এটা ফোনকলৰ দ্বাৰা ৰহস্যভেদ, পৰ্যটকৰ বেশত ৰাজা-সোনমৰ সৈতেই গৈছিল চুপাৰী কিলাৰ

এটা ৰহস্যঘন ঘটনা আৰু তাৰ ৰহস্যভেদ । যি ৰহস্যভেদে গাৰ নোম ডাল ডাল কৰিব আপোনাৰ । যোৱা ১১ মে’ত বিয়া আৰু বিয়াৰ এপষেক নৌহওঁতেই নিজ হাতেৰেই শিৰৰ সেন্দূৰ মচিলে এগৰাকী ন-কইনাই । হয়, যোৱা কেইবাদিনো ধৰি চাঞ্চল্যৰ সৃষ্টি কৰা ৰাজা-সোনমৰ কথাই কৈছোঁ । আৰম্ভণিৰ পৰা কাহিনীটো জানো আহক-

১১ মে’ ২০২৫, মধ্যপ্ৰদেশৰ ৰাজা ৰঘুবংশী আৰু সোনমৰ বিবাহ সম্পন্ন হয় । দুয়োৰে পৰিয়াল এই বিয়াক লৈ খুবেই সুখী আছিল । বিয়াৰ পাছত আন নৱ দম্পতীৰ দৰেই ৰাজা আৰু সোনমেও হানিমুনৰ পৰিকল্পনা কৰে । প্ৰথমে পৰিকল্পনা হৈছিল যে দুয়ো অসমৰ কামাখ্যা মন্দিৰত সেৱা জনাব আৰু তাৰ পৰা কাশ্মীৰলৈ যাব । ২০ মে’ত দুয়ো কামাখ্যা দৰ্শন কৰে । তাৰ পাছত কাশ্মীৰৰ পৰিৱৰ্তে মেঘালয় যোৱাৰ পৰিকল্পনা কৰে । ২০ মে’তেই দুয়ো উপস্থিত হ’ল মেঘালয়ত । তাৰ পাছত সংঘটিত ঘটনাই সমগ্ৰ দেশতে চাঞ্চল্যৰ সৃষ্টি কৰে ।

আৰক্ষীৰ মতে, যোৱা ২২ মে’ত দম্পতীটোৱে এখন স্কুটী ভাৰাত লৈ মাউলাখিয়াট গাঁৱত উপস্থিত হয় আৰু তাৰ পৰা ৩০০০ চিৰি বগাই নংৰিয়াট গাঁৱৰ বিখ্যাত ‘লিভিং ৰুট ব্ৰীজ’ চাবলৈ সক্ষম হয় । ৰাতিটো হোমষ্টেত কটায় দুয়ো । তাৰ পিছত ২৩ মে’ত দুয়োজনেই ৰাতিপুৱা তাৰ পৰা গুচি যায় । ইয়াৰ কেইঘণ্টামান পিছতে দুয়োজন সন্ধানহীন হৈ পৰে ।

গাইড ভকুপাৰ বাংশায়ে কয়- “মাউলাখাইটৰ পৰা নংৰিয়াট পাবলৈ প্ৰায় তিনি ঘণ্টা সময় লাগে । ইয়াৰ লগতে প্ৰায় ৩০০০ চিৰি নামিবলগীয়া হয় । ২২ মে’ত দম্পতীটোৱে মোক ফোন কৰিছিল । আবেলি ৩:৩০ বাজিছিল । মই নাকচ নকৰি সিহঁতক নংগ্ৰিয়াটলৈ লৈ যোৱাৰ সিদ্ধান্ত ললোঁ । শিপৰা হোমষ্টেত থৈ মই গুচি গ’লোঁ ৷ আন এজন গাইড এলবাৰ্ট পেডো তেওঁলোকৰ লগত আছিল ।” বাংশাই আৰু কয়, “আমি পিছদিনা (২৩ মে’)ও আমাৰ সেৱা আগবঢ়াইছিলো । কিন্তু তেওঁলোকে নাকচ কৰিলে । তেওঁলোকে ক’লে যে তেওঁলোকে বাটটো চিনি পায় ।” বাংশায়ে আৰক্ষীক জনোৱা মতে, সোণমে বেছিভাগেই ইংৰাজীত কথা পাতিছিল ।

এই ব্যক্তিজনে তেওঁলোকক শেষবাৰৰ বাবে দেখিছিল

২৩ মে’ৰ পুৱা ৬ বজাত হোমষ্টেৰ পৰা ওলাই আহিছিল ৰাজা-সোনম । এলবাৰ্ট পেডেই আছিল তেওঁলোকক দেখা পোৱা শেষ ব্যক্তি । পুৱা ১০ বজাত মাউলাখাইট গাঁৱৰ অভিমুখে ৩ হাজাৰ চিৰি বগাই যোৱা দম্পতীটোক দেখা পায় এলবাৰ্টে । তেওঁলোকৰ লগত তিনিজন মানুহ আছিল, যাক তেওঁ পৰ্যটক বুলি ভাবিছিল । ইয়াৰ পিছত সোণম আৰু ৰাজা দুয়োজনেই সন্ধানহীন হৈ পৰে । এলবাৰ্টৰ মতে, “যেতিয়া তেওঁ ৰাজা-সোণমক দেখিছিল, চাৰিজন মানুহ আগবাঢ়ি গৈ আছিল, আনহাতে মহিলাগৰাকী পিছফালে আছিল । চাৰিওজনে হিন্দীত কথা পাতি আছিল যদিও মই কেৱল খাচী আৰু ইংৰাজী জানো বাবে তেওঁলোকে কি কৈছে বুজিব পৰা নাছিলো ।” গাইডজনে দাবী কৰে- “মই মাউলাখাইট পোৱাৰ সময়লৈকে তেওঁলোকৰ স্কুটীখন নাছিল ।”

শাহুৱেকৰ লগত কথা পাতিছিল সোণমে

দুয়োৰে সন্ধান চলি আছিল, ইফালে সোণম আৰু শাহুৱেকৰ মাজত হোৱা কথা-বতৰাৰ অডিঅ’ পোহৰলৈ আহিছিল । শাহুৱেকে কিবা খাইছে নেকি বুলি সুধিলে- সোণমে ক’লে- “ইয়াত একো পোৱা নাই । এঠাইত গাখীৰ লৈছিলো, আধা গিলাচ গাখীৰত বহুত পানী মিহলি আছিল । কফি খালোঁ, সেইটোও সোৱাদ লগা নাছিল । মই পেলাই দিলোঁ ।” সোণমে এইটোও ক’লে যে তেওঁলোকে ইয়াত জলপ্ৰপাতটো চাবলৈ ওলাইছে । ইয়াৰ পিছত ফোনটো বিচ্ছিন্ন হৈ পৰিল । সেয়াই আছিল শেষ কথা পতা । তাৰ পাছতেই নিৰুদ্দেশ হৈ পৰে দুয়ো ।

২ জুনত জলপ্ৰপাতৰ ওচৰত উদ্ধাৰ মৃতদেহ

২ জুনত ভেইছাৱডং জলপ্ৰপাতৰ সমীপৰ এটা দ খাৱৈত ৰাজাৰ মৃতদেহ উদ্ধাৰ হয় । ৰাজাৰ ভাতৃ বিপিনে মৃতদেহটো চিনাক্ত কৰে । তাকো মৃতদেহৰ হাতত থকা ‘ৰাজা’ লিখা টেটুৰ পৰা । কিন্তু সোণমক বিচাৰি পোৱা নগ’ল । প্ৰথম অৱস্থাত দুয়োৰে দুৰ্ঘটনা হোৱা বুলি ভবা হৈছিল যদিও মৰণোত্তৰ পৰীক্ষাৰ প্ৰতিবেদনত ৰাজাক চোকা অস্ত্ৰৰে হত্যা কৰা বুলি জানিব পৰা গৈছে । ৰাজা ৰঘুবংশীৰ ভাতৃ বিপিনৰ মতে এই লোকসকল যোৱা অঞ্চলটো অপৰাধৰ বাবে কুখ্যাত । বাংলাদেশ এই অঞ্চলৰ অতি ওচৰত । ইয়ালৈ অহাৰ পাছত সোনমক অপহৰণ কৰি বাংলাদেশলৈ লৈ লোৱা বুলি ভবা হৈছিল ।

অৱশেষত উদ্ধাৰ সোণমক

আৰক্ষীৰ দলে সোণমক বিচাৰি ফুৰিছিল । তাৰ পিছত ইয়াৰ মাত্ৰ সাত দিনৰ পিছতে এই গোচৰত আৰক্ষীয়ে ডাঙৰ সফলতা অৰ্জন কৰিলে । ৯ জুনত উত্তৰ প্ৰদেশৰ গাজীপুৰৰ পৰা আৰক্ষীয়ে সোণমক গ্ৰেপ্তাৰ কৰে । এই কথা নিশ্চিত কৰিছে গাজীপুৰৰ অতিৰিক্ত আৰক্ষী অধীক্ষক জ্ঞানেন্দ্ৰ প্ৰসাদে । মেঘালয়ৰ ডিজিপিয়ে কয় – “হত্যাকাণ্ডৰ গোচৰত ৰাজাৰ পত্নী সোণম জড়িত আছিল । ৰাজাক হত্যা কৰিবলৈ তেওঁ ভাড়াতীয়া হত্যাকাৰীক মাতিছিল ।”

মধ্যপ্ৰদেশৰ সেই তিনিজন আক্ৰমণকাৰীকো গ্ৰেপ্তাৰ কৰিছে আৰক্ষীয়ে । লগতে এজন অভিযুক্তৰ সন্ধান এতিয়াও চলি আছে । গাজীপুৰ আৰক্ষীয়ে জনোৱা মতে, উত্তৰ প্ৰদেশৰ গাজীপুৰৰ এখন ধাবাত উদ্ধাৰ হয় সোণম ৰঘুবংশীক। তেওঁ মানসিকভাৱে অস্থিৰ হৈ আছে । এই ঘটনা সন্দৰ্ভত তেওঁ বৰ্তমান একো কোৱা নাই ।

আচলতে সোণমে ফোনযোগে পৰিয়ালৰ লগত যোগাযোগ কৰিছিল । তাৰ পিছত আৰক্ষীয়ে সোণমক গ্ৰেপ্তাৰ কৰে । সম্প্ৰতি সোণমক চিকিৎসাৰ বাবে প্ৰেৰণ কৰা হৈছে । এই ঘটনাৰ তদন্তত প্ৰকাশ পাব কিয়, কিদৰে সোনমে প্ৰাণ ল’লে নিজৰেই স্বামীৰ । পৰকীয়া প্ৰেমৰো সন্দেহ প্ৰকাশ কৰা হৈছে ঘটনা সন্দৰ্ভত ।