চল-চাতুৰী নচলিব, খাদ্যৰ পেকেটত কোম্পানীয়ে উল্লেখ কৰিব লাগিব সঠিক তথ্য

পেকেটত ভৰোৱা খাদ্য খাই সকলোৱে ভাল পায়। কিন্তু এতিয়া চৰকাৰে পেকেজড ফুড কোম্পানীসমূহৰ ওপৰত কঠোৰ নজৰ ৰাখিছে । খাদ্যৰ লেবেল, পেকেজিং আৰু প্ৰচাৰ সামগ্ৰীৰ ওপৰত ১০০% দাবী কৰা বন্ধ কৰিবলৈ নিৰ্দেশ দিছে । এনে দাবীক “গ্ৰাহকৰ বাবে বিভ্ৰান্তিকৰ, অস্পষ্ট আৰু ভুলকৈ সংজ্ঞায়িত” বুলি অভিহিত কৰা হৈছে ।

যোৱা ২৮ মে’ত হোৱা এক আলোচনাত ভাৰতীয় খাদ্য সুৰক্ষা আৰু মানদণ্ড কৰ্তৃপক্ষই (Food Safety and Standards Authority of India) কয়, “খাদ্য সুৰক্ষা আইনৰ অধীনত ১০০% শব্দটো কোনো ধৰণে সংজ্ঞায়িত বা উল্লেখ কৰা হোৱা নাই । বৰ্তমান বহু ব্ৰেণ্ডে চকলেট, চাহ, মৌ, বিস্কুট আৰু প্ৰ’টিন পাউদাৰৰ দৰে সামগ্ৰী বিক্ৰী কৰে, য’ত “১০০% চেনিমুক্ত, বাজৰাৰ সৈতে, অ’টছৰ দ্বাৰা প্ৰস্তুত কৰা” বুলি দাবী কৰে ।”

কঠোৰ নিষেধাজ্ঞা
FSSAI এ কয় যে তেওঁলোকৰ নিয়মে অন্য কোম্পানীক তুচ্ছজ্ঞান কৰা বা গ্ৰাহকৰ ধাৰণাক বিভ্ৰান্তিকৰভাৱে প্ৰভাৱিত কৰা যিকোনো বিজ্ঞাপন বা দাবীক “কঠোৰভাৱে নিষিদ্ধ” কৰে । ইয়াত আৰু কোৱা হৈছে যে নিয়ম অনুসৰি দাবীসমূহ “সঁচা, স্পষ্ট আৰু অৰ্থপূৰ্ণ হ’ব লাগে, বিভ্ৰান্তিকৰ হ’ব নালাগে আৰু গ্ৰাহকক প্ৰদান কৰা তথ্য বুজিবলৈ সহায় কৰিব লাগে ।

দাবী আঁতৰাবলৈ নিৰ্দেশ দিয়া হৈছে
খাদ্য নিয়ন্ত্ৰকে ২০২৪ চনৰ মাজভাগত এক অধিসূচনা জাৰি কৰিছিল, য’ত কোম্পানীসমূহক লেবেল আৰু বিজ্ঞাপনৰ পৰা “১০০% ফলৰ ৰস”ৰ দৰে দাবী আঁতৰাবলৈ নিৰ্দেশ দিছিল। ইয়াৰ উপৰিও কোম্পানীসমূহক ডিচেম্বৰৰ শেষৰ ফালে পেকেট কৰা ৰসত ১০০% ফলৰ ৰস দাবী কৰা সকলো প্ৰি-প্ৰিণ্টেড পেকেজিং মেটেৰিয়েল নাইকিয়া কৰিবলৈ নিৰ্দেশ দিয়া হৈছে ।

আইনী বিবাদ
বহু ব্ৰেণ্ডৰ ভিতৰত এটা ব্ৰেণ্ড ডাবৰৰ ৰিয়েল জুচ ব্ৰেণ্ড আৰু FSSAI বৰ্তমান এই বিষয়টোক লৈ আইনী বিবাদত জড়িত হৈ আছে । যোৱা মাহত FSSAI এ দিল্লী উচ্চ ন্যায়ালয়ত কয় যে ডাবৰৰ পেকেজিঙৰ ওপৰত ‘১০০% ফলৰ ৰস’ দাবী কৰাটো বৰ্তমানৰ খাদ্য সুৰক্ষা নিয়মৰ অধীনত অনুমোদিত নহয়, ইয়াক “গ্ৰাহকৰ বাবে বিভ্ৰান্তিকৰ” বুলি অভিহিত কৰিছিল । নিয়ন্ত্ৰকজনে ডাবৰে এই নিৰ্দেশনাৰ বিৰুদ্ধে জনোৱা প্ৰত্যাহ্বানৰ প্ৰতি সঁহাৰি জনাইছিল ।