শিলচৰত নেতাজীৰ ২৪ ফুট উচ্চতাৰ প্ৰতিমূৰ্তি উন্মোচন মুখ্যমন্ত্ৰী হিমন্ত বিশ্ব শৰ্মাৰ…

দুদিনীয়া কাৰ্যসূচীৰে বৰাক উপত্যকাত উপস্থিত হোৱা মুখ্যমন্ত্ৰী হিমন্ত বিশ্ব শৰ্মাই দেওবাৰে শিলচৰৰ ৰংগিৰখাৰী ৰঁটাৰীত নেতাজী সুভাষ চন্দ্ৰ বসুৰ ২৪ ফুট উচ্চতাৰ এটা প্রতিমূর্তি আনুষ্ঠানিকভাবে উন্মোচন কৰে। তাৰ পাছতে বিশাল জনসভা সম্বোধন কৰি শৰ্মাই বিভিন্ন গুৰুত্বপূৰ্ণ মন্তব্য কৰে। শৰ্মাই কয় যে, নেতাজীৰ সুউচ্চ ব্যক্তিত্ব আৰু চহৰখনৰ বৰ্ধিত কলেৱৰৰ সৈতে সামঞ্জস্য ৰাখি এটা বৃহৎ আৰু দৃষ্টিনন্দন প্রতিমূর্তি স্থাপন কৰাৰ প্ৰয়োজনীয়তা শিলচৰবাসীয়ে বহুদিনৰেপৰা মনত পোষণ কৰি ৰাখিছিল। সেই সপোন আজি পূৰণ হ’ল।

তেওঁ আৰু কয়, দুশ বছৰীয়া ব্রিটিছ শাসনৰ পৰা ভাৰতক মুক্ত কৰাৰ বাবে যি বিপ্লৱৰ সূচনা হৈছিল সেয়া বিশ্ব ইতিহাসত বিৰল। এই ইতিহাসৰ এক অগ্রণী ব্যক্তিত্ব হৈছে নেতাজী সুভাষ চন্দ্র বসু। ১৮৫৭ চনত ব্ৰিটিছৰ বিৰুদ্ধে সূচনা হোৱা চিপাহী বিদ্রোহে প্রথম ভাৰতীয় স্বাধীনতা সংগ্ৰামৰ বীজ অংকুৰিত কৰিছিল যদিও ঊনবিংশ শতিকাৰ শেষাৰ্ধৰ পৰা ভাৰতীয় জাতীয়তাবাদৰ উত্থান হৈছিল।

আৰু কয়, ১৯১৯ চনত কুখ্যাত ৰাওলাট আইন ভাৰতত প্ৰয়োগ কৰাৰ পিছতেই দেশব্যাপী ইংৰাজৰ বিৰুদ্ধে তীব্র ক্ষোভ সঞ্চাৰিত হৈছিল আৰু জালিয়ানৱালাবাগৰ হত্যাকাণ্ডই সুভাষ চন্দ্র বসুক বিষাদগ্ৰস্ত কৰি তুলিছিল। ব্ৰিটিছৰ কবলৰ পৰা দেশক মুক্ত কৰাৰ বাবে তেওঁ সংকল্প লৈছিল। মহাত্মা গান্ধীৰ অহিংস বিপ্লৱ সমগ্র দেশতে সেই সময়ত বিয়পি পৰাৰ কথা উল্লেখ কৰি মুখ্যমন্ত্রীয়ে কয় যে গান্ধীজীয়ে কংগ্ৰেছৰ নৰমপন্থীসকলৰ নীতিৰ প্ৰতি আকৃষ্ট হোৱাৰ পৰিৱৰ্তে ‘লাল-বাল-পাল’ ৰূপে খ্যাত লালা লাজপত ৰায়, বাল গংগাধৰ তিলক আৰু বিপিনচন্দ্ৰ পালৰ নেতৃত্বৰ প্ৰতি অধিক আগ্রহী হৈ উঠিছিল।

মুখ্যমন্ত্রীয়ে আৰু কয় যে সুভাষ চন্দ্ৰ বসুৰ যোগদানে ভাৰতৰ স্বাধীনতা সংগ্ৰামত এক নতুন যুগৰ সূচনা কৰিছিল। আই চি এছৰ দৰে লোভনীয় চাকৰি ত্যাগ কৰি দেশমাতৃক সেৱা কৰাৰ বাবে তেওঁ আগুৱাই অহাটোৱে যুৱ প্ৰজন্মক দেশমাতৃৰ সেৱাৰ বাবে উদ্বুদ্ধ কৰি তুলিছিল। ১৯২০ চনত অসহযোগ আন্দোলনত সুভাষ চন্দ্র বসুৱে সক্রিয় ভূমিকা গ্রহণ কৰাৰ কথা উল্লেখ কৰি মুখ্যমন্ত্ৰীয়ে কয়- ‘সেই সময়ত স্বৰাজ নামৰ জাতীয়তাবাদী কাকতৰ সম্পাদকৰ দায়িত্বও নেতাজীয়ে বহন কৰিছিল।

আনহাতে, কলিকতাত স্থাপন হোৱা কংগ্ৰেছ জাতীয় মহাবিদ্যালয়ৰ অধ্যক্ষৰো দায়িত্ব লৈছিল সুভাষ চন্দ্র বসুয়ে। তেওঁ ভাৰতৰ স্বাধীনতাৰ সম্পৰ্কত আন্তঃৰাষ্ট্ৰীয় পর্যায়ত জনমত গঠনৰ দিশত সক্রিয় ভূমিকা গ্রহণ কৰিছিল। ভাৰতবৰ্ষৰ সমস্যাৰ কথা ইউৰোপৰ নেতাসকলক লগ ধৰি বুজাইছিল আৰু তেওঁলোকৰ সমর্থন লাভৰ বাবে অহোপুৰুষাৰ্থ কৰিছিল। সুভাষ চন্দ্ৰ বসুৰ এই প্ৰচেষ্টাৰ বাবে ভাৰতৰ স্বাধীনতা আন্দোলনৰ সপক্ষে ইউৰোপতো শক্তিশালী জনমত গঠন হৈছিল।’

ভাষণত মুখ্যমন্ত্রীয়ে অসমত স্বাধীনতা আন্দোলনৰ শক্তিশালী বীজ অংকুৰণৰ ক্ষেত্ৰত নেতাজীৰ ভূমিকা কথাও উল্লেখ কৰে। নেতাজী সুভাষ চন্দ্র বসুৰ সৈতে বৰাক উপত্যকাৰ থকা সম্পৰ্কৰ কথা উল্লেখ কৰি তেওঁ কয় যে নেতাজীয়ে দুবাৰ শিলচৰ ভ্ৰমণ কৰিছিল। ইয়াৰে প্ৰথমবাৰ ১৯৩৮ চনত ভাৰতীয় জাতীয় কংগ্ৰেছৰ সভাপতি হিচাপে আৰু তাৰ পিছত ১৯৩৯ চনত কংগ্ৰেছ দলৰ পৰা বহিষ্কাৰ হোৱাৰ পিছত। মুখ্যমন্ত্রীয়ে কয় যে নেতাজীৰ এই দুয়োটা ভ্রমণতে তেওঁক যুৱক-যুৱতী, ছাত্ৰ-ছাত্ৰী আৰু সাধাৰণ ৰাইজে বিপুলভাবে আদৰণি জনাইছিল।

অনুষ্ঠানত মুখ্যমন্ত্ৰীয়ে বৰাক উপত্যকাৰ হিন্দু-বঙালী সম্প্ৰদায়ৰ সম্পূৰ্ণ সুৰক্ষা তথা সামগ্রিক বিকাশৰ দিশত ৰাজ্য চৰকাৰে কাম কৰি যাব বুলি নিশ্চিতি প্রদান কৰে। ভাষণত মুখ্যমন্ত্ৰীয়ে বেদখলৰ বিৰুদ্ধে ৰাজ্য চৰকাৰে চলাই অহা উচ্ছেদ অভিযানৰ কথাও উল্লেখ কৰে। তেওঁ কয় যে ব্রহ্মপুত্র উপত্যকাত চলি থকা এই অভিযানৰ দৰে বৰাক উপত্যকাৰ বনভূমিত হোৱা বেদখল উচ্ছেদৰ বাবে সকলো সন্দেহযুক্ত বেদখলকাৰীৰ বিৰুদ্ধে উচ্ছেদ অভিযান চলোৱা হ’ব।

ভাষণত মুখ্যমন্ত্রীয়ে লগতে ঘোষণা কৰে যে ৰংগিৰখাৰীৰ পৰা কেপিটেল পইন্টলৈ সমগ্র অঞ্চলটোত হোৱা যানজট দূৰ কৰাৰ অৰ্থে অঞ্চলটোত ৭০০ কোটি টকা ব্যয়েৰে এখন উৰণ সেতু নির্মাণ কৰা হ’ব। এই প্রকল্প যাতে সুষমভাৱে ৰূপায়ণ হয় তাৰ বাবে ভূমি অধিগ্রহণ সম্বন্ধীয় কাম-কাজত পূর্ণ সহযোগিতা আগবঢ়াবলৈ তেওঁ জনসাধাৰণক আহ্বান জনায়।

(প্ৰেছ বাৰ্তা)

অন্য খবৰ পঢ়কঃ গুৱাহাটীত চাঞ্চল্য! নিশা চলা ৰঙীন পাৰ্টীৰ পাছতে মহিলাৰ মৃত্যু, আটক ইমৰান…