আপোনাৰ বেংক একাউণ্ট আৰক্ষীয়ে ফ্ৰীজ কৰিব পাৰেনে? সৰ্বোচ্চ ন্যায়ালয়ৰ গুৰুত্বপূৰ্ণ ৰায়

শেহতীয়াকৈ ইডি আদালতত হাজিৰ হোৱাৰ সময়ত পশ্চিম বংগৰ এছএছচি কেলেংকাৰীৰ সৈতে জড়িত অৰ্পিতা মুখাৰ্জীয়ে কয় যে ইডিয়ে বেংক একাউণ্ট ফ্ৰীজ কৰাৰ পিছত তেওঁৰ অৱস্থা অতি ভয়াৱহ হৈ পৰিছে। বিত্তীয় লেনদেনৰ সৈতে জড়িত অনিয়মৰ তদন্ত কৰে ইডিয়ে। তেওঁলোকৰ বিশেষ ক্ষমতা আছে। কিন্তু আৰক্ষীৰ এই ক্ষমতা আছেনে? আৰ্থিক জালিয়াতিৰ সৈতে জড়িত গোচৰৰ তদন্ত তেওঁলোকে কৰিব পাৰে। কিন্তু অভিযুক্তৰ বেংক একাউণ্ট ফ্ৰীজ কৰিব পাৰিবনে? শেহতীয়াকৈ উচ্চতম ন্যায়ালয়ত এই প্ৰশ্ন উত্থাপন হৈছে।

উৎকোচ গোচৰত এজন উচ্চ পদস্থ বিষয়াৰ বেংক একাউণ্ট ফ্ৰীজ কৰি ৰাখিছিল আৰক্ষীয়ে। ইয়াৰ পিছতে অভিযুক্তই উচ্চ ন্যায়ালয়ৰ কাষ চাপিছিল। উচ্চ ন্যায়ালয়ে অভিযুক্তৰ সপক্ষে ৰায় দিয়ে। উচ্চ ন্যায়ালয়ে লক্ষ্য কৰিছিল যে আৰক্ষীয়ে উৎকোচ গ্ৰহণৰ অভিযোগত ১৯৮৮ চনৰ দুৰ্নীতি প্ৰতিৰোধ আইনৰ অধীনত এজন ৰাজহুৱা কৰ্মচাৰীক তদন্ত, জেৰা আৰু সৰ্বোপৰি গ্ৰেপ্তাৰ কৰিব পাৰে। কিন্তু তেওঁলোকে দণ্ডবিধিৰ ১০২ নং ধাৰা অৰ্থাৎ অভিযুক্তৰ সকলো সম্পত্তি জব্দ বা ফ্ৰীজ কৰা আইন ব্যৱহাৰ কৰিব নোৱাৰে।

সেই সময়ত আদালতে অভিযুক্তৰ বেংক একাউণ্ট ডিফ্ৰ’জেন বা মুকলি কৰিবলৈও নিৰ্দেশ দিছিল। ইয়াৰ পিছতে ৰাজ্য চৰকাৰে এই ৰায়ক প্ৰত্যাহ্বান জনাই উচ্চতম ন্যায়ালয়ৰ কাষ চাপিছিল।

চৰকাৰী অধিবক্তাই যুক্তি দিয়ে যে তদন্তৰ স্বাৰ্থত বেংক একাউণ্ট ফ্ৰীজ বা অবৈধ সম্পত্তি জব্দ কৰাটো প্ৰয়োজনীয়। অভিযুক্তই যাতে কোনো ধৰণে ‘অবৈধ জমা ধন’ক প্ৰভাৱিত কৰিব নোৱাৰে তাৰ বাবে আৰক্ষীয়ে এই পদক্ষেপ গ্ৰহণ কৰিব লাগিব।

বিপক্ষৰ অধিবক্তাই যুক্তি দিয়ে যে দুৰ্নীতি প্ৰতিৰোধ আইনখনে যেনেকৈ তদন্তকাৰীক তদন্তৰ সম্পূৰ্ণ স্বাধীনতা প্ৰদান কৰে, ঠিক তেনেদৰে এইটোও স্পষ্ট কৰা হৈছে যে তেওঁলোকে অনুমতি অবিহনে সম্পত্তি জব্দ কৰিব নোৱাৰে বা একাউণ্ট ফ্ৰীজ কৰিব নোৱাৰে।

উচ্চতম ন্যায়ালয়ে এই ক্ষেত্ৰত কয়, এইটো সঁচা যে দুৰ্নীতি প্ৰতিৰোধ আইন, ১৯৮৮ আৰু দণ্ডবিধিৰ ১০২ ধাৰা বিভিন্ন প্ৰসংগত ব্যৱহাৰ কৰিব পৰাকৈ ৰচনা কৰা হৈছে। কিন্তু যদিহে তদন্তৰ প্ৰাৰম্ভিক পৰ্যায়ত অভিযুক্তৰ জমা ধন জব্দ কৰা নহয় তেন্তে পিছত তদন্তত প্ৰভাৱ পেলোৱাৰ গুৰুতৰ সম্ভাৱনা আছে। ইয়াৰ পিছত আদালতে উচ্চ ন্যায়ালয়ৰ ৰায় বাতিল কৰে। ফলত জমা ধন জব্দ কৰাৰ সিদ্ধান্ত বলবৎ হৈ আছে।