জঘন্য! দিন দুপৰতে পথত মহিলাৰ ওপৰত ঘৃণনীয় কাণ্ড দুৰ্বৃত্তৰ, কাষত ৰৈ ভিডিঅ’ কৰিলে পথচাৰীয়ে
মধ্য প্ৰদেশৰ উজ্জয়নত এক দুৰ্বৃত্তই দিন দুপৰত পথৰতে এগৰাকী ভিক্ষাৰী মহিলাক ধৰ্ষণ কৰিছে। এই জঘন্য ঘটনাৰ সময়ত একাংশ লোকে অভিযুক্তক বাধা দিয়াৰ পৰিৱৰ্তে বা আৰক্ষীক খবৰ দিয়াৰ পৰিৱৰ্তে মোবাইল যোগে ভিডিঅ’ কৰে আৰু এই ভিডিঅ’ সামাজিক মাধ্যম যোগে ভাইৰেল কৰি দিয়ে।

দেশত বিগত কিছুদিন ধৰি উদ্বেগজনকভাৱে বৃদ্ধি পাইছে ধৰ্ষণৰ ঘটনা। প্ৰায় নিয়মিতভাৱে দেশৰ বিভিন্ন স্থানৰ পৰা এনে জঘন্য ঘটনা পোহৰলৈ আহিছে। তাৰ মাজতে শেহতীয়াকৈ সামাজিক মাধ্যমত ব্যাপক ৰূপত ভাইৰেল হৈ পৰিছে এনে এক ঘৃণনীয় কাণ্ডৰ ভিডিঅ’। দিন দুপৰতে পথতে এগৰাকী মহিলাক ধৰ্ষণ কৰিছে এক দুৰ্বৃত্তই। লক্ষণীয়ভাৱে এনে ঘৃণনীয় কাণ্ড মুকলিকৈয়ে সংঘটিত হোৱাৰ পিছতো মহিলাগৰাকীক ৰক্ষাৰ বাবে আগবাঢ়ি নগ’ল কোনো লোক। বৰঞ্চ একাংশ পথচাৰীয়ে কাষত ৰৈ এই কাণ্ডৰ ভিডিঅ’ বনোৱাতহে ব্যস্ত হৈ পৰে।
এই জঘন্য কাণ্ডৰ ভিডিঅ’ বনাই এনে একাংশ পথচাৰীয়ে এই ভিডিঅ’ সামাজিক মাধ্যম যোগে ভাইৰেল কৰি দিয়ে। ভিডিঅ’ ভাইৰেল হোৱাৰ পিছতে আৰক্ষীয়ে তাৎক্ষণিকভাৱে ভুক্তভোগী মহিলাগৰাকীৰ বক্তব্যৰ ভিত্তিত ধৰ্ষণৰ অভিযুক্তক গ্ৰেপ্তাৰ কৰে। এই অপৰাধ ঘটি থকাৰ সময়ত সহায়ৰ পৰিৱৰ্তে চাই থকা আৰু ভিডিঅ’ বনাই থকা লোকসকলকো আৰক্ষীয়ে চিনাক্ত কৰা বুলি জানিবলৈ দিছে।
এই লোকসকলৰ বিৰুদ্ধেও আইনী ব্যৱস্থা গ্ৰহণ কৰা হ’ব বুলি সদৰী কৰিছে আৰক্ষীয়ে। মানৱ সমাজক লজ্জানত কৰা এই জঘন্য কাণ্ড সংঘটিত হৈছে মধ্য প্ৰদেশৰ উজ্জয়নত। পথৰ মাজতে দুৰ্বৃত্তই সংঘটিত কৰে এই ধৰ্ষণ কাণ্ড। ঘটনা সন্দৰ্ভত আৰক্ষীয়ে জানিবলৈ দিয়া মতে, দুৰ্বৃত্তৰ ধৰ্ষণৰ বলি হৈছে এগৰাকী ৪৫ বৰ্ষীয় ভিক্ষাৰী মহিলা। আনহাতে অভিযুক্ত ব্যক্তিজনক লোকেশ বুলি চিনাক্ত কৰা হৈছে।
ভুক্তভোগী মহিলাগৰাকীয়ে দিয়া ভাষ্যৰ ভিত্তিত আৰক্ষীয়ে জানিবলৈ দিয়া মতে অভিযুক্তই প্ৰথমে মহিলাগৰাকীক সুৰাপান কৰাইছিল আৰু তাৰ পিছত পথতে পেলাই ধৰ্ষণ কৰিছিল। অভিযুক্তই এই অপৰাধ সংঘটিত কৰি থকাৰ সময়ত পথেৰে গৈ থকা একাংশ লোকে অভিযুক্তক এনে কাণ্ডত বাধা দিয়া বা আৰক্ষীক খবৰ দিয়াৰ পৰিৱৰ্তে মোবাইল উলিয়াই ভিডিঅ’ বনাবলৈ আৰম্ভ কৰে।
আৰক্ষীয়ে ইতিমধ্যে ভুক্তভোগী মহিলাগৰাকীৰ বক্তব্যৰ ভিত্তিত অভিযুক্ত লোকেশক গ্ৰেপ্তাৰ কৰিছে। মহিলাগৰাকীয়ে মহিলাগৰাকীয়ে জানিবলৈ দিয়া মতে অভিযুক্ত লোকেশে তেওঁক বিয়া কৰোৱাৰ প্ৰতিশ্ৰুতি দিছিল। এনে প্ৰতিশ্ৰুতিৰে অভিযুক্তই মহিলাগৰাকীক জোৰকৈ সুৰাপান কৰি ধৰ্ষণ কৰে। সম্প্ৰতি আৰক্ষীৰ জিম্মাত আছে অভিযুক্ত। এই ভিডিঅ’টো ৰেকৰ্ডিং কৰি ভাইৰেল কৰা সকলৰ বিৰুদ্ধেও আৰক্ষীয়ে আইনী ব্যৱস্থা গ্ৰহণ কৰিব বুলি জানিবলৈ দিছে।
এই ভিডিঅ’ নিৰ্মাণ কৰা চাৰিজন সন্দেহযুক্ত লোকক চিনাক্ত কৰিছে আৰক্ষীয়ে। আৰক্ষীৰ এগৰাকী উচ্চপদস্থ বিষয়াই জানিবলৈ দিয়া মতে এই ভিডিঅ’ নিৰ্মাণ কৰা অভিযুক্তসকল পৃথক পৃথক স্থানত আছে আৰু তেওঁলোকক গ্ৰেপ্তাৰ কৰিবলৈ ইতিমধ্যে দল প্ৰেৰণ কৰা হৈছে। আৰক্ষীয়ে এই গোচৰত ইতিমধ্যে মহিলাগৰাকীৰ বক্তব্য ৰেকৰ্ড কৰিছে। সম্প্ৰতি মহিলাগৰাকী সুস্থ অৱস্থাত আছে বুলি জানিবলৈ দিছে আৰক্ষীয়ে।