৰ বিষৰ আন প্ৰধান কাৰণ

১) কাণ পকা (Otitis Media): শিশু আৰু প্ৰাপ্তবয়স্কৰ ক্ষেত্ৰত অতি সাধাৰণ। ইয়াৰ ফলত কাণত প্ৰচণ্ড বিষ, পূজ, জ্বৰ, শ্ৰৱণ ক্ষমতা হেৰুওৱা আদি হ’ব পাৰে। চিকিৎসা নকৰিলে শ্ৰৱণ ক্ষমতা স্থায়ীভাৱে ক্ষতিগ্ৰস্ত হ’ব পাৰে।

২) কাণৰ পৰ্দা ফাটি যোৱা: প্ৰচণ্ড শব্দ, আঘাত বা দীৰ্ঘদিনীয়া সংক্ৰমণৰ ফলত কাণৰ পৰ্দা ফাটিব পাৰে। ইয়াৰ ফলত হঠাৎ তীব্ৰ বিষ হ’ব পাৰে আৰু তেজ বা তৰল পদাৰ্থ ওলাই যাব পাৰে।

৩) ভেঁকুৰৰ সংক্ৰমণ (Otomycosis): কাণত অস্বস্তি, খজুৱতি, আৰু কাণত বগা বা ক’লা পদাৰ্থ দেখা দিয়ে। বাৰিষা বা সঘনাই পানী সোমালে এই ৰোগ হয়।

৪) টনচিল বা দাঁতৰ সমস্যাঃ কেতিয়াবা কাণৰ লগত প্ৰত্যক্ষ সম্পৰ্ক নথকা সমস্যাৰ ফলতো কাণৰ বিষ হব পাৰে। যেনে, দাঁতৰ সংক্ৰমণ, ডিঙিত টনচিল ফুলা, বা জ্বৰ।

৫) একাউষ্টিক নিউৰ’মা বা টিউমাৰ: অতি বিৰল হ’লেও ই কাণত দীৰ্ঘদিনীয়া বিষ আৰু কাণত বাজি থকা আদি জটিল ৰোগৰ লক্ষণ হ’ব পাৰে।

কি কৰিব?

১) গৰম কম্প্ৰেছ আৰু বিষনাশক ঔষধে সাময়িক সকাহ দিলেও চিকিৎসকৰ পৰামৰ্শ লব লাগে।

২) কাণত তেল বা পানী ঢালি নিদিব।

৩) যদি আপোনাৰ শিশুটিৰ কাণৰ বিষ হয় তেন্তে ইয়াক আওকাণ নকৰিব আৰু ই এন টি বিশেষজ্ঞক দেখুৱাব।

৪) কাণ পৰিষ্কাৰ কৰাৰ সময়ত সাৱধান হওক।

সাধাৰণ চৰ্দিৰ পৰা জটিল ৰোগলৈকে—কাণৰ বিষৰ আঁৰত বহু কাৰণ আছে। গতিকে বাৰে বাৰে বা তীব্ৰ বিষ হ’লে চিকিৎসকৰ পৰামৰ্শ নোলোৱাকৈ আওকাণ নকৰাই ভাল। আগতীয়া সজাগতাই আপোনাক ডাঙৰ বিপদৰ পৰা ৰক্ষা কৰিব পাৰে।