জনৈক ইছমাইলৰ নিৰ্দেশত সৰবৰাহ কৰিছিল প্ৰায় ২১ কোটি টকাৰ ড্ৰাগছ, ধৰা পৰিল আৰক্ষীৰ হাতত
ড্ৰাগছৰ বিৰুদ্ধে সদা সষ্টম হৈ আছে আৰক্ষী । কিন্তু তাৰ মাজতেই আৰক্ষীৰ চকুত ধূলি দি এই বৰবিহৰ সৰবৰাহ অব্যাহত ৰাখিছে দুষ্ট চক্ৰই । শেহতীয়াকৈ আৰক্ষীয়ে প্ৰায় ২১ কোটি টকাৰ হেৰ'ইনসহ গ্ৰেপ্তাৰ কৰিছে তিনি সৰবৰাহকাৰীক । ইয়াৰ দুগৰাকী স্বামী-স্ত্ৰী ।
ড্ৰাগছৰ বিৰুদ্ধে অব্যাহত আছে আৰক্ষীৰ যুঁজ । প্ৰায় প্ৰতিদিনেই আৰক্ষীৰ জালত পৰিছে ড্ৰাগছ সৰবৰাহকাৰী, জব্দ হৈছে কোটি কোটি টকাৰ ড্ৰাগছ । কিন্তু তথাপিও এই বৰবিহৰ শিপাডাল যেন উভালিবলৈ সক্ষম হোৱা নাই আৰক্ষী । প্ৰক্ৰিয়া অৱশ্যে অব্যাহত থকা বুলি ক’ব পাৰি । চৰ্চা চলা মতে চুবুৰীয়া দেশৰ পৰা ড্ৰাগছ আহে উত্তৰ-পূবৰ ৰাজ্যলৈ । শেহতীয়াকৈ ড্ৰাগছ সৰবৰাহৰ এক প্ৰচেষ্টা বিফল কৰিবলৈ সক্ষম হৈছে আৰক্ষী ।
মণিপুৰত চলি থকা প্ৰায় ২১ মাহজোৰা সংকটৰ মাজতে এক বৃহৎ অভিযানত ৰাজ্যখনৰ আৰক্ষীয়ে আন্তঃৰাষ্ট্ৰীয় বজাৰত ২১ কোটিৰো অধিক মূল্যৰ ১০.৫৬৫ কিলোগ্ৰাম নিষিদ্ধ হেৰ’ইন পাউদাৰ জব্দ কৰে । ৰাষ্ট্ৰীয় ঘাইপথ-২ (ইম্ফল-ডিমাপুৰ)ত চলা এই অভিযানত এটা দম্পতীকে ধৰি তিনিজন ড্ৰাগছ বেপাৰীক গ্ৰেপ্তাৰ কৰা হয় ।
ড্ৰাগছ সৰবৰাহ সম্পৰ্কীয় চোৰাংচোৱাৰ তথ্যৰ ভিত্তিত ইম্ফল পশ্চিমৰ আৰক্ষী অধীক্ষকৰ তত্বাৱধানত ছেকমাই আৰক্ষীয়ে ছেকমাই থানাৰ গেটত তালাচী অভিযান চলায় । দলটোৱে দুখন বাহন আবদ্ধ কৰে । এখন বলেৰ’ আৰু এখন টাটা হেৰিয়াৰ । সেনাপতি জিলাৰ মাইবা গাঁৱৰ কে পি জেকব নামৰ বলেৰ’ চালকজনে গাড়ীখনত লুকুৱাই নিষিদ্ধ সামগ্ৰী কঢ়িয়াই নিয়াৰ কথা স্বীকাৰ কৰে ।
এজন কাৰ্যবাহী দণ্ডাধীশ আৰু স্বতন্ত্ৰ সাক্ষীৰ উপস্থিতিত তালাচী চলাই বলেৰ’ৰ ভিতৰত লুকুৱাই থোৱা ৪৬১ টা চাবোনৰ কেচত হেৰ’ইন সদৃশ পাউদাৰ উদ্ধাৰ কৰা হয় । পিছত ম’বাইল ফৰেনছিক ছায়েন্স লেবৰেটৰী (এফ এছ এল)ৰ এটা দলে নমুনা সংগ্ৰহ কৰি সেয়া হেৰ’ইন বুলি নিশ্চিত কৰে ।
অধিক জেৰাত ধৰা পৰে যে টাটা হেৰিয়াৰৰ চালক এম জোছৌ আৰু তেওঁৰ পত্নী জে ভাষ্টি এই অভিযানৰ অংশ আছিল, তেওঁলোকে ১০২ নং ৰাষ্ট্ৰীয় ঘাইপথৰ কাষৰ আৰক্ষীৰ চেকপইণ্ট নিৰীক্ষণ কৰিবলৈ এডভান্স টিম হিচাপে কাম কৰিছিল । অভিযোগ অনুসৰি তেওঁলোকক সেনাপতিৰ লাইৰ ইছমাইল নামৰ এজন ব্যক্তিয়ে নিযুক্তি দিছিল ।
জোছৌৰ তথ্যৰ ভিত্তিত আৰক্ষীয়ে ইম্ফল পশ্চিম জিলাৰ পাওমেই কলনীৰ ইম’ইনু লেইৰাকত ৰখাই থোৱা আন এখন বলেৰ’ৰ সন্ধান কৰে । ইছমাইলে বাহনখনৰ ওপৰত চকু ৰাখিবলৈ কোৱা বুলি দাবী কৰা এন জি ভিথাই নামৰ এজন বাসিন্দাৰ পৰা আৰক্ষীয়ে বাহনখনৰ চাবিটো উদ্ধাৰ কৰে । তালাচী চলোৱাৰ লগে লগে বাহনখনত লুকুৱাই থোৱা আন ৪১৯ টা চাবোনৰ কেচত হেৰ’ইন উদ্ধাৰ হয় ।
সোধা-পোছাৰ সময়ত কে পি জেকবে প্ৰকাশ কৰে যে তেওঁৰ সৈতে ডিমাপুৰৰ লিলি মাৰ নামৰ এগৰাকী মহিলাই ড্ৰাগছ সৰবৰাহৰ বাবে যোগাযোগ কৰিছিল । মঙলবাৰে পুৱাই তেওঁ সেনাপতিৰ নিজৰ ঘৰত এজন অচিনাক্ত ব্যক্তিৰ পৰা বলেৰ’খন লাভ কৰাৰ পিছত পল্লেললৈ যোৱাৰ পূৰ্বে বলেৰ’খন গোপনে নিষিদ্ধ সামগ্ৰী কঢ়িয়াই অনা আন এখন বাহনৰ সৈতে বিনিময় কৰে । যাতায়তৰ বাবে জেকবক ২০ হাজাৰ টকা দিয়াৰ প্ৰতিশ্ৰুতি দিয়া হৈছিল ।
ইফালে, জোছৌৱে স্বীকাৰ কৰে যে দ্বিতীয়খন বলেৰ’ ইছমাইলে চলাইছিল । তেওঁক আৰু তেওঁৰ পত্নীক ইন্ধনৰ খৰচৰ লগতে ৫ হাজাৰ টকা দি এডভান্স টিম হিচাপে কাম কৰিবলৈ দিয়া হৈছিল । ধৃত তিনিওজন ব্যক্তিৰ লগতে জব্দ কৰা হেৰ’ইনখিনি অধিক আইনী ব্যৱস্থাৰ বাবে কৰ্তৃপক্ষক গতাই দিয়া হৈছে ।
