ৰাহুল গান্ধী বিদেশী নে ভাৰতীয়: কেন্দ্ৰীয় চৰকাৰৰ পৰা উত্তৰ বিচাৰিলে উচ্চ ন্যায়ালয়ে

এলাহাবাদ উচ্চ ন্যায়ালয়ে মঙলবাৰে কংগ্ৰেছ নেতা আৰু লোকসভাৰ বিৰোধী দলৰ নেতা ৰাহুল গান্ধীক ব্ৰিটিছ নাগৰিকত্বক লৈ প্ৰত্যাহ্বান জনোৱা এখন আবেদনৰ শুনানি গ্ৰহণ কৰিছে। আবেদনখনত কোৱা হৈছে যে ৰাহুল গান্ধীৰ নাগৰিকত্ব সন্দৰ্ভত চিবিআইয়ে তদন্ত কৰা উচিত। এই আবেদনৰ শুনানিৰ সময়ত ন্যায়াধীশ ৰাজন ৰয় আৰু ন্যায়াধীশ ওম প্ৰকাশ শুক্লাৰ বিচাৰপীঠে এএছজি সূৰ্যভান পাণ্ডেক এই বিষয়ত কেন্দ্ৰীয় গৃহ মন্ত্ৰালয়ৰ পৰা তথ্য প্ৰাপ্ত কৰিবলৈ নিৰ্দেশ দিয়ে।

আবেদনখন কৰ্ণাটকৰ বিজেপি কৰ্মী এছ ভিগনেশ শিশিৰে দাখিল কৰিছিল। জুনত ৰায়বৰেলী লোকসভাৰ পৰা নিৰ্বাচনক প্ৰত্যাহ্বান জনাই ৩ মাহ আগতে ৰাজহুৱা স্বাৰ্থত এলাহাবাদ উচ্চ ন্যায়ালয়ৰ লক্ষ্ণৌ বিচাৰপীঠত এই পিআইএলখন দাখিল কৰা হৈছিল। য’ত কোৱা হৈছে যে ৰাহুল গান্ধী ভাৰতৰ নাগৰিক নহয়, ব্ৰিটেইনৰ নাগৰিক। ইয়াৰ ভিত্তিত ৰাহুল গান্ধীৰ মনোনয়ন বাতিল কৰাৰ দাবী উত্থাপন কৰা হৈছিল।

আদালতে আবেদনখন জুলাইত খাৰিজ কৰিছিল। এই সন্দৰ্ভত আদালতে কৈছিল যে আবেদনকাৰীয়ে প্ৰথমে নাগৰিকত্ব আইনৰ অধীনত সক্ষম কৰ্তৃপক্ষৰ ওচৰত অভিযোগ কৰিব পাৰে। অৱশ্যে আবেদনকাৰীয়ে কয় যে ৰাহুল গান্ধী এজন ইউকে নাগৰিক বুলি তেওঁৰ ওচৰত পৰ্যাপ্ত প্ৰমাণ আছে। আবেদনকাৰীয়ে কৈছিল যে সক্ষম কৰ্তৃপক্ষৰ ওচৰত দুটাকৈ অভিযোগ দাখিল কৰাৰ পাছতো কোনো ব্যৱস্থা লোৱা হোৱা নাই। সেয়েহে আবেদনখন পুনৰ দাখিল কৰা হৈছে।

কেৱল এয়াই নহয়, আবেদনখনত লোকসভাৰ অধ্যক্ষৰ ওচৰতো দাবী উত্থাপন কৰা হৈছিল যে ৰাহুল গান্ধীক তেওঁৰ বিদেশী নাগৰিকত্বৰ বিষয়টো গৃহ মন্ত্ৰালয়ে নিষ্পত্তি নকৰালৈকে সাংসদ হিচাপে কাম কৰিবলৈ অনুমতি দিব নালাগে। লগতে সোধা হৈছিল কি আইনৰ অধীনত কংগ্ৰেছ নেতা ৰাহুল গান্ধীয়ে লোকসভাৰ সদস্য হিচাপে কাম কৰি আছে?

গোচৰটোৰ শুনানিৰ সময়ত আদালতে নাগৰিকত্ব আইন ১৯৫৫ৰ অধীনত কেন্দ্ৰীয় চৰকাৰৰ সক্ষম বিষয়াৰ ওচৰত কৰা অভিযোগ সন্দৰ্ভত লোৱা ব্যৱস্থাৰ বিৱৰণ বিচাৰিছে। আদালতে কয় যে যিকোনো সিদ্ধান্ত লোৱাৰ আগতে তেওঁলোকে ভাৰত চৰকাৰৰ সিদ্ধান্ত, এই অভিযোগৰ ওপৰত তেওঁলোকে কি আৰু কেনে ধৰণৰ পদক্ষেপ লৈছে জানিব বিচাৰে। গোচৰটোৰ পৰৱৰ্তী শুনানি ৩০ ছেপ্টেম্বৰত হ’ব।