শেহতীয়া খবৰঅসমভাৰতমনোৰঞ্জনব্যৱসায়শিক্ষাখেলজীৱনশৈলীবিশ্বপ্ৰযুক্তিৱেব ষ্ট'ৰীফটোভিডিঅ

চহৰৰ মাজমজিয়াত দাউদাউকৈ জ্বলি উঠিল চাৰি মহলীয়া অট্টালিকা, প্ৰাণ হেৰুৱালে তিনিজনে

ঘটনাস্থলীৰ পৰা কোনো লোকে ফোন যোগে এই ভয়ংকৰ অগ্নিকাণ্ডৰ বিষয়ে খবৰ দিয়ে। এই খবৰ লাভ কৰাৰ লগে লগে তিগ্ৰী আৰক্ষী আৰু অগ্নিনিৰ্বাপক বাহিনীৰ এটা দল ঘটনাস্থলীত উপস্থিত হয় যদিও তেতিয়ালৈকে সমগ্ৰ অট্টালিকাটো জুইৰ লেলিহান শিখাই আগুৰি ধৰে।

চহৰৰ মাজমজিয়াত দাউদাউকৈ জ্বলি উঠিল চাৰি মহলীয়া অট্টালিকা, প্ৰাণ হেৰুৱালে তিনিজনে
চাৰি মহলীয়া অট্টালিকাত লাগিল জুই
monjit-dutta
Monjit Dutta | Published: 30 Nov 2025 07:09 AM

শনিবাৰে গুৱাহাটী মহানগৰীৰ হেঙেৰাবাৰীত সংঘটিত হৈছিল এক ভয়ংকৰ অগ্নিকাণ্ড। এই ঘটনাত এজন লোকে শোকাৱহভাৱে প্ৰাণ হেৰুৱায়। গুৱাহাটী মহানগৰীৰ এই অগ্নিকাণ্ডৰ দৰেই আন এক ঘটনা সংঘটিত হৈছে দিল্লীত। এটা চাৰি মহলীয়া অট্টালিকাত সংঘটিত হোৱা ভয়ংকৰ অগ্নিকাণ্ডত তিনিজন লোক জীৱন্তে অগ্নিদগ্ধ হৈ মৃত্যুক সাবটি লয়। এই ঘটনাত লগতে দুগৰাকী মহিলা গুৰুতৰভাৱে আহত হয়। কালি সন্ধিয়া দিল্লীৰ তিগ্ৰী এক্সটেন্সন এলেকাত এই ঘটনা সংঘটিত হয়।

ঘটনাস্থলীৰ পৰা কোনো লোকে ফোন যোগে এই ভয়ংকৰ অগ্নিকাণ্ডৰ বিষয়ে খবৰ দিয়ে। এই খবৰ লাভ কৰাৰ লগে লগে তিগ্ৰী আৰক্ষী আৰু অগ্নিনিৰ্বাপক বাহিনীৰ এটা দল ঘটনাস্থলীত উপস্থিত হয় যদিও তেতিয়ালৈকে সমগ্ৰ অট্টালিকাটো জুইৰ লেলিহান শিখাই আগুৰি ধৰে।

তলৰ মহলাত সূত্ৰপাত হয় জুইৰ

জানিব পৰা মতে, অট্টালিকাৰ তলৰ মহলাত থকা এখন জোতাৰ দোকানত এই অগ্নিকাণ্ডৰ সূত্ৰপাত হয়। ইয়াৰ পিছতে কম সময়ৰ ভিতৰতে জুই ওপৰৰ মহলালৈ বিয়পি পৰে। এই তথ্য লাভ কৰাৰ লগে লগে অগ্নিনিৰ্বাপক বাহিনী আৰু আৰক্ষীৰ উদ্ধাৰকাৰী দলে ঘটনাস্থলীত উপস্থিত হৈ জুই নিয়ন্ত্ৰণৰ চেষ্টা কৰে।

উদ্ধাৰকাৰী দলটোৱে অট্টালিকাটোৰ ভিতৰত প্ৰৱেশ কৰি তিনিজন লোকক মৃত অৱস্থাত উদ্ধাৰ কৰে। এই ঘটনাত গুৰুতৰভাৱে আহত দুগৰাকী মহিলাক উদ্ধাৰ কৰি তাৎক্ষণিকভাৱে সমীপৰ এখন চিকিৎসালয়লৈ লৈ যোৱা হয়। সম্প্ৰতি দুয়োগৰাকী মহিলা চিকিৎসাধীন অৱস্থাত আছে বুলি জানিব পৰা গৈছে।

বহু কষ্টৰ অন্তত জুই নিৰ্বাপিত

খবৰ লাভৰ পিছত চাৰিখন অগ্নিনিৰ্বাপক বাহিনীৰ বাহন ঘটনাস্থলীত উপস্থিত হয় আৰু প্ৰায় ডেৰ ঘণ্টাৰ চেষ্টাৰ অন্তত জুই নিয়ন্ত্ৰণ কৰিবলৈ সক্ষম হয়। জুই যাতে বিয়পিব নোৱাৰে তাৰ বাবে সতৰ্কতামূলক ব্যৱস্থা হিচাপে ওচৰৰ ঘৰবোৰ খালী কৰা হয়। সম্প্ৰতি আৰক্ষীয়ে অগ্নিকাণ্ডৰ কাৰণৰ তদন্ত অব্যাহত ৰাখিছে।

শ্বৰ্ট চাৰ্কিটৰ বাবে এই অগ্নিকাণ্ড সংঘটিত হ’ব পাৰে বুলি সন্দেহ কৰা হৈছে যদিও বিষয়াসকলে এতিয়াও এই বিষয়ে কোনো নিশ্চিতি প্ৰদান কৰা নাই। তদন্তৰ পিছতহে অগ্নিকাণ্ডৰ সঠিক কাৰণ জানিব পৰা যাব বুলি সংবাদ মাধ্যমৰ আগত জানিবলৈ দিয়ে স্থানীয় এগৰাকী বিষয়াই।

অঞ্চলটোত আতংকময় পৰিৱেশ

এই ঘটনাত আতংকিত হৈ পৰিছে স্থানীয় লোকসকল। অঞ্চলটোৰ দোকান-পোহাৰ আৰু ঘৰত বিদ্যুতৰ তাঁৰৰ দুৰ্বল অৱস্থাই বিপদৰ আশংকা বৃদ্ধি কৰিছে বুলি বহুলোকে উল্লেখ কৰে। ইফালে ঘটনাত প্ৰাণ হেৰুওৱা লোকসকলক ইতিমধ্যে চিনাক্ত কৰা হৈছে তথা মৃতদেহ পৰিয়ালৰ হাতত গতাই দিয়া হৈছে বুলি আৰক্ষীয়ে উল্লেখ কৰিছে।