চিকাৰ কৰি খাইছিল বন্য পশু-পক্ষী, কাৰাগাৰত সোমাল অঘৰী বৃদ্ধ

বন্যপ্ৰাণী চিকাৰ আৰু ভক্ষণৰ অভিযোগত গ্ৰেপ্তাৰ এজন যাযাবৰী। পশ্চিম বংগত সংঘটিত হৈছে এই ঘটনা। মঙলবাৰে বন বিভাগে ধৃত ব্যক্তিজনক মেখলীগঞ্জ আদালতত হাজিৰ কৰে। বন্যপ্ৰাণী হত্যাৰ অপৰাধত গ্ৰেপ্তাৰ হ’ল যাযাবৰী সম্প্ৰদায়ৰ বিশেষভাৱে সক্ষম লোকজন। বনৰীয়া জন্তু, চৰাই, সাপ আদি ভক্ষণ কৰিছিল ব্যক্তিজনে। তথ্য লাভ কৰাৰ পাছতেই বন বিভাগে গ্ৰেপ্তাৰ কৰে তেওঁক। মেখলীগঞ্জ আদালতে তেওঁ ১৪ দিনৰ কাৰাদণ্ড বিহে।

এই ঘটনাই চাঞ্চল্যৰ সৃষ্টি কৰিছে হালদিবাৰীত। জানিব পৰা মতে, যোৱা কিছুদিন ধৰি হালদিবাৰী চহৰৰ পাইকাৰী বিলাহী বজাৰৰ গাতে লাগি থকা অঞ্চলটোত এদল যাযাবৰী লোকে বন্য জন্তু, সাপ, বিভিন্ন প্ৰজাতিৰ চৰাই আদি চিকাৰ কৰি ভক্ষণ কৰি আহিছে।

হালদিবাৰী বন বিভাগ লাভ কৰে এই অভিযোগ। তথ্য লাভ কৰাৰ লগে লগে এডিএফঅ’ বিজন কুমাৰ নাথে এটা দলৰ নেতৃত্বত গৈ অভিযান চলায়। তেওঁলোকক দেখি যাযাবৰী লোকৰ দলটো পলাই গ’ল। কিন্তু এই লোকজন পলাই যাব নোৱাৰিলে। তাৰ পিছত তেওঁক আটক কৰি হালদিবাৰী বন বিভাগৰ কাৰ্যালয়লৈ লৈ যোৱা হয়।

বন বিভাগৰ সূত্ৰ অনুসৰি অভিযুক্ত লোকজনৰ নাম ডোমৰা মহত। তেওঁৰ ঘৰ বিহাৰৰ কিষানগঞ্জৰ সমস্তীপুৰত। বন্যপ্ৰাণী সুৰক্ষা আইনৰ অধীনত অভিযুক্তক গ্ৰেপ্তাৰ কৰা হয়। অভিযুক্ত ডোমৰা মহতে তেওঁৰ বিৰুদ্ধে উত্থাপিত অভিযোগ স্বীকাৰ কৰিছে। তেওঁ কয়, “আমি বনৰীয়া গাহৰি চিকাৰ কৰিছিলো আৰু ৰান্ধি খাইছিলো।”

প্ৰকৃতিপ্ৰেমী সংস্থা স্প’ৰেৰ সদস্য সুমন দাসে কয়, “পৰিৱেশ সুৰক্ষাৰ বাবে আমি নিৰন্তৰ প্ৰচাৰ চলাই আহিছো। বনৰীয়া জন্তু হত্যা কৰিলে কাৰাদণ্ডৰ শাস্তি হ’ব পাৰে বুলি আমি ধাৰাবাহিকভাৱে সজাগ কৰি আহিছো। বহুতে সচেতনতা অৱলম্বন কৰিছে যদিও, কিছু লোক সচেতন নহয়। এইজন প্ৰতিবন্ধী লোকক গ্ৰেপ্তাৰ কৰা হৈছে। আমাৰ বেয়া লাগে। কিন্তু একে সময়তে আমি এইটোও চাব লাগিব যে এই সকলোবোৰ প্ৰাণীয়ে পৰিৱেশৰ ভাৰসাম্য ৰক্ষা কৰে। সেয়ে সিহঁতক জীয়াই ৰখাটো জৰুৰী।

এডিএফঅ’ বিজন কুমাৰ নাথে ফোনযোগে জনোৱা মতে, ধৃত ব্যক্তিজনক মঙলবাৰে মেখলীগঞ্জ মহকুমা আদালতত হাজিৰ কৰা হয়। বাকী অভিযুক্তক বিচাৰি উলিয়াবলৈ অব্যাহত আছে অভিযান।