বিজেপিক ওফৰাই পেলোৱাৰ লক্ষ্য! ৭টা বিৰোধী দলৰ নেতৃবৃন্দৰে কংগ্ৰেছৰ বৈঠক…
সমাগত বিধানসভা নিৰ্বাচন। ইয়াক লৈ প্ৰস্তুতি চলাইছে প্ৰতিটো ৰাজনৈতিক দলে। ইয়াৰ মাজতে আজি ৭টা বিৰোধী দলৰ নেতৃবৃন্দৰে কংগ্ৰেছৰ শীৰ্ষ নেতৃত্বৰ বৈঠক সম্পন্ন হয়।
সমাগত বিধানসভা নিৰ্বাচনক লৈ ইতিমধ্যে প্ৰস্তুতি চলাইছে প্ৰতিটো ৰাজনৈতিক দলে।মুখ্যমন্ত্ৰী হিমন্ত বিশ্ব শৰ্মাৰ নেতৃত্বাধীন বিজেপি চৰকাৰখনত উফৰাই পেলাবলৈ বিৰোধী দলে প্ৰতিটো চেষ্টায়ে কৰিছে। এই লক্ষ্য আগত ৰাখিয়ে বুধবাৰে কংগ্ৰেছ দলৰ শীৰ্ষ নেতৃত্বই ৭টা বিৰোধী দলৰ নেতাসকলৰ সৈতে গুৰুত্বপূৰ্ণ বৈঠকত মিলিত হয়। প্ৰায় ২ ঘণ্টাজোৰা বৈঠকৰ অন্তত নিখিল ভাৰত কংগ্ৰেছৰ অসমৰ দায়িত্বত থকা সাধাৰণ সম্পাদক জিতেন্দ্ৰ সিং আৰু অসম প্ৰদেশ কংগ্ৰেছৰ সভাপতি সাংসদ গৌৰৱ গগৈয়ে এক সংবাদমেল সম্বোধন কৰে।
বৈঠক সন্দৰ্ভক গগৈয়ে কয় যে, কংগ্ৰেছ দলৰ আহ্বানক্ৰমে ৰাইজৰ দল, অসম জাতীয় পৰিষদ, আঞ্চলিক গণ মৰ্চা, চিপিএম, চিপিআই, চিপিআইএমএল আৰু এপিএইছএলচিৰ সভাপতি আৰু ৰাজ্যিক সম্পাদকসকলৰ লগত আলোচনা হয়। বিজেপি দল আৰু চৰকাৰৰ অন্যায়-অত্যাচাৰৰ লগত মুখ্যমন্ত্ৰী হিমন্ত বিশ্ব শৰ্মাৰ দুৰ্নীতি-অপশাসনৰ পৰা অসমবাসীক মুক্ত কৰিবলৈ বিজেপি বিৰোধী এখন চৰকাৰ গঠন কৰাৰ বাবে সকলোৱে ঐক্যমতত উপনীত হৈছে। পৰৱৰ্তী সময়ত বিৰোধী দলসমূহৰ মাজত হোৱা আলোচনাৰ কথা অৱগত কৰা হ’ব বুলিও কয় গগৈয়ে।
জিতেন্দ্ৰ সিঙে কয় যে, হিমন্ত বিশ্ব শৰ্মাৰ চৰকাৰৰ অন্যায় আৰু অবিচাৰৰ বিৰুদ্ধে সকলো বিৰোধী দল একত্ৰিত হৈ অসমত এখন নতুন ৰাইজৰ চৰকাৰ গঠন কৰা হ’ব। আনহাতে বাকী কেইটা দলৰ বিধায়ক, নেতাসকলেও কয় যে, আটাইকেইটা দলে একত্ৰিতভাৱে ২০২৬ৰ নিৰ্বাচনত অৱতীৰ্ণ হব।
উল্লেখ্য যে, অসম প্ৰদেশ কংগ্ৰেছ কমিটিৰ সভাপতি গৌৰৱ গগৈৰ সঞ্চালনাত অসম বিধানসভাৰ কংগ্ৰেছ বিধায়িনী দলৰ সভাকক্ষত অনুষ্ঠিত বৈঠকখনত নিখিল ভাৰত কংগ্ৰেছৰ সাধাৰণ সম্পাদক তথা অসমৰ তত্ৱাৱধায়ক জিতেন্দ্ৰ সিং, সম্পাদক পৃথ্বিৰাজ সাথে, মনোজ চৌহান উপস্থিত থাকে। বৈঠকখনত অংশগ্ৰহণ কৰা বিৰোধী দলৰ নেতাসকল হৈছে সাংসদ অজিত কুমাৰ ভূঞা, ৰাইজৰ দলৰ সভাপতি অখিল গগৈ, অসম জাতীয় পৰিষদৰ সভাপতি লুৰীণজ্যোতি গগৈ, চিপিএম দলৰ বিধায়ক মনোৰঞ্জন তালুকদাৰ, ৰাজ্যিক সম্পাদক সুপ্ৰকাশ তালুকদাৰ, চিপিআই দলৰ ৰাজ্যিক সম্পাদক কনক গগৈ, চিপিআইএম দলৰ ৰাজ্যিক সম্পাদক বিবেক দাস আৰু এপিএইছএলচি দলৰ বিক্ৰম হাঞ্চে। বৈঠকত অসম বিধানসভাৰ বিৰোধী দলপতি দেৱব্ৰত শইকীয়া, আৰু ধুবুৰী লোকসভা সমষ্টিৰ সাংসদ তথা জ্যেষ্ঠ কংগ্ৰেছ নেতা ৰকিবুল হুছেইনেও অংশগ্ৰহণ কৰে।
উল্লেখ্য যে, ইয়াৰ পূৰ্বে আজি ৰাজীৱ ভৱনত দিনৰ প্ৰায় ১১ বজাত প্ৰদেশ কংগ্ৰেছৰ ৰাজনৈতিক পৰিক্ৰমা সমিতিৰ এখন গুৰুত্বপূৰ্ণ বৈঠক অনুষ্ঠিত হয়। প্ৰদেশ কংগ্ৰেছৰ সভাপতি গৌৰৱ গগৈৰ পৰিচালনাত অনুষ্ঠিত এই বৈঠকখনত একাধিক সিদ্ধান্ত গ্ৰহণ কৰা হয়। বৈঠকৰ অন্তত প্ৰদেশ কংগ্ৰেছৰ সভাপতি গৌৰৱ গগৈয়ে এক সংবাদমেল অনুষ্ঠিত কৰি কেবাটাও সিদ্ধান্তৰ কথা সদৰী কৰে।
গগৈয়ে সদৰী কৰা মতে আজিৰ বৈঠকত ৰাইজৰ সুখ-দুখৰ বুজ ল’বলৈ বুলি ‘ৰাইজৰ পদূলিত ৰাইজৰ কংগ্ৰেছ’ শীৰ্ষক এক অভিযান আৰম্ভ কৰিব। ”অসমৰ চুকে-কোণে, গাঁৱে-ভূঞে গৈ কংগ্ৰেছে মানুহৰ সৈতে আলোচনা কৰিব। লগতে কংগ্ৰেছৰ শীৰ্ষৰ নেতাসকলে বাগানেই হওক বা চৰাঞ্চলেই হওক বা পাহাৰীয়া অঞ্চলেই হওক বা জনজাতি প্ৰধান অঞ্চলেই নহওক কিয় সকলো ঠাইলৈ গৈ সেই ঠাইসমূহৰ সাধাৰণ পৰিয়ালৰ ঘৰত নিশা কটাব।’’- গগৈয়ে কয়।
তেওঁ আৰু কয় যে অসমৰ প্ৰতিটো অঞ্চলতে বিশেষ সভা অনুষ্ঠিত কৰা হ’ব। এই সভা কেৱল দলীয় সভা নহ’ব, তালৈ উদাৰমনৰ সমাজ সচেতক লোকসকলকো আমন্ত্ৰণ জনোৱা হ’ব। গগৈয়ে কয়, ”তেওঁলোকৰ পৰা আমি জানিব বিচাৰো যে অৰ্থনৈতিক ক্ষেত্ৰত, সাংস্কৃতিক ক্ষেত্ৰত কেনেধৰণৰ কাম কৰা দৰকাৰ? আমাৰ এই সভাসমূহক ৰাইজৰ বাবে এখন মঞ্চ কৰি তোলা হ’ব। সেই মঞ্চত স্থানীয় বুদ্ধিজীৱী, স্থানীয় সাহিত্যিক, স্থানীয় অৰ্থনীতিবিদসকলক আমন্ত্ৰণ জনাই তেওঁলোকৰ মনৰ কথা আমি শুনিম।’’ অসমত ভোট চুৰি ৰোধ কৰিবলৈ সকলো ব্যৱস্থা গ্ৰহণ কৰা সম্পৰ্কে আজিৰ বৈঠকত আলোচনা হোৱা বুলিও জানিবলৈ দিয়ে গগৈয়ে।
তেওঁ কয় যে অসমত প্ৰায় ২৯ হাজাৰ বুথত ৮০-৯০ শতাংশ বিএলএ নিযুক্তি দিয়া হৈছে। এতিয়া বুথ কমিটি গঠন কৰিবলৈ আৰম্ভ কৰা হৈছে বুলিও কয় গগৈয়ে। অনহাতে, অহা ১৮ নৱেম্বৰত প্ৰাণৰ শিল্পী জুবিন গাৰ্গৰ জন্মদিনৰ সৈতে সংগতি ৰাখি এক বিশেষ সংগীতানুষ্ঠানৰ আয়োজন কৰিবলৈকো সিদ্ধান্ত গ্ৰহণ কৰাৰ কথা জানিবলৈ দিয়ে প্ৰদেশ কংগ্ৰেছৰ সভাপতিগৰাকীয়ে।
এই সন্দৰ্ভত গগৈয়ে সংবাদমেলত কয়, ”অহা ১৮ নৱেম্বৰ,২০২৫ তাৰিখ হৈছে আমাৰ সকলোৰে প্ৰাণৰ শিল্পী জুবিন গাৰ্গদেৱৰ ওপজা দিন। তেখেতৰ অবৰ্তমানত উদযাপিত হ’বলগীয়া প্ৰথমটো ওপজা দিনত প্ৰাণৰ শিল্পীগৰাকীক কথা, সুৰ আৰু গীতৰ মাধ্যমেৰে স্মৰণ কৰিবৰ বাবে অসম প্ৰদেশ কংগ্ৰেছ কমিটীয়ে গুৱাহাটীত কেন্দ্ৰীয়ভাৱে “কাঞ্চনজংঘা – সংস্কৃতি হওক মৈত্ৰেয়ীৰ মন্ত্ৰ” শীৰ্ষক এক বিশেষ সংগীতানুষ্ঠানৰ আয়োজন কৰিছে। প্ৰকৃতিৰ প্ৰতি থকা জুবিন গাৰ্গদেৱৰ নিভাঁজ প্ৰেম,বিশেষকৈ নাহৰ গছৰ প্ৰতি থকা তেখেতৰ বিশেষ টানৰ প্ৰতি সন্মান জনাই সেইদিনা অসমৰ প্ৰতিটো বুথতে নাহৰ পুলি ৰোপণৰ এক কাৰ্যসূচীও গ্ৰহণ কৰা হৈছে।’’ বৈঠকত গ্ৰহণ কৰা বাকী সিদ্ধান্তসমূহৰ বিষয়ে পৰৱৰ্তী সময়ত সদৰী কৰা হ’ব বুলি কয় প্ৰদেশ কংগ্ৰেছৰ সভাপতিগৰাকীয়ে।
অন্য খবৰ পঢ়কঃ হাবি কাটি শিলসাঁকোত গৃহ নিৰ্মাণ! উচ্ছেদিত জনতাক চোঁচৰাই নিলে আৰক্ষীয়ে…
