প্ৰধানমন্ত্ৰীৰ পিছত আজি মণিপুৰ ভ্ৰমণলৈ ৰাষ্ট্ৰপতি, উদ্বোধন কৰিব কেইবাটাও প্ৰকল্প

দুদিনীয়া ভ্ৰমণসূচীৰে আজি বৃহস্পতিবাৰে মণিপুৰত উপস্থিত হ’ব ৰাষ্ট্ৰপতি দ্ৰৌপদী মূৰ্মু । বিষয়াসকলে এতিয়াও ৰাষ্ট্ৰপতিৰ আনুষ্ঠানিক কাৰ্যসূচী লাভ কৰা নাই যদিও নিৰাপত্তা সংস্থাসমূহক প্ৰস্তুতি চলাবলৈ নিৰ্দেশ দিয়া হৈছে। বিষয়াসকলে জনোৱা মতে, তেওঁৰ গুৰুত্বপূৰ্ণ ভ্ৰমণৰ সময়ত তেওঁ ৮৬ সংখ্যক নুপী লাল দিৱস উদযাপনত অংশগ্ৰহণ কৰাৰ লগতে ৰাজ্যখনত পৰিকল্পিত কেইবাটাও উন্নয়নমূলক প্ৰকল্প উদ্বোধন কৰিব।

আন এগৰাকী বিষয়াই কয় যে, মূৰ্মুয়ে ১১ ডিচেম্বৰত ইম্ফলত এক অনুষ্ঠানত অংশগ্ৰহণ কৰাৰ লগতে ১২ ডিচেম্বৰত মহিলা স্বাধীনতা সংগ্ৰামীসকলক সম্বৰ্ধনা জনোৱাৰ বাবে এটা স্মৃতিসৌধ পৰিদৰ্শন কৰাৰ সম্ভাৱনা আছে। বিষয়াগৰাকীয়ে লগতে কয় যে, ১২ ডিচেম্বৰত নগা অধ্যুষিত সেনাপতি জিলাত মূৰ্মুৱে এক অনুষ্ঠানত অংশগ্ৰহণ কৰাৰ সম্ভাৱনা আছে।

ইম্ফলত ব্যস্ততাপূৰ্ণ প্ৰস্তুতি

ৰাষ্ট্ৰপতি মূৰ্মুক আদৰিবলৈ ইম্ফলত ব্যাপক প্ৰস্তুতি চলি আছে।  একেলগে কাম কৰি নিৰাপত্তা, যান-বাহন ব্যৱস্থাপনা, আৰু স্থানৰ ব্যৱস্থা চূড়ান্ত কৰিছে বিভিন্ন চৰকাৰী বিভাগে। তেওঁৰ আগমনৰ লগে লগে বীৰ টিকেন্দ্ৰজিৎ আন্তঃৰাষ্ট্ৰীয় বিমানবন্দৰত আনুষ্ঠানিকভাৱে গাৰ্ড অৱ অনাৰ প্ৰদান কৰা হ’ব। তাৰ পৰা তেওঁৰ আনুষ্ঠানিক ভ্ৰমণৰ আৰম্ভণি হ’ব।

পোলো গ্ৰাউণ্ড ভ্ৰমণ

বিমানবন্দৰৰ পৰা ওলাই অহাৰ পিছত ৰাষ্ট্ৰপতি মূৰ্মুৱে বিশ্বৰ অন্যতম পুৰণি প’ল’ খেলপথাৰ হিচাপে বিবেচিত কাংজেইবুঙৰ ঐতিহাসিক ইম্ফল প’ল’ খেলপথাৰ পৰিদৰ্শন কৰিব। শেহতীয়াকৈ ইয়াত ৭ দিনত অনুষ্ঠিত হৈছিল ১৫ সংখ্যক মণিপুৰ আন্তঃৰাষ্ট্ৰীয় প’ল’ প্ৰতিযোগিতা। ৰাষ্ট্ৰপতিগৰাকীয়ে প’লো প্ৰদৰ্শনী মেচৰো সাক্ষী হ’ব, য’ত ৰাজ্যখনৰ সাংস্কৃতিক আৰু ক্ৰীড়া ঐতিহ্যক পুনৰবাৰ ৰাষ্ট্ৰীয় পৰ্যায়ত সন্মান জনোৱা হ’ব।

উন্নয়ন প্ৰকল্পৰ আৰম্ভণি

সন্ধিয়া ৰাষ্ট্ৰপতি মূৰ্মুৱে চিটি কনভেনচন চেণ্টাৰত এক নাগৰিক সম্বৰ্ধনা অনুষ্ঠানত অংশগ্ৰহণ কৰিব। এই অনুষ্ঠানৰ আয়োজন কৰিছে মণিপুৰ চৰকাৰে। এই অনুষ্ঠানত ৰাষ্ট্ৰপতিয়ে কেইবাটাও গুৰুত্বপূৰ্ণ উন্নয়নমূলক প্ৰকল্পৰ আধাৰশিলা স্থাপন কৰাৰ লগতে অন্যান্য আঁচনি উদ্বোধন কৰিব। এই প্ৰকল্পসমূহে উত্তৰ-পূবৰ আন্তঃগাঁথনি, পৰ্যটন, মহিলা সবলীকৰণ, আৰু আঞ্চলিক সংযোগৰ প্ৰসাৰৰ ওপৰত কেন্দ্ৰীয় চৰকাৰৰ অবিৰত মনোনিৱেশক প্ৰতিফলিত কৰে।

নুপী লাল সোঁৱৰণীত শ্ৰদ্ধাঞ্জলি

শুকুৰবাৰে ৰাষ্ট্ৰপতি মুৰুৱে ইম্ফলৰ নুপী লাল স্মাৰক কমপ্লেক্সত উপস্থিত হৈ ১৯০৪ আৰু ১৯৩৯ চনত ব্ৰিটিছ শাসনৰ বিৰুদ্ধে ঐতিহাসিক বিদ্ৰোহৰ নেতৃত্ব দিয়া সাহসী মহিলাসকলক শ্ৰদ্ধাঞ্জলি জনাব।প্ৰতি বছৰে ১২ ডিচেম্বৰত উদযাপন কৰা নুপি লাল দিৱস মণিপুৰী মহিলাসকলৰ সাহস, নেতৃত্ব, সংগ্ৰামৰ অমলিন সোঁৱৰণী হিচাপে কাম কৰে। ৰাষ্ট্ৰপতিৰ উপস্থিতিয়ে অনুষ্ঠানটোক আৰু অধিক বিশেষ কৰি তুলিব।

সেনাপতি জিলাত ৰাজহুৱা সভা

সেইদিনা ৰাষ্ট্ৰপতিগৰাকীয়ে সেনাপতি জিলালৈও যাব। তাত তেওঁ এখন ৰাজহুৱা সভাত ভাষণ দি জিলাখনৰ লগতে ইয়াৰ আশে-পাশে থকা অঞ্চলসমূহৰ নতুন উন্নয়নমূলক পদক্ষেপসমূহ উদ্বোধন কৰিব। এই ভ্ৰমণক ৰাজ্যখনৰ চলি থকা উন্নয়নমূলক প্ৰকল্পসমূহ ত্বৰান্বিত কৰাৰ লগতে স্থানীয় জনগোষ্ঠীসমূহক উৎসাহিত কৰাৰ এক প্ৰচেষ্টা হিচাপে গণ্য কৰা হয়।