আকাশ মাৰ্গত সংকট, স্থল মাৰ্গত হাহাকাৰ…ইণ্ডিগ’ৰ সমস্যা অব্যাহত, যাত্ৰীৰ সাৰথি ৰূপত স্পাইচজেট আৰু ভাৰতীয় ৰেলৱে
ইণ্ডিগ’ সংকটৰ মাজতে স্পাইচজেটে যাত্ৰীসকলৰ সুবিধাৰ বাবে বিশেষ বিমান চলাচল কৰাৰ সিদ্ধান্ত লৈছে। সংকটৰ মাজতে স্পাইচজেটে ১০০খন অতিৰিক্ত বিমান চলোৱাৰ কথা ঘোষণা কৰিছে। অৱশ্যে বিমানৰ ভাড়া ব্যাপকভাৱে বৃদ্ধি হোৱা পৰিলক্ষিত হৈছে।
এতিয়াও ইণ্ডিগ’ৰ যাত্ৰীসকলৰ সমস্যা হ্ৰাস পোৱাৰ কোনো লক্ষণ দেখা পোৱা নাই, একেৰাহে চাৰিদিনৰ বাবে বিমান সেৱা বাতিল কৰা হৈছে। আজিও ইণ্ডিগ’ৰ সেৱা প্ৰভাৱিত হৈ থাকিব, শুকুৰবাৰে বাতিল কৰা হৈছে প্ৰায় ১০০০খন বিমান। কাৰ্যকৰী অসুবিধা ক্ৰমান্বয়ে উন্নত হৈছে যদিও কোম্পানীটোৰ চিইঅ’ পিটাৰ এলবাৰ্ছে ক্ষমা বিচাৰি কয় যে ১০ৰ পৰা ১৫ ডিচেম্বৰৰ ভিতৰত পৰিস্থিতি স্বাভাৱিক হোৱাৰ সম্ভাৱনা আছে। আজিও বাতিল কৰা হৈছে ৪৫২ খন ইণ্ডিগ’ বিমান।
ইণ্ডিগ’ সংকটৰ মাজতে স্পাইচজেটে যাত্ৰীসকলৰ সুবিধাৰ বাবে বিশেষ বিমান চলাচল কৰাৰ সিদ্ধান্ত লৈছে। সংকটৰ মাজতে স্পাইচজেটে ১০০খন অতিৰিক্ত বিমান চলোৱাৰ কথা ঘোষণা কৰিছে। অৱশ্যে বিমানৰ ভাড়া ব্যাপকভাৱে বৃদ্ধি হোৱা পৰিলক্ষিত হৈছে।
সমগ্ৰ বিষয়টোৰ উচ্চ পৰ্যায়ৰ তদন্তৰ নিৰ্দেশ দিছে চৰকাৰে। ইফালে এই সংকটৰ মাজতে ভাৰতীয় ৰে’লৱেও বিশেষ ৰে’ল চলোৱাৰ কথা ঘোষণা কৰিছে। অসামৰিক বিমান পৰিবহণ মন্ত্ৰালয়ে ২৪ ঘণ্টীয়া নিয়ন্ত্ৰণ কক্ষৰ পৰা বিমানৰ পৰিচালনা, আপডেট, আৰু ভাড়া নিৰীক্ষণ কৰি আছে।
বিশেষ ৰেল আৰু ১০০ খন অতিৰিক্ত বিমান
যাত্ৰীৰ অসুবিধাৰ প্ৰতি সঁহাৰি জনাই ভাৰতীয় ৰে’লৱেই বিশেষ ৰে’ল চলোৱাৰ সিদ্ধান্ত লৈছে। ৩৭খন ৰে’লত ১১৬টা অতিৰিক্ত ডবা সংযোজন কৰা হৈছে। এই অসুবিধাসমূহৰ সমাধানৰ বাবে স্পাইচজেটে অতিৰিক্ত ১০০খন বিমান চলাব। হঠাতে বৃহৎ সংখ্যক ইণ্ডিগ’ বিমান বাতিল হোৱাৰ ফলত ৰে’ল যাত্ৰাতো প্ৰভাৱ পৰিছে, যাৰ ফলত ৰে’লৰ টিকটৰ চাহিদা বৃদ্ধি পাইছে। দিল্লীৰ পৰা যাত্ৰা কৰা বেছিভাগ ৰে’লৰ বাবে হঠাতে টিকটৰ চাহিদা বৃদ্ধি পাইছে। ৭০০ৰ পৰা ১০০০ কিলোমিটাৰ দূৰত্বত যাত্ৰা কৰা লোকসকলে বৃহৎ সংখ্যক টিকট বুকিং কৰিছে।
ক’ৰ পৰা কিমানখন বিমান বাতিল হ’ল?
দিল্লীৰ পৰা আজি মুঠ ৮৬খন বিমান বাতিল কৰা হয়, য’ত ৩৭খন প্ৰস্থান আৰু ৪৯খন আগমনৰ বিমান। মুম্বাই বিমানবন্দৰৰ পৰা আজি ৫১খন আগমন আৰু ৫৮খন প্ৰস্থানকে ধৰি ১০৯খন ইণ্ডিগ’ বিমান বাতিল কৰা হয়। আহমেদাবাদৰ ইণ্ডিগ’ৰ ১৯খন বিমান বাতিল কৰা হয়, য’ত ৭খন আগমন আৰু ১২খন প্ৰস্থানৰ বিমান আছিল। তিৰুৱনন্তপুৰমতো ইণ্ডিগ’ৰ ছখন বিমান বাতিল কৰা হৈছে।
কোনবোৰ চহৰ আটাইতকৈ বেছি সমস্যাৰ সন্মুখীন হৈছে?
ইণ্ডিগ’ৰ কাৰ্যকৰী বিফলতাই ভাৰতৰ প্ৰায় সকলো ডাঙৰ চহৰকে প্ৰভাৱিত কৰিছে। দিল্লীৰ পৰা কলকাতালৈ, দিল্লীৰ পৰা জয়পুৰলৈ, দিল্লীৰ পৰা আহমেদাবাদলৈ, দিল্লীৰ পৰা মুম্বাইলৈ, দিল্লীৰ পৰা জম্মুলৈ, দিল্লীৰ পৰা শ্ৰীনগৰলৈ, দিল্লীৰ পৰা বেংগালুৰুলৈ, দিল্লীৰ পৰা হায়দৰাবাদলৈ,আৰু দিল্লীৰ পৰা চেন্নাইলৈ যোৱা ৰে’ল যাত্ৰীৰ সংখ্যা হঠাৎ বৃদ্ধি পাইছে। ৰে’লৱেৰ সূত্ৰ অনুসৰি কালিৰে পৰা হঠাতে টিকটৰ চাহিদা বৃদ্ধি পাইছে।
