দেশৰ নতুন মুখ্য ন্যায়াধীশ হিচাপে নিযুক্ত ন্যায়াধীশ সূৰ্য কান্ত, এই দিনটোৰ পৰা পালন কৰিব দায়িত্ব

দেশৰ নতুন মুখ্য ন্যায়াধীশ হিচাপে নিযুক্ত হৈছে ন্যায়াধীশ সূৰ্য কান্ত। অহা ২৪ নৱেম্বৰৰ পৰা ন্যায়াধীশ সূৰ্য কান্তই উচ্চ ন্যায়ালয়ৰ মুখ্য ন্যায়াধীশ হিচাপে কাৰ্যনিৰ্বাহ কৰিব। ইতিপূৰ্বে বৰ্তমানৰ মুখ্য ন্যায়াধীশ বি আৰ গাভাইয়ে কেন্দ্ৰীয় চৰকাৰক সূৰ্য কান্তক নিযুক্তি প্ৰদানৰ পৰামৰ্শ দিছিল। ইয়াৰ পিছত ৰাষ্ট্ৰপতিয়ে ন্যায়াধীশ সূৰ্য কান্তৰ নাম শীৰ্ষ আদালতৰ মুখ্য ন্যায়াধীশ হিচাপে অনুমোদন জনাইছে। কেন্দ্ৰীয় আইন আৰু ন্যায় তথা সংসদীয় পৰিক্ৰমা ৰাজ্যিক মন্ত্ৰী অৰ্জুন ৰাম মেঘৱালে এই সন্দৰ্ভত এটা পোষ্ট কৰিছে।

এই পোষ্টত অৰ্জুন ৰাম মেঘৱালে লিখিছে, “ভাৰতীয় সংবিধানে প্ৰদান কৰা ক্ষমতা ব্যৱহাৰ কৰি ৰাষ্ট্ৰপতি দ্ৰৌপদী মুৰ্মুৱে ২০২৫ চনৰ ২৪ নৱেম্বৰৰ পৰা কাৰ্যকৰী হোৱাকৈ উচ্চতম ন্যায়ালয়ৰ ন্যায়াধীশ সূৰ্য কান্তক ভাৰতৰ মুখ্য ন্যায়াধীশ হিচাপে নিযুক্তি দিয়ে। তেখেতলৈ মোৰ আন্তৰিক অভিনন্দন আৰু শুভেচ্ছা জ্ঞাপন কৰিলো।”

In exercise of the powers conferred by the Constitution of India, the President is pleased to appoint Shri Justice Surya Kant, Judge of the Supreme Court of India as the Chief Justice of India with effect from 24th November, 2025.

I convey my heartiest congratulations and best… pic.twitter.com/3X0XFd1Uc9

— Arjun Ram Meghwal (@arjunrammeghwal) October 30, 2025

বৰ্তমান উচ্চতম ন্যায়ালয়ৰ মুখ্য ন্যায়াধীশ বি.আৰ. গাভাইৰ কাৰ্যকাল অহা ২৩ নৱেম্বৰত অন্ত পৰিব। কাৰ্যকাল সমাপ্তিৰ পূৰ্বে গাভাইয়ে ন্যায়াধীশ সূৰ্য কান্তৰ নাম পৰৱৰ্তী মুখ্য ন্যায়াধীশ হিচাপে প্ৰস্তাৱ দিছিল আৰু এই নামেই মুখ্য ন্যায়াধীশ হিচাপে অনুমোদিত হৈছে। এতিয়া ২৪ নৱেম্বৰত ভাৰতৰ ৫৩ সংখ্যক মুখ্য ন্যায়াধীশ হিচাপে কাৰ্যভাৰ গ্ৰহণ কৰিব ন্যায়াধীশ সূৰ্য কান্তই।

দেশৰ মুখ্য ন্যায়াধীশ হিচাপে ন্যায়াধীশ সূৰ্য কান্তই ২০২৭ চনৰ ৯ ফেব্ৰুৱাৰীলৈকে কাৰ্যনিৰ্বাহ কৰিব। উল্লেখ্য যে ১৯৬২ চনৰ ১০ ফেব্ৰুৱাৰীত হাৰিয়ানাৰ হিছাৰ জিলাত জন্মগ্ৰহণ কৰিছিল ন্যায়াধীশ সূৰ্য কান্তই। হিছাৰৰ চৰকাৰী স্নাতকোত্তৰ মহাবিদ্যালয়ৰ পৰা স্নাতক ডিগ্ৰী লাভ কৰি ১৯৮৪ চনত ৰোহটকৰ মহৰ্ষি দয়ানন্দ বিশ্ববিদ্যালয়ৰ পৰা আইনৰ ডিগ্ৰী লাভ কৰে।