ভাৰতীয় সেনাৰ ‘গোপন অস্ত্ৰ’ অন্বেষাৰ মহাকাশ যাত্ৰাত বিজুতি, উদ্ধাৰৰ চেষ্টাত ব্ৰতী ইছৰো

ভাৰতীয় মহাকাশ গৱেষণা সংস্থা (ISRO)-ই আজি পুৱা অন্ধ্ৰপ্ৰদেশৰ শ্ৰীহৰিকোটাৰ সতীশ ধৱন মহাকাশ কেন্দ্ৰৰ পৰা ২০২৬ বৰ্ষৰ প্ৰথমটো ছেটেলাইট মিছন মুকলি কৰিছিল। পোলাৰ চেটেলাইট লঞ্চ ভেহিকেল, চমুকৈ PSLV-C62 ৰ জৰিয়তে কৰা এই উৎক্ষেপণত দুৰ্ভাগ্যৱশতঃ শেষ মুহূৰ্তত এক কাৰিকৰী বিজুতিয়ে দেখা দিছে। বৰ্তমান ইছৰোৰ বিজ্ঞানীসকলে এই ত্ৰুটিৰ কাৰণ বিচাৰি উলিয়াবলৈ চেষ্টা কৰিছে। ইছৰোৰ তৰফৰ পৰা জনোৱা অনুসৰি, মিছনৰ তৃতীয় পৰ্যায়ৰ (PS3 stage) শেষৰ ফালে এক বিসংগতি ধৰা পৰে।

বৰ্তমান ইয়াৰ বিতং বিশ্লেষণ চলাই থকা হৈছে বুলি ইছৰোৱে সদৰী কৰিছে। এই মিছনৰ জৰিয়তে মুঠ ১৫ টা উপগ্ৰহ মহাকাশলৈ প্ৰেৰণ কৰা হৈছিল। এই ১৫টা উপগ্ৰহৰ ভিতৰত মুখ্য আছিল ভাৰতৰ পৃথিৱী নিৰীক্ষণকাৰী উপগ্ৰহ (EOS-N1)’অন্বেষা’।

ইছৰোৰ অধ্যক্ষ ড° ভি. নাৰায়ণনে এই সন্দৰ্ভত কয় যে তৃতীয় পৰ্যায়ৰ শেষলৈকে বাহনখনৰ প্ৰদৰ্শন সঠিক আছিল, কিন্তু তাৰ পিছতে ইয়াৰ গতিপথৰ কিছু পৰিৱৰ্তন দেখা যায়। বিজ্ঞানীসকলে এতিয়া তথ্যসমূহ পৰীক্ষা কৰি আছে বুলি ইছৰোৰ অধ্যক্ষগৰাকীয়ে সদৰী কৰিছে।

VIDEO | Sriharikota: Sharing an update on the PSLV-C62/EOS-N1 mission, ISRO Chairman Dr. V. Narayanan says, “Today, we attempted the PSLV-C62 EOS-N1 mission. The PSLV vehicle is a four-stage vehicle with two solid stages and two liquid stages. The performance of the vehicle up to… pic.twitter.com/bq8Eh3rkyi

— Press Trust of India (@PTI_News) January 12, 2026

‘অন্বেষা’ (EOS-N1) উপগ্ৰহৰ গুৰুত্ব

অন্বেষাক ভাৰতৰ মহাকাশৰ চিচিটিভি বুলি কোৱা হৈছে। এই উপগ্ৰহটো পৃথিৱীৰ পৰা প্ৰায় ৬০০ কিলোমিটাৰ ওপৰৰ কক্ষপথত স্থাপন কৰাৰ পৰিকল্পনা কৰা হৈছিল, যাতে ই অনুপ্ৰৱেশকাৰী আৰু সন্ত্ৰাসবাদীৰ ওপৰত তীক্ষ্ণ নজৰ ৰাখিব পাৰে। এই উপগ্ৰহটো প্ৰতিৰক্ষা গৱেষণা আৰু উন্নয়ন সংস্থা (DRDO)-ই প্ৰস্তুত কৰিছে।

ইয়াৰ বিশেষত্ব হ’ল যে ই ঘন অৰণ্য বা বাংকাৰত লুকাই থকা শত্ৰুৰো স্পষ্ট ছবি ল’বলৈ সক্ষম। অন্বেষাই হাইপাৰস্পেক্ট্ৰেল ৰিম’ট চেন্সিং প্ৰযুক্তি ব্যৱহাৰ কৰে। এই প্ৰযুক্তিয়ে পোহৰৰ বিশাল স্পেক্ট্ৰাম ধৰা পেলাব পাৰে, যাৰ ফলত শত্ৰুৰ বাংকাৰ নিৰ্মাণ বা মাৰাত্মক অস্ত্ৰ-শস্ত্ৰ আৰু ড্ৰাগছৰ চোৰাং ব্যৱসায় ধৰা পেলোৱাটো সহজ হ’ব।

ভাৰতীয় সেনাৰ বাবে এয়া এক ‘গোপন অস্ত্ৰ’ৰ দৰে, যিয়ে দেশৰ সীমান্ত সুৰক্ষিত কৰাত গুৰুত্বপূৰ্ণ ভূমিকা ল’ব। এই মিছনত কেৱল ভাৰতীয় উপগ্ৰহ অন্বেষাই নহয়, বৰঞ্চ ফ্ৰান্স, নেপাল, ব্ৰাজিল আৰু ব্ৰিটেইনৰ দৰে দেশৰ ৮ টা বিদেশী উপগ্ৰহসহ মুঠ ১৪ টা সৰু উপগ্ৰহ প্ৰেৰণ কৰা হৈছিল।