Waqf Property in India: কেন্দ্ৰৰ হাতত ৱাকফৰ সম্পত্তিৰ খতিয়ান, অসমত ৱাকফৰ কিমান সম্পত্তি আছে?

অন্তিম তাৰিখ আছিল ৬ ডিচেম্বৰ। তাৰ ভিতৰত সকলো ৰাজ্যই নিজ নিজ ৰাজ্যক ৱাকফ সম্পত্তিৰ ৰেকৰ্ড কেন্দ্ৰীয় পৰ্টেল ‘উমিদ’ত পঞ্জীয়ন কৰিবলৈ নিৰ্দেশ দিয়া হৈছিল। ঠিক তেনেকৈয়ে কেন্দ্ৰীয় পৰ্টেলত ৱাকফৰ ৰেকৰ্ডবোৰ পঞ্জীয়ন কৰা হ’ল। এই পৰ্যন্ত সমগ্ৰ দেশতে কেন্দ্ৰীয় পৰ্টেল ‘উমীদ’ (UMEED)ত ৫ লাখ ১৭ হাজাৰ ৱাকফৰ সম্পত্তি পঞ্জীয়ন কৰা হৈছে। ইয়াৰে ২ লাখ ১৬ হাজাৰ ৯০৫ টা ৱাকফ সম্পত্তিৰ অনুমোদন লাভ কৰা বুলি প্ৰকাশ কৰিছে কেন্দ্ৰীয় সংখ্যালঘু পৰিক্ৰমা মন্ত্ৰালয়ে।

উচ্চতম ন্যায়ালয়ে কৈছিল যে দেশৰ সকলো ৱাকফৰ সম্পত্তি কেন্দ্ৰীয় ‘উমীদ’ পৰ্টেলত পঞ্জীয়ন কৰাটো বাধ্যতামূলক। তাৰ আধাৰত কেন্দ্ৰীয় সংখ্যালঘু পৰিক্ৰমা মন্ত্ৰালয়ে ৬ জুনত সংশ্লিষ্ট পৰ্টেলটো তৈয়াৰ কৰে। ছমাহৰ সময়সীমা দিয়া হয়। অন্তিম তাৰিখ আছিল ৬ ডিচেম্বৰ।

এই সন্দৰ্ভত সোমবাৰে সংখ্যালঘু পৰিক্ৰমা মন্ত্ৰালয়ে প্ৰকাশ কৰে এক বিবৃতি। তাত তেওঁলোকে কৈছিল, ‘‘সম্পত্তিৰ পঞ্জীয়নৰ পৰিমাণ আৰম্ভণিতকৈ শেষত বহু বেছি। ভাৰপ্ৰাপ্ত বিষয়াসকলে প্ৰশিক্ষণৰ ব্যৱস্থা কৰিছিল। সেইটোৱে এই কামটো ক্ষিপ্ৰ কৰাত বহুত সহায় কৰিছে।’’

বৰ্তমান ছমাহৰ গণনা অনুসৰি ৫ লাখ ১৭ হাজাৰ ৪০ টা ৱাকফৰ সম্পত্তি পঞ্জীয়ন কৰা হৈছে। ইয়াৰে ২ লাখ ১৬ হাজাৰ ৯০৫ টা সম্পত্তিৰ অনুমোদন লাভ কৰিছে। পঞ্জীয়নৰ সময়ত পৰীক্ষণ প্ৰক্ৰিয়াৰ জৰিয়তে ১০ হাজাৰ ৮৬৯ টা সম্পত্তি বাতিল কৰা হৈছে। কিন্তু কোনখন ৰাজ্যৰ পৰা কিমান সম্পত্তি পঞ্জীয়ন কৰা হৈছে? এই তথ্য প্ৰদান কৰিছে সংশ্লিষ্ট মন্ত্ৰণালয়ে।

কেন্দ্ৰীয় পৰিসংখ্যা অনুসৰি সৰ্বাধিক পঞ্জীয়নভুক্ত ৱাকফ সম্পত্তি আছে উত্তৰ প্ৰদেশত। ইয়াৰ মুঠ ৯২,৮৩০টা। ইয়াৰে ৮৬,৩৪৫ টা চুন্নী আৰু ৬,৪৮৫ টা ছিয়া সম্প্ৰদায়ৰ। দ্বিতীয় স্থানত আছে মহাৰাষ্ট্ৰ। মুঠ পঞ্জীয়নভুক্ত ৱাকফ সম্পত্তি আছে ৬২,৯৩৯ টা।

তৃতীয় স্থানত আছে কৰ্ণাটক, য’ত মুঠ ৫৮,৩২৪ টা পঞ্জীয়নভুক্ত ৱাকফ সম্পত্তি আছে । পশ্চিম বংগত এই সংখ্যা বহুত কম, মাত্ৰ ২৩,০৮৬ টা পঞ্জীয়নভুক্ত সম্পত্তি আছে বংগত। কিন্তু এই তথ্যক লৈ কিছু বিভ্ৰান্তিও আছে। কাৰণ পশ্চিম বংগ চৰকাৰৰ ৱাকফ ৱেবছাইটত লিখা আছে যে ৰাজ্যখনত মুঠ ৮২,৬১৬ টা ৱাকফ সম্পত্তি আছে।

ইফালে উত্তৰ-পূবৰ ৰাজ্য অৰুণাচল প্ৰদেশ, মিজোৰাম, ছিকিম আৰু নাগালেণ্ডত ৱাকফৰ সম্পত্তিৰ কোনো তথ্য পোৱা নাই। অৱশ্যে অসমত ৬৮১টা, মণিপুৰত ৩৯৩টা আৰু মেঘালয়ত ১৩টা সম্পত্তিৰ তথ্য পোৱা গৈছে। লাডাখ আৰু গোৱাতো কোনো ৱাকফ সম্পত্তিৰ পঞ্জীয়ন হোৱা নাই।