সকলো বিতৰ্কৰ অৱসান, হেৰা ফেৰী-৩ ত ‘বাবুৰাও’ৰ ৰূপত দেখা যাব পৰেশ ৰাৱালক

হাস্যমধুৰ চলচ্চিত্ৰ সমূহৰ ভিতৰত প্ৰায় সংখ্যকৰে পছন্দৰ এখন ছবি হৈছে হেৰা ফেৰী। ইতিমধ্যে হেৰা ফেৰীৰ দুটাকৈ সংস্কৰণে দৰ্শকৰ বিপুল সমাদৰ লাভ কৰিছিল। এইবাৰ আহিছে আছে হেৰা ফেৰী-৩। এই ছবিখনৰ এক জনপ্ৰিয় চৰিত্ৰ হৈছে বাবুৰাও বা বাবু ভায়া। চৰিত্ৰটো ৰূপায়ন কৰিছিল যশস্বী অভিনেতা পৰেশ ৰাৱালে। কিন্তু হেৰা ফেৰী-৩ ত পৰেশ ৰাৱালক দেখা পোৱা নাযাব বুলি এক চৰ্চা চলিছিল। অৱশ্যে শেহতীয়াকৈ জানিব পৰা গৈছে যে পৰেশ ৰাৱালে হেৰা ফেৰী-৩ ত অভিনয় কৰিবলৈ ইচ্ছা প্ৰকাশ কৰিছে।

বহু প্ৰত্যাশিত ছবি হেৰা ফেৰী-৩ৰ পৰা ওলাই অহাৰ কেইসপ্তাহমানৰ পাছত অভিনেতা পৰেশ ৰাৱালে ফ্ৰেঞ্চাইজিলৈ ঘূৰি অহাটো নিশ্চিত কৰিছে। হয়, আপুনি ঠিকেই শুনিছে! হেৰা ফেৰীলৈ উভতি আহিছে পৰেশ ৰাৱাল। হিমাংশু মেহতাৰ সৈতে তেওঁৰ প’ডকাষ্টত হোৱা বাৰ্তালাপৰ সময়ত পৰেশ ৰাৱালে অৱশেষত এই বিতৰ্ক সন্দৰ্ভত মন্তব্য কৰে। আনকি তেওঁৰ সহ অভিনেতা অক্ষয় কুমাৰ, সুনীল শেট্টী আৰু ছবিখনৰ পৰিচালক প্ৰিয়দৰ্শনক প্ৰশংসাও কৰে।

পৰেশ ৰাৱালে ছবিখনত অভিনয় নকৰে বুলি ওলাই অহাৰ পিছত অক্ষয় কুমাৰৰ প্ৰডাকচন হাউছ কেপ অৱ গুড ফিল্মছে পৰেশ ৰাৱালৰ বিৰুদ্ধে অভিযোগ কৰে। পিছত অভিনেতাগৰাকীয়ে প্ৰডাকচন কোম্পানীটোক ১৫ শতাংশ সুতসহ ১১ লাখ টকা ঘূৰাই দিয়ে।

হেৰা ফেৰী-৩ত দেখা যাব পৰেশ ৰাৱালক?

হিমাংশু মেহতাৰ সৈতে হোৱা কথা-বতৰাত অভিনেতা পৰেশ ৰাৱালে কয়, ‘‘কোনো বিতৰ্ক নাই। মই বিশ্বাস কৰোঁ যে যেতিয়া মানুহে কিবা এটা বিষয়ক ইমান ভাল পায়, তেতিয়া আপুনি অধিক সাৱধান হ’ব লাগে। এয়া দৰ্শকৰ প্ৰতি আমাৰ দায়িত্ব। দৰ্শকে আপোনাক ইমান প্ৰশংসা কৰিছে। আপুনি কথাবোৰক সহজভাৱে ল’ব নোৱাৰে। কষ্টৰে ছবিখন কৰা উচিত। এতিয়া সকলো সমাধান হৈছে।”

তেওঁ আৰু কয়, “গতিকে, মোৰ মতামত আছিল যে সকলোৱে একেলগে কষ্ট কৰক, আৰু একো নাই। এতিয়া সকলো সমাধান হৈছে। পূৰ্বেও আহিবলগীয়া আছিল, মাথোঁ আমি নিজকে ফাইন টিউন কৰিবলগীয়া হৈছিল। আটাইবোৰেই সৃষ্টিশীল, সেয়া প্ৰিয়দৰ্শন হওক, অক্ষয় হওক বা সুনীল হওক। তেওঁলোক মোৰ বহুত বহুত বহুত বছৰ পুৰণি বন্ধু।”

অভিনেতাগৰাকীয়ে পৰ্দালৈ বাবুৰাও হিচাপে ঘূৰি অহাটোও নিশ্চিত কৰে, আৰু সেই বিষয়ে সোধাত অভিনেতাজনে “হয়” বুলি উত্তৰ দিয়ে।

হেৰা ফেৰী-৩ বিতৰ্ক

হেৰা ফেৰী-৩ ৰ পৰা পৰেশ ৰাৱালৰ প্ৰস্থানে এক বৃহৎ বিতৰ্কৰ সৃষ্টি কৰে। প্ৰথম অৱস্থাত বাতৰি অনুসৰি অভিনেতাজনে সৃষ্টিশীল পাৰ্থক্যৰ বাবে ছবিখনৰ পৰা আঁতৰি গৈছিল, তেওঁ অৱশ্যে সেয়া অস্বীকাৰ কৰিছিল। পৰেশ ৰাৱালে এক্সত লিখিছে, “মই এই কথাটো ৰেকৰ্ডত ৰাখিব বিচাৰো যে মোৰ ‘হেৰা ফেৰী ৩’ৰ পৰা আঁতৰি যোৱাৰ সিদ্ধান্ত সৃষ্টিশীল পাৰ্থক্যৰ বাবে হোৱা নাছিল। মই পুনৰ কওঁ যে ছবি নিৰ্মাতাৰ সৈতে কোনো সৃষ্টিশীল মতানৈক্য নাই। মই মিষ্টাৰ প্ৰিয়দৰ্শনৰ প্ৰতি অপৰিসীম মৰম, সন্মান, আৰু বিশ্বাস ৰাখোঁ।”