গাড়ীৰে গৈ থাকোতেই হঠাৎ পাহাৰৰ পৰা খহি আহিল শিল-মাটি, মুহূৰ্ততে প্ৰাণ হেৰুৱালে শিশুসহ ৭ গৰাকীয়ে
অৰুণাচলত ভূমিস্খলনত প্ৰাণ হেৰুৱালে ৭ গৰাকীকৈ লোকে । ইয়াৰ ভিতৰত দুগৰাকী শিশু আৰু এগৰাকী গৰ্ভৱতী মহিলাও আছে । পাহাৰৰ পৰা খহি অহা শিল আৰু মাটিয়ে এখন বাহন পথৰ পৰা উটুৱাই নি দ খাৱৈত পেলাই গৈ । ফলত বাহনখনত থকা যাত্ৰীসকলৰ মৃত্যু ঘটে ।
মৌচুমীৰ আগমনৰ লগে লগে প্ৰবল বৃষ্টিপাতৰ সাক্ষী হৈছে দেশৰ আন প্ৰান্তৰ লগতে উত্তৰ-পূব ভাৰতৰ ৰাজ্যকেইখন । কেবাদিনো ধৰি হোৱা নেৰানেপেৰা বৰষুণে অসম, অৰুণাচল, মণিপুৰ আৰু মিজোৰামত ব্যপক প্ৰভাৱ পেলোৱা দেখা গৈছে । গুৱাহাটী মহানগৰীত কালি বাট-পথ পানীৰে উপচি পৰাৰ লগতে নিশা হোৱা ভূমিস্খলনৰ ফলত ৫ জন লোক নিহত হোৱা বুলি খবৰ পোৱা গৈছে । একেদৰে অৰুণাচল প্ৰদেশতো ভূমিস্খলনে লৈছে ভয়াৱহ ৰূপ ।
পূব কামেং জিলাৰ বানা আৰু ছেপ্পা সংযোগী ১৩ নং ৰাষ্ট্ৰীয় ঘাইপথত যোৱা নিশা সংঘটিত হয় এই শোকাৱহ ঘটনা । ৭ গৰাকী যাত্ৰীক কঢ়িয়াই অনা এখন বাহন ভূমিস্খলনৰ সন্মুখীন হয় আৰু পাহাৰৰ পৰা খহি অহা শিল-মাটিয়ে বাহনখনক নি এটা দ খাৱৈত পুতি পেলায় । পিছত উদ্ধাৰকাৰী দলে নিশ্চিত কৰে যে তাত থকা সাতজন লোকৰ থিতাতে মৃত্যু হৈছে ।
নিহতসকলৰ ভিতৰত শংকৰ অঁকা, তেওঁৰ পত্নী তাছুম বাডী আৰু তেওঁলোকৰ সন্তান কাচুং (৫) আৰু নিচা (২) আছে । পৰিয়ালৰ সূত্ৰ অনুসৰি ভূমিস্খলনত এগৰাকী গৰ্ভৱতী মহিলা আৰু দুটা সন্তানৰো মৃত্যু হোৱা বুলি জানিব পৰা গৈছে । ইফালে সেই পথেৰে গৈ থকা আন এখন বাহন কথমপি এই দুৰ্যোগৰ পৰা ৰক্ষা পৰে । পাহাৰ খহি অহা দেখি চালকে ক্ষীপ্ৰতাৰে বাহনখন নিয়ন্ত্ৰণ কৰে । কোনোলোক হতাহত হোৱা নাই যদিও সামান্য আঘাত পোৱা বুলি জানিব পৰা গৈছে ।
বিশেষকৈ বাৰিষাৰ সময়ত অৰুণাচল প্ৰদেশৰ অন্যতম ভূমিস্খলন প্ৰৱণ কৰিড’ৰ হিচাপে বহুতেই গণ্য কৰে বানা-চেপ্পা পথটো । ভংগুৰ ঢাল, অপৰ্যাপ্ত নিষ্কাশন আৰু অপৰ্যাপ্ত ৰক্ষণাবেক্ষণ আদি দীৰ্ঘদিনীয়া সমস্যাই এই অত্যাৱশ্যকীয় পথটোক ঋতুভিত্তিক মৃত্যুৰ ফান্দলৈ ৰূপান্তৰিত কৰিছে ।
প্ৰতিকূল বতৰৰ পৰিস্থিতিয়ে অভিযানত বাধাৰ সৃষ্টি কৰাৰ পিছতো স্থানীয় কৰ্তৃপক্ষই অনুসন্ধান আৰু উদ্ধাৰৰ প্ৰচেষ্টা চলাইছে । জৰুৰীকালীন দলসমূহে প্ৰচণ্ড বৰষুণ, পিছল ভূখণ্ড, আৰু জমা হোৱা ধ্বংসাৱশেষৰ আঁতৰোৱাৰ চেষ্টা চলাই আছে, যাতে কোনো লোকসকলৰ বাবে আৰু কোনো বিপদ নহয় ।
It’s very painful to hear about the tragic loss of seven lives in my Assembly constituency due to a landslide on NH 13 Road in between Bana & Seppa. My heartfelt condolences to the bereaved families during this difficult time. I request everyone to remain vigilant and avoid… pic.twitter.com/q9wuMWYvtZ
— Mama Natung (@NatungMama) May 31, 2025
এই শোকাৱহ ঘটনাত গভীৰ শোক প্ৰকাশ কৰি অৰুণাচল প্ৰদেশৰ গৃহমন্ত্ৰী তথা ছেপ্পা পশ্চিমৰ বিধায়ক মামা নাটুঙে ছ’চিয়েল মিডিয়াৰ জৰিয়তে প্ৰতিক্ৰিয়া প্ৰকাশ কৰে । তেওঁ পোষ্টত লিখে, ‘‘এই মৰ্মান্তিক ক্ষতিৰ কথা শুনি বৰ কষ্ট পাইছোঁ… শোকসন্তপ্ত পৰিয়ালসমূহলৈ মোৰ আন্তৰিক সমবেদনা । তেওঁলোকৰ আত্মাই চিৰশান্তি লাভ কৰক । ওম শান্তি শান্তি ।” বিশেষকৈ ঘাইপথৰ দুৰ্বল অংশত প্ৰতিকূল বতৰৰ সময়ত সজাগ হৈ থাকিবলৈ আৰু ভ্ৰমণৰ পৰা আঁতৰি থাকিবলৈও তেওঁ বাসিন্দাসকলক আহ্বান জনায় ।
এই ঘটনাই অঞ্চলটোত জৰুৰী আন্তঃগাঁথনি উন্নীতকৰণ আৰু উন্নত দুৰ্যোগৰ প্ৰস্তুতিৰ দাবীত জনসাধাৰণৰ আন্দোলন পুনৰ জগাই তুলিছে । স্থানীয় লোকসকলে এনে দুৰ্ঘটনা ৰোধ কৰিবলৈ সঠিক আগতীয়া সতৰ্কবাণীৰ ব্যৱস্থা, ঢাল স্থিৰ কৰাৰ ব্যৱস্থা আৰু নিৰাপদ পথ পৰিকল্পনাৰ আহ্বান জনাই আহিছে ।
