প্ৰথমে ৩টাকৈ বেজী, শৰীৰত প্ৰচণ্ড আঘাত, তাৰ পিছত…প্ৰেমীকাৰ সৈতে চিকিৎসকৰ বৰ্বৰ কাণ্ড

প্ৰেমৰ বাবে মানুহৰ জীৱন পৰ্যন্ত ত্যাগ কৰিব পাৰে। কিন্তু বৰ্তমানৰ প্ৰেমে জীৱন ল’বলৈহে উদ্যত হৈ পৰে। এনে বহু ঘটনা আমাৰ চকুৰ আগতে নিতৌ ঘটি থাকে। শেহতীয়াকৈ এগৰাকী যুৱতীৰ ওপৰত হোৱা নৃশংসতাই বৰ্তমান যুগৰ প্ৰেমৰ প্ৰকৃত স্বৰূপ উদঙাই দিছে! এজন চিকিৎসকে প্ৰথমে তিনিটা বেজীৰে যুৱতীগৰাকীক অচেতন কৰিলে। তাৰ পিছত তেওঁ চোকা অস্ত্ৰৰে তেওঁৰ মুখ আৰু শৰীৰত কেইবাটাও গভীৰ আঘাত কৰে। তাৰ পিছত তেওঁ তেওঁক উলংগ কৰি দিল্লী-লক্নৌ ঘাইপথত পেলাই দিলে। যাৰ লগত চিকিৎসকে এই কাৰ্য সংঘটিত কৰিছিল সেই মহিলাগৰাকী তেওঁৰ প্ৰেমিকা বুলি জানিব পৰা গৈছে।

চিকিৎসকজনে ধৰি লৈছিল যে ঘাইপথত চলি থকা বাহনে তেওঁক মহতিয়াই নিব আৰু সেই বৰ্বৰ কাণ্ড পথ দুৰ্ঘটনালৈ ৰূপান্তৰিত হ’ব। কিন্তু যুৱতীগৰাকীৰ ভাগ্যত জীৱন বাকী আছিল। যাৰ বাবে গাঁৱৰ মানুহে তেওঁক সেই অৱস্থাত থকা লক্ষ্য কৰিছিল। যুৱতীগৰাকীৰ যথেষ্ট ৰক্তক্ষৰণ হৈছিল। তাৰ পিছত গাঁৱৰ মানুহে আৰক্ষীক খবৰ দিয়ে।  এই ঘটনাটো উত্তৰ প্ৰদেশৰ বাৰেলীৰ।

ইয়াৰ পিছতে ঘটনাস্থলীত উপস্থিত হয় আৰক্ষী। লগে লগে যুৱতীগৰাকীক কাপোৰেৰে ঢাকি জিলা চিকিৎসালয়ত ভৰ্তি কৰোৱা হয়। যুৱতীগৰাকীৰ বক্তব্যৰ ভিত্তিত আৰক্ষীয়ে চিকিৎসকজনক সোধা-পোছা কৰে। প্ৰথম অৱস্থাত চিকিৎসকে যুৱতীগৰাকীক চিনি নাপায় বুলি আৰক্ষীক জনাইছিল যদিও যেতিয়া তেওঁৰ মোবাইল কলৰ সবিশেষ দেখুৱাইছিল তেতিয়া তেওঁৰ প্ৰেমৰ সম্পৰ্ক থকা বুলি স্বীকাৰ কৰে।

জেৰাৰ সময়ত চিকিৎসকজনে আৰক্ষীক জনাইছিল যে তেওঁ যুৱতীগৰাকীৰ পৰা মুক্তি পাব বিচাৰে, সেয়ে এই কাণ্ড সংঘটিত কৰিছিল। খবৰ অনুসৰি যুৱতীগৰাকী বান্দায়ুৰ বাসিন্দা। ৫ বছৰ আগতে তেওঁ বাৰেলী মেডিকেল কলেজত নাৰ্চিং অধ্যয়ন কৰিছিল। পিছত তেওঁ বিছালপুৰ ৰোডৰ এখন ব্যক্তিগত চিকিৎসালয়ত চাকৰি পালে। তাতে হাস্পতালত এজন BAMS চিকিৎসকগৰাকীক লগ পাইছিল, আৰু দুয়োৰে প্ৰেম হৈছিল।

চিকিৎসকে যুৱতীগৰাকীক বিয়া কৰাব বুলি প্ৰতিশ্ৰুতি দিছিল। পিছত তেওঁ পূৰ্বে বিয়া হোৱা বুলি গম পালে যুৱতীগৰাকীয়ে। ইয়াৰ ফলত চিকিৎসক আৰু যুৱতীগৰাকীৰ মাজত কাজিয়াৰ সৃষ্টি হয়। মঙলবাৰে যুৱতীগৰাকীয়ে চিকিৎসকক জনাইছিল যে তেওঁৰ পেটৰ বিষ হৈছে। চিকিৎসকজনে চিকিৎসাৰ অজুহাতত ঘৰত উপস্থিত হৈ তিনিটা বেজী দি তেওঁক অচেতন কৰি লয়। তাৰ পিছত তেওঁ চোকা অস্ত্ৰৰে তেওঁৰ মুখ, মূৰ আৰু শৰীৰত আঘাত কৰে।

ইয়াৰ পিছতে চিকিৎসকে যুৱতীগৰাকীক তেওঁৰ গাড়ীৰ সন্মুখৰ চিটত ৰাখি ড্ৰিপ লগালে।  পিছত মাজনিশা তেওঁক উলংগ কৰি ইনভাৰ্টিছ বিশ্ববিদ্যালয়ৰ ওচৰৰ ঘাইপথৰ কাষত পেলাই দিলে। তেওঁৰ পৰিকল্পনা আছিল যুৱতীগৰাকীৰ ওপৰেৰে বাহন পাৰ হৈ যাব, যাৰ ফলত এই মৃত্যুক দুৰ্ঘটনাৰ দৰে দেখা যাব। এছ এছ পি অনুৰাগ আৰ্যই উল্লেখ কৰে যে চিকিৎসকজনক সোধা-পোছা কৰা হৈছে আৰু তেওঁৰ বিৰুদ্ধে গোচৰ ৰুজু কৰা হ’ব।সম্প্ৰতি জিলা চিকিৎসালয়ত চিকিৎসাধীন হৈ আছে যুৱতীগৰাকী। তেওঁৰ বক্তব্যৰ ভিত্তিত আৰক্ষীয়ে এই ঘটনা সন্দৰ্ভত অধিক ব্যৱস্থা গ্ৰহণ কৰিব।