২০২৬ ত পুনৰ হ’ব বিজেপি চৰকাৰ, কংগ্ৰেছক তীব্ৰ সমালোচনাৰে গুৱাহাটীত ৰণদুন্দুভি বজালে অমিত শ্বাহে

কেন্দ্ৰীয় গৃহমন্ত্ৰী অমিত শ্বাহে শুকুৰবাৰে দুদিনীয়া অসম ভ্ৰমণৰ সামৰণি মাৰে। এই ভ্ৰমণকালত তেওঁ ৰাহুল গান্ধী আৰু গৌৰৱ গগৈকে ধৰি কংগ্ৰেছৰ নেতৃত্বৰ ওপৰত চোকা সমালোচনা কৰে। ইয়াৰ জৰিয়তে ২০২৬ চনৰ বিধানসভা নিৰ্বাচনৰ বাবে বিজেপিৰ শক্তিৰ উমান দি ৰাজ্যখনক অনুপ্ৰৱেশকাৰীৰ পৰা মুক্ত কৰাৰ দীৰ্ঘদিনীয়া প্ৰতিশ্ৰুতিৰ কথা পুনৰবাৰ উল্লেখ কৰে শ্বাহে।

বৃহস্পতিবাৰে নিশা বিজেপিৰ মূল সমিতিৰ বৈঠকত অধ্যক্ষতা কৰি বিধানসভা নিৰ্বাচনৰ প্ৰস্তুতিৰ বিষয়ে আলোচনা আৰু কৌশল ৰচনা কৰি শ্বাহে ভ্ৰমণৰ আৰম্ভণি কৰে। শুকুৰবাৰে শ্বাহে ৰাজভৱনৰ নৱনিৰ্মিত ব্ৰহ্মপুত্ৰ উইং উদ্বোধন কৰে । নিজৰ ভাষণত তেওঁ ৰাহুল গান্ধীৰ ওপৰত আক্ৰমণ চলায় আৰু বিহাৰত কংগ্ৰেছ নেতাগৰাকীৰ ‘ভোটাৰ অধিকাৰ যাত্ৰা’ৰ সময়ত প্ৰধানমন্ত্ৰী নৰেন্দ্ৰ মোদীৰ বিৰুদ্ধে কৰা “আক্ৰমণ”ৰ বাবে ক্ষমা খুজিবলৈ কয়।

শ্বাহে দাবী কৰে যে গান্ধীৰ ৰাজনীতিয়ে বিহাৰত “ঘুচপেঠীয়া বচাও যাত্ৰা (অনুপ্ৰৱেশকাৰী বাচাও যাত্ৰা)”ৰ জৰিয়তে “নিম্ন স্তৰ” স্পৰ্শ কৰিছে। “ৰাহুল গান্ধীয়ে যদি লাজ আছে তেন্তে প্ৰধানমন্ত্ৰী, তেওঁৰ প্ৰয়াত মাতৃ আৰু দেশৰ জনসাধাৰণৰ ওচৰত ক্ষমা খুজিব লাগে। দেশৰ জনতাৰ তেওঁ আৰু তেওঁৰ দলটোৰ ওপৰত বিতৃষ্ণা উপজিছে।”

গান্ধী, কংগ্ৰেছৰ সাধাৰণ সম্পাদক প্ৰিয়ংকা গান্ধী ৱাদ্ৰা আৰু আৰজেডি নেতা তেজস্বী যাদৱে মটৰ চাইকেলেৰে মুজাফ্ফৰপুৰলৈ ৰাওনা হোৱাৰ সময়ত এখন মঞ্চৰ পৰা এজন অচিনাক্ত ব্যক্তিয়ে মোদীৰ বিৰুদ্ধে হিন্দী ব্যঞ্জনা ব্যৱহাৰ কৰা এটা কথিত ভিডিঅ’ চলাইছিল। এই ভিডিঅ’ দেখা পোৱাৰ পিছতে শ্বাহ আৰু বিজেপিৰ অন্যান্য জ্যেষ্ঠ নেতাসকলে বৃহস্পতিবাৰে লোকসভাত বিৰোধী নেতাক তীব্ৰ সমালোচনা কৰিছিল।

”ঘুচপেঠীয়া বচাও যাত্ৰা অনুপ্ৰৱেশকাৰী কংগ্ৰেছৰ ভোট বেংকক ৰক্ষা কৰিবলৈ, কিন্তু যিকোনো গণতন্ত্ৰত নিৰ্বাচনেই ইয়াৰ আত্মা। যদি অনুপ্ৰৱেশকাৰীক ভোটাৰ তালিকাত নিজৰ নাম লিখি ব্যৱস্থাটো প্ৰদূষিত কৰিবলৈ দিয়া হয় তেন্তে এখন দেশ কেনেকৈ নিৰাপদ হ’ব পাৰে?” শ্বাহে প্ৰশ্ন কৰে।

ভাৰতীয় ৰাজনীতিত ৰাহুল গান্ধীয়ে ”ঘৃণা আৰু উপহাস উলিয়াবলৈ আৰম্ভ কৰিছে আৰু কংগ্ৰেছৰ ৰাজনীতি নেতিবাচক” বুলিও তেওঁ কয়। ”কংগ্ৰেছৰ নেতাসকলে বহু ঘৃণনীয় কামত লিপ্ত হৈছে যদিও বিহাৰত ৰাহুল গান্ধীক আদৰণি জনোৱা যাত্ৰাৰ মঞ্চৰ পৰা প্ৰধানমন্ত্ৰীক কৰা গালি-গালাজে সকলো সীমা অতিক্ৰম কৰিছে।” গৃহমন্ত্ৰীয়ে কয়।

দিনটোৰ দ্বিতীয় কাৰ্যসূচীত পঞ্চায়ত প্ৰতিনিধি সন্মিলনত ভাষণ দি শ্বাহে কয় যে সঘনাই পাকিস্তান ভ্ৰমণ কৰা লোকে অসমক নেতৃত্ব দিব নোৱাৰে, আপাত দৃষ্টিত বিদেশী ৰাষ্ট্ৰৰ সৈতে ৰাজ্যিক কংগ্ৰেছৰ সভাপতি গৌৰৱ গগৈৰ সম্পৰ্কৰ বিষয়ে অভিযোগ উত্থাপন কৰে শ্বাহে।

প্ৰধানমন্ত্ৰীয়ে আৰম্ভ কৰা আৰু মুখ্যমন্ত্ৰী হিমন্ত বিশ্ব শৰ্মাই ৰূপায়ণ কৰা বৃহৎ উন্নয়নমূলক কামৰ বাবে অহা বছৰ বিজেপি নেতৃত্বাধীন এন ডি এয়ে অসমত একেৰাহে তৃতীয়খন চৰকাৰ গঠন কৰিব বুলি দৃঢ়তাৰে কয় কেন্দ্ৰীয় গৃহমন্ত্ৰীগৰাকীয়ে।

“মোদীয়ে সমগ্ৰ দেশতে অপৰিসীম উন্নয়নমূলক কাম-কাজ চলাইছিল, আৰু সেই প্ৰবাহক শৰ্মাই ৰাজ্যৰ প্ৰতিটো ঘৰলৈ লৈ গৈছিল। এই কামবোৰৰ বাবেই অহা বছৰ বিজেপি নেতৃত্বাধীন এন ডি এয়ে একেৰাহে তৃতীয়বাৰৰ বাবে অসমত চৰকাৰ গঠন কৰিব।” শ্বাহে কয়।

বিৰোধী কংগ্ৰেছক সমালোচনা কৰি শ্বাহে কয় যে অনুপ্ৰৱেশকাৰীক সুৰক্ষা দিয়া আৰু তেওঁলোকৰ বেদখলক উৎসাহিত কৰা লোকে অসমক নেতৃত্ব দিব নোৱাৰিব। “অসম মোদী আৰু শৰ্মাৰ নেতৃত্বত থাকিব। ইয়াক সঘনাই পাকিস্তান ভ্ৰমণ কৰা লোকে নেতৃত্ব দিব নোৱাৰে,” অমিত শ্বাহে কয়।

পাকিস্তানৰ চোৰাংচোৱা সংস্থা আই এছ আইৰ সৈতে ব্ৰিটিছ পত্নীৰ সম্পৰ্ক থকাৰ অভিযোগত অসমৰ মুখ্যমন্ত্ৰী আৰু বিজেপিয়ে লোকসভাত কংগ্ৰেছৰ উপ-দলপতি গৌৰৱ গগৈক আক্ৰমণ চলাই আহিছে।

“আমাৰ হাজাৰ হাজাৰ একৰ মাটি অনুপ্ৰৱেশকাৰীয়ে বেদখল কৰিছিল। বিজেপি চৰকাৰে বেদখল মুক্ত কৰাৰ অভিযান আৰম্ভ কৰিছিল, কিন্তু গৌৰৱ গগৈয়ে ইয়াৰ বিৰোধিতা কৰিছিল। অসম চৰকাৰে অনুপ্ৰৱেশকাৰীৰ বেদখলৰ পৰা ১,২৯,৫৪৮ একৰ মুক্ত কৰিছে”, শ্বাহে কয়। তেওঁ দৃঢ়তাৰে কয় যে বিজেপিয়ে শ্ৰীমন্ত শংকৰদেৱ আৰু মহাপুৰুষ মাধৱদেৱৰ সত্ৰৰ পবিত্ৰতা পুনৰ ঘূৰাই আনিছে, অনুপ্ৰৱেশকাৰীক তেওঁলোকৰ ভূমিৰ পৰা উচ্ছেদ কৰিছে।

অসমৰ প্ৰথমজন অকংগ্ৰেছী মুখ্যমন্ত্ৰী গোলাপ বৰবৰাৰ জন্ম শতবাৰ্ষিকী উপলক্ষে আয়োজন কৰা কাৰ্যসূচীত পুনৰ অনুপ্ৰৱেশৰ বিষয়টো আলোকপাত কৰি শ্বাহে কয় যে বিজেপিয়ে দেশখনক অনুপ্ৰৱেশকাৰীৰ পৰা মুক্ত কৰাৰ প্ৰতিশ্ৰুতি পালন কৰিব। স্বাধীনতা দিৱসৰ দিনা মোদীয়ে ঘোষণা কৰা উচ্চ শক্তিৰ জনগাঁথনি অভিযান দেশৰ জনগাঁথনিগত আৰ্হি অধ্যয়ন আৰু অনুপ্ৰৱেশকাৰী চিনাক্তকৰণৰ দিশত এক নিৰ্দিষ্ট পদক্ষেপ বুলিও তেওঁ কয়।

“আমি অসমক প্ৰতিশ্ৰুতি দিছিলোঁ, কিন্তু ১০ বছৰত আমি সেই প্ৰতিশ্ৰুতি পূৰণ কৰিব পৰা নাই। আমি এই প্ৰতিশ্ৰুতি ৰক্ষা কৰি অসমৰ লগতে সমগ্ৰ দেশক অবৈধ বিদেশীৰ পৰা মুক্ত কৰিম।” শ্বাহে কয়।

১৯৭৮ চনৰ মাৰ্চ মাহৰ পৰা ১৯৭৯ চনৰ ছেপ্টেম্বৰ মাহলৈকে ৰাজ্যত জনতা পাৰ্টি চৰকাৰৰ নেতৃত্ব দিয়া গোলাপ বৰবৰাই মঙলদৈ লোকসভাৰ আসনৰ বাবে উপ-নিৰ্বাচনৰ প্ৰয়োজন হোৱাত ভোটাৰ তালিকা সংশোধন কৰাৰ বাবে কেনেদৰে অভিযান হাতত লৈছিল সেই কথা শ্বাহে বৰ্ণনা কৰে।

কম্পিউটাৰাইজড নিৰ্বাচনী তালিকা নথকাৰ পাছতো গোলাপ বৰবৰা চৰকাৰে ৩৬,৭৮০ জন অবৈধ বিদেশীৰ নাম ধৰা পেলাইছিল, আৰু ভোটাৰ তালিকাৰ এই শুদ্ধিকৰণক অসম আন্দোলনৰ উৎপত্তি বুলি ধৰিব পাৰি।

“নিৰ্বাচন আয়োগে এতিয়া SIRৰ জৰিয়তে ভোটাৰ তালিকা সংশোধন কৰি আছে, কিন্তু একাংশ দলে ইয়াৰ বিৰোধিতা কৰিছে। আজিৰ ৰাজনীতিত যি নৈতিক অৱনতি ঘটিছে সেয়াই দেখুৱাইছে।” শ্বাহে দোহাৰে।

ইয়াৰ পিছতে অসম ভ্ৰমণৰ অন্ত পেলাই কেন্দ্রীয় মন্ত্রীগৰাকী দিল্লীলৈ ৰাওনা হয়। বিমানবন্দৰত মুখ্যমন্ত্রী আৰু তেওঁৰ কেবিনেট সতীর্থ, কেন্দ্রীয় মন্ত্রী সর্বানন্দ সোণোৱাল, বিজেপিৰ ৰাজ্যিক সভাপতি দিলীপ শইকীয়াকে ধৰি ৰাজ্যৰ জ্যেষ্ঠ নেতাসকলে শ্বাহক বিদায় দিয়ে ৷

”মাননীয় কেন্দ্ৰীয় গৃহমন্ত্ৰী শ্ৰীঅমিত শ্বাহ ডাঙৰীয়াৰ সান্নিধ্যত বিগত ২৪ ঘণ্টাধৰি সময় কটাবলৈ পোৱাতো আমাৰ বাবে সৌভাগ্যৰ কথা৷ তেখেতৰ উৎসাহী ব্যক্তিত্বই আমাক সদায় উদ্দীপনা যোগাই আহিছে আৰু আজি ৰাজ্যৰ মাইলৰ খুঁটি স্বৰূপ পদক্ষেপসমূহত তেখেতৰ গৌৰৱময় উপস্থিতিৰ বাবে আন্তৰিকতাৰে ধন্যবাদ জ্ঞাপন কৰিছোঁ ৷ দিল্লীলৈ ওভতাৰ সময়ত তেখেতক কিছু সময় আগতে গুৱাহাটী বিমান বন্দৰত বিদায় সম্ভাষণ জনাওঁ ৷” মুখ্যমন্ত্ৰীয়ে সামাজিক মাধ্যমত এক পোষ্টত লিখে।

আন এক পোষ্টত মুখ্যমন্ত্ৰীয়ে লিখিছে, “আজি ‘ভাৰত মাতা কী জয়’ ধ্বনিত মুখৰ হ’ল গুৱাহাটীৰ বতাহ ৷ এন ডি এৰ পঞ্চায়ত প্ৰতিনিধি সন্মিলন। মাননীয় কেন্দ্ৰীয় গৃহমন্ত্ৰী শ্ৰীঅমিত শ্বাহ ডাঙৰীয়াই ৰাজ্যৰ সকলো প্ৰান্তৰ পৰা অহা হাজাৰ হাজাৰ নিৰ্বাচিত ৰাষ্ট্ৰীয় গণতান্ত্ৰিক মৰ্চাৰ প্ৰতিনিধিক সম্বোধন কৰা মুহূৰ্তই বুজাই দিছিল বর্তমানৰ দ্বৈত ইঞ্জিন চৰকাৰৰ উছর্গিত প্রয়াসৰ কথা। অসমৰ জাতি, মাটি, ভেটি ৰক্ষাৰ যুঁজত আমাৰ ৰাষ্ট্ৰীয় গণতান্ত্ৰিক মৰ্চা যে সদায়ে প্ৰতিজ্ঞাবদ্ধ সেয়া আজিৰ বৃহৎ সভাখনে পুনৰ প্ৰমাণ কৰিলে ৷ মাননীয় শ্ৰীঅমিত শ্বাহ ডাঙৰীয়াৰ মাৰ্গদৰ্শনে সদায় জনসেৱাৰ দিশত আমাক উদ্বুদ্ধ কৰি আহিছে আৰু আপোনালোকৰ বাবে কাম কৰিবলৈ অনুপ্ৰেৰণা যোগাই আহিছে ৷ অসম আৰু অসমীয়াৰ স্বাৰ্থ, স্বাভিমান সুৰক্ষিত কৰা আৰু আমাৰ জনকল্যাণমূলক কৰ্ম আঁচনি অব্যাহত ৰাখিবলৈ, এখন অনুপ্ৰৱেশমুক্ত অসম গঢ়িবলৈ ৰাষ্ট্ৰীয় গণতান্ত্ৰিক মৰ্চাই সদায়েই দায়বদ্ধতাৰে কাম কৰি যাব৷ ইয়াৰ বাবে আমাৰ যুঁজ অব্যাহত থাকিব ৷”