গগৈয়ে উভতি ধৰিলে মুখ্যমন্ত্ৰীক! নিটি আয়োগৰ প্ৰতিবেদনত অসমৰ স্থান অন্তিম ৫ ৰাজ্যৰ তালিকাত…

শেহতীয়াকৈ প্ৰকাশ পোৱা নিটি আয়োগৰ প্ৰতিবেদন সন্দৰ্ভত চৰকাৰক লক্ষ্য কৰি ল’লে অসম প্ৰদেশ কংগ্ৰেছৰ সভাপতি গৌৰৱ গগৈয়ে। ২৭ আগষ্টত এই বিষয়টোত তেওঁ প্ৰতিক্ৰিয়া ব্যক্ত কৰি কয় যে, নিটি আয়োগৰ তথ্যই মুখ্যমন্ত্ৰী হিমন্ত বিশ্ব শৰ্মাৰ বহুপ্ৰচাৰিত ‘ভিজন অসম’ৰ ধাৰণাক উদঙাই দিয়ে। এই বিষয়ে সামাজিক মাধ্যমত পোষ্ট দি তেওঁ কয় যে বিজেপি চৰকাৰখনে ৰাজ্যৰ শিক্ষা, স্বাস্থ্য, ক্ষুধা নিবৃত্তি আদি দিশৰ ওপৰত গুৰুত্ব দিব লাগে। শেহতীয়াকৈ প্ৰকাশ পোৱা নিটি আয়োগৰ তথ্যই মুখ্যমন্ত্ৰীৰ তথাকথিত ভিজন অসমৰ আচল স্বৰূপ উদঙাই দিয়া বুলিও তেওঁ কয়।

গগৈয়ে সামাজিক মাধ্যমত লিখে যে, ”নিটি আয়োগৰ এক প্ৰতিবেদনত প্ৰকাশ পাইছে অসমৰ মুখ্যমন্ত্ৰী ড° হিমন্ত বিশ্ব শৰ্মাই অসমবাসীৰ সন্মুখত সততে দাঙি ধৰা তেওঁৰ ‘ভিজন’ৰ প্ৰকৃত স্বৰূপ। তেওঁ আজি দশকজুৰি অসমবাসীক সপোন দেখুৱাই উদাত্ত কন্ঠেৰে প্ৰতিশ্ৰুতি দি আহিছে যে অসমক তেওঁ দেশৰ প্ৰথম ৫ খন ৰাজ্যৰ ভিতৰত এখন হিচাপে গঢ়ি তুলিব।

কিন্তু নীতি আয়োগৰ ১৭টা লক্ষ্যৰ ওপৰত আধাৰিত প্ৰতিবেদন অনুসৰি, দেশৰ ২৮ খন ৰাজ্যৰ ভিতৰত অধিক সংখ্যক লক্ষ্যত অসমে স্থান লাভ কৰিছে ২০ অথবা তাতকৈ তলত। তিনিটা মৌলিক প্ৰয়োজনীয় বিষয়ত অসমৰ স্থান ক্ৰমে তলত দিয়া ধৰণৰ:

সু-স্বাস্থ্যত ২৮ খন ৰাজ্যৰ ভিতৰত অসমৰ স্থান : ২৬

সু-শিক্ষাত ২৮ খন ৰাজ্যৰ ভিতৰত অসমৰ স্থান : ২৫

ক্ষুধা নিবৃত্তিত অসমৰ স্থান : ২২

এই প্ৰতিবেদন অনুসৰি অসমৰ স্থান দেশৰ অন্তিম ৫ ৰাজ্যৰ তালিকাতহে আছে। স্বাস্থ্যখণ্ডৰ অৱস্থা সমগ্ৰ উত্তৰ-পূৰ্বাঞ্চলৰ ভিতৰতো শোচনীয়। ইয়েই প্ৰমাণ কৰে যে শৰ্মা ডাঙৰীয়াৰ ‘ভিজন অসম’ যে এক মিথ্যা প্ৰচাৰৰ বাদে একো নহয়।

অন্য খবৰ পঢ়কঃ চৰকাৰৰ ডাঙৰ সিদ্ধান্ত! অন্য ধৰ্মৰ লোকক মাটি বিক্ৰী কৰাৰ ক্ষেত্ৰত SOP ত অনুমোদন…